ဒေတာကုန်ကျမှုလျှော့ချနိုင်ရန်အတွက် ယခုဝက်ဘ်ဆိုက်မှ စာမျက်နှာများကို ရုပ်ပုံမပါ စာသားဖြင့်သာတင်ဆက်ပေးထားပါသည်။ ရုပ်ပုံ ဗီဒီယိုများနှင့် ကြည့်လိုလျှင် မူလစာမျက်နှာတွင်ကြည့်နိုင်ပါသည်။
တပ်ချုပ်ကို ထောက်ခံတဲ့ အန်အယ်ဒီအမတ်တွေ ရှိနေပြီလား
၂၀၀၈ အခြေခံဥပေဒ ပြင်ဆင်ရေး မဲခွဲတဲ့ ပထမနေ့မှာ ပုဒ်မ ၁၄ ခုထဲက ၄၀(ဂ)ရဲ့ မဲရလဒ်တွေက စိတ်ဝင်စားဖွယ်ပါ။
လက်ရှိ အခြေခံ ဥပဒေပုဒ်မ ၄၀(ဂ) ဟာ အရေးပေါ် အခြေအနေမှာ တပ်မတော် ကာကွယ်ရေးဦးစီးချုပ်က နိုင်ငံတော်အာဏာကို လိုအပ်သလို ဦးဆောင်ပြီး အခြေခံဥပဒေအတိုင်း လုပ်ဖို့ ပြဌာန်းထားတာပါ။
အဲဒီအစား သမ္မတက ဦးဆောင်ပြီး တာဝန်ယူ ဆောင်ရွက်နိုင်မယ့် အစီအစဉ်ကို ပြည်ထောင်စုလွှတ်တော်က အတည်ပြု ဆုံးဖြတ်ပေးရမယ်ဆိုပြီး ဥပဒေပုဒ်မ ၄၀ (ဂ) ကို ပြင်ဆင်ပြဌာန်းဖို့ အမျိုးသား ဒီမိုကရေစီအဖွဲ့ချုပ် ဦးဆောင်တဲ့ ၄၅ ဦးကော်မတီက ဥပဒေမူကြမ်း တင်ခဲ့ပါတယ်။
ပြည်ထောင်စု လွှတ်တော်မှာ လွှတ်တော်ကိုယ်စားလှယ် စုစုပေါင်း ၆၅၄ ဦးရှိပါတယ်။
ဒီဥပဒေပုဒ်မကို မဲခွဲတဲ့ ပထမဆုံးနေ့မှာ အမျိုးသား ဒီမိုကရေစီအဖွဲ့ချုပ် ကိုယ်စားလှယ် ၃၈၃ ဦး တက်ရောက်ခဲ့တာပါ။ ဒါပေမယ့် ပုဒ်မ ၄၀ (ဂ) ပြင်ဆင်ရေးကို ထောက်ခံတဲ့ မဲက ၃၄၃ မဲပဲ ရှိခဲ့တယ်လို့ လွှတ်တော်နာယက ပြောကြားချက်အရ သိရပါတယ်။ ဒါကြောင့် အရေးပေါ်အခြေအနေမှာ တပ်ချုပ်က ဦးဆောင်မှာကို လက်ခံတဲ့ အန်အယ်ဒီအမတ်တွေ ရှိကောင်း ရှိနေပြီလားလို့ မေးစရာ ဖြစ်လာပါတယ်။
ရှမ်းတိုင်းရင်းသားများ ဒီမိုကရေစီအဖွဲ့ချုပ်က လွှတ်တော်ကိုယ်စားလှယ် ဦးစိုင်းသီဟကျော်ကတော့ ပုဒ်မ ၄၀ (ဂ)မှာ အမျိုးသား ဒီမိုကရေစီအဖွဲ့ချုပ် ကိုယ်စားလှယ် တွေရဲ့ မဲအပြည့်မရခဲ့တာဟာ အဲဒီ ပြင်ဆင်ချက်က လက်တွေ့မဆန်လို့ အမျိုးသား ဒီမိုကရေစီအဖွဲ့ချုပ် ကိုယ်စားလှယ်တွေကမဲမရတာ ဖြစ်နိုင်တယ်လို့ သူ့အမြင်ကို ပြောပါတယ်။
"အရေးပေါ်အခြေအနေ မှာဆိုရင် လွှတ်တော်ခေါ်ဖို့က မလွယ်ဘူးလေ၊ သူက ဦးဆောင်ပြီး သမ္မတကို တာဝန်ပေးဖို့က လက်တွေ့မှာ မလွယ်ဘူး"လို့ လည်း သူက ရှင်းပြပါတယ်။
အဲဒီအချက် အပါအဝင်၂၀၀၈ အခြခံဥပေဒ ပြင်ဆင်ရေးအတွက် ပထမနေ့ မဲခွဲမှုမှာ တပ်မတော်နဲ့ ပတ်သက်တဲ့ ပြင်ဆင်ချက် တွေ အတွက် လိုအပ်တဲ့ ထောက်ခံမဲ ၇၅ ရာခိုင်နှုန်း အထက် မရခဲ့ပါဘူး။
ပြည်ထောင်စုလွှတ်တော်မှာ လွှတ်တော်ကိုယ်စားလှယ် ၆၅၄ ဦးရဲ့ ၇၅ ရာခိုင်နှုန်းကျော်ကို တွက်ကြည့်လိုက်ရင် လွှတ်တော်အမတ် ၄၉၁ ဦးကျော် (၄၉၂) ဦးဖြစ်ပါတယ်။
အဲဒီထဲမှာ ရွေးကောက်ခံ လွှတ်တော်အမတ်က စုစုပေါင်း ၄၈၈ ဦးရှိပြီး တပ်မတော် ကာကွယ်ရေးဦးစီးချုပ်က အမည်စာရင်း တင်သွင်းတဲ့ တပ်မတော်သား လွှတ်တော်ကိုယ်စားလှယ် ၁၆၆ ဦး ရှိပါတယ်။ ရွေးကောက်ခံ အမတ် ၄၈၈ ဦးထဲမှာ အန်အယ်လ်ဒီက အမတ်ဦးရေ စုစုပေါင်း ၃၉၀ ခန့်ရှိပြီး အဓိက အင်အားစု အမတ်အရေအတွက်ကို ရထားပါတယ်။
မတ်လ ၁၀ရက်နေ့က ပြည်ထောင်စုလွှတ်တော်မှာ ဖွဲ့စည်းပုံ အခြေခံဥပဒေ ပုဒ်မ ၄၃၆ (က) နဲ့ ပြင်ရမယ့် ပုဒ်မ၊ ပုဒ်မခွဲ ၁၄ ခုကို ပြင်ဆင်ခြင်း လွှတ်တော် အဆုံးအဖြတ် ရယူရာမှာ ပုဒ်မ ၁၄ ခုမှာ ၃၂ (က)နဲ့(ခ) ပုဒ်မ ၂ ခုသာ ပြင်ဆင်နိုင်မယ့် အရေအတွက် ၇၅ ရာခိုင်နှုန်းကျော် ဖြစ်တဲ့ ထောက်ခံမဲ ၅၀၀ ကျော် ရခဲ့ပါတယ်။
ပုဒ်မ ၃၂ ၊ ပုဒ်မခွဲ(က)နဲ့ (ခ) မူလပြဋ္ဌာန်းချက်တွေထဲက အိုမင်းမစွမ်းသူများ ဆိုတဲ့နေရာမှာ သက်ကြီးရွယ်အိုများ ဆိုပြီး ပြင်ဆင်မှု၊ မသန်မစွမ်းဆိုတဲ့ နေရာတွေမှာ မသန်စွမ်း ဆိုပြီး ပြင်ဆင်မှုတွေ ပါဝင်တဲ့ နှစ်ချက်မှာတော့ အနိုင်ရခဲ့လို့ ပြင်ဆင်ရေး ဆက်လက် ဆောင်ရွက်သွားမှာ ဖြစ်ပါတယ်။
ကျန်တဲ့ ပုဒ်မတွေကတော့ ၇၅ ရာခိုင်နှုန်း မကျော်တာကြောင့် မူလအတိုင်း ထားရှိဖို့ ဒီနေ့ မတ်လ ၁၀ ရက်နေ့မှာ ဆုံးဖြတ်ခဲ့ပါတယ်။
ပြီးခဲ့တဲ့ ရက်ပိုင်းက ပြင်ဆင်တဲ့ ဥပဒေမူကြမ်း ၇ ခုကို စုစုပေါင်း လွှတ်တော်ကိုယ်စားလှယ် ၁၄၉ ဦး ဆွေးနွေးကြတဲ့ အထဲ ငြင်းခုံတာ၊ အပြန်အလှန် ကန့်ကွက်တာတွေလည်း သောသောညံခဲ့ပါတယ်။
အာဏာရပါတီ နဲ့တပ်ကိုယ်စားလှယ်တွေရဲ့ ကန့်ကွက်မှုတွေက အများစု ဖြစ်ခဲ့ပါတယ်။
တပ်ကိုယ်စားလှယ် ၂၅ ရာခိုင်နှုန်း အလိုအလျောက် နေရာယူထားတဲ့ လွှတ်တော်မှာ သူတို့ ထောက်ခံမဲ မရဘဲ ၂၀၀၈ အခြခံဥပေဒ ပြင်ဖို့က သိပ်ကို ခဲယဉ်းလွန်းလှပါတယ်။
မတ်လ ၁၀ ရက်နေ့ မဲခွဲတဲ့ ပုဒ်မ ၁၄ ခုမှာ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီက ပြင်ဆင်ဖို့ တင်ပြတဲ့ ပုဒ်မ ၁ ခုပါပြီး ကျန်တဲ့ ပုဒ်မ ၁၃ ခုကတော့ အမျိုးသား ဒီမိုကရေစီအဖွဲ့ချုပ် ဦးဆောင်တဲ့ ၄၅ ဦးကော်မတီ က တင်သွင်းခဲ့တာတွေ ဖြစ်ပါတယ်။
မတ်လ ၁၀ ရက်နေ့ ပြင်ဆင်တဲ့ ပုဒ်မတွေထဲမှာ အမျိုးသား ဒီမိုကရေစီအဖွဲ့ချုပ် တင်သွင်းခဲ့တဲ့ အချက် ဖြစ်တဲ့ လွှတ်တော်မှာ တပ်ကိုယ်စားလှယ် ၂၅ ရာခိုင်နှုန်း လျှော့ဖို့ အချက် မအောင်မြင်ခဲ့သလို အရေးပေါ်အခြေအနေမှာ တပ်ချုပ်အစား သမ္မတက ဦးဆောင်ဖို့ ပြင်ဆင်ချက်လည်း အရေးနိမ့်ခဲ့ပါတယ်။
ပြည်ထောင်စုလွှတ်တော်မှာ ဖေဖော်ဝါရီ ၂၅ ရက်ကနေ မတ်လ ၅ ရက်အထိ ရုံးဖွင့်ရက် စုစုပေါင်း ၇ ရက်ကြာ ဆွေးနွေးခဲ့မှုတွေမှာ ငြင်းခုံတာ၊ အပြန်အလှန် ကန့်ကွက်တာတွေလည်း သောသောညံခဲ့ပေမယ့် အရေးပေါ် အခြေအနေမှာ တပ်ချုပ် ဦးဆောင်မှာကို အမျိုးသားဒီမိုကရေစီအဖွဲ့ချုပ် အန်အယ်ဒီအမတ်တွေက ထောက်ခံခဲ့ကြတာကတော့ ထူးခြားတဲ့ မဲရလဒ်လို့ ဆိုရမှာပါ။
ဒီလိုဖြစ်ရတာဟာ လျှို့ဝှက် မဲပေးစနစ်ကြောင့် အမျိုးသား ဒီမိုကရေစီအဖွဲ့ချုပ် ကိုယ်စားလှယ်တွေ လွတ်လွတ်လပ်လပ် မဲပေးနိုင်တဲ့အတွက် ဖြစ်တယ်လို့ ရှမ်းတိုင်းရင်းသားများ ဒီမိုကရေစီအဖွဲ့ချုပ်က လွှတ်တော် ကိုယ်စားလှယ် ဦးစိုင်းသီဟကျော်က ပြောပါတယ်။
