ထိုင်းနဲ့စင်ကာပူက ကိုရိုနာဗိုင်းရပ်စ် အဖြေတွေ တိကျသလား

ကိုရိုနာဗိုင်းရပ်စ် မရှိဘူးဆိုတဲ့ အဖြေတွေ ဓာတ်ခန်းခွဲတွေက မှားယွင်းထုတ်ပေးတာတွေ ရှိလာတဲ့အတွက် စိုးရိမ်မှုစရာ ဖြစ်လာပါတယ်။

နိုင်ငံတချို့မှာ ခြောက်ကြိမ်လောက် စစ်ပြီးတာတောင် ဗိုင်းရပ်စ်မရှိဘူးဆိုတဲ့ အဖြေထွက်လာပြီး နောက်ဆုံးမှာ ရှာတွေ့သွားတဲ့ အဖြစ်အပျက်တွေ ရှိခဲ့ပါတယ်။

အဲဒါကြောင့် တရုတ်က ကူးစက်မှု အမြင့်ဆုံး ဟူဘေး ပြည်နယ်မှာတော့ ဓာတ်ခွဲခန်းက အတည်ပြုတဲ့ အဖြေထက် ရောဂါ လက္ခဏာပြတဲ့သူတွေကို ကူးစက်သူလူစာရင်းမှာ စပြီး ထည့်သွင်းနေပါပြီ။

အဲဒီလို လုပ်လိုက်တဲ့အတွက် တစ်ရက်ထဲမှာတင် ကူးစက်သူ စာရင်းမှာ လူ တစ်သောင်းခွဲ နီးပါး ထပ်တိုးသွားခဲ့ပါတယ်။ အဲဒါဟာ လက်ရှိ ကူးစက်သူ စာရင်းရဲ့ လေးပုံတစ်ပုံထိရှိတဲ့ ပမာဏ ဖြစ်ပါတယ်။

ဘာကို စမ်းသပ်တာလဲ၊ ဘယ်မှာ ပြဿနာရှိတာလဲ

စမ်းသပ်တယ်ဆိုတာက ဗိုင်းရပ်စ်ရဲ့ မျိုးဗီဇ သင်္ကေတကို ရှာဖွေတာ ဖြစ်ပါတယ်။

လူနာဆီက နမူနာ ပစ္စည်းကို ထုတ်ယူပါတယ်။ ပြီးတော့ ဓာတ်ခွဲခန်းကို ပို့ပါတယ်။ ပြီးတော့ လူနာမှာ ဗိုင်းရပ်စ်ရှိတယ်ဆိုရင် ခုန နမူနာကို တိုက်ဆိုင်စစ်ဆေးဖို့ လိုတဲ့ ပမာဏရအောင် ပွားထုတ်လိုက်ပါတယ်။

အဲဒီလို စစ်ဆေးတဲ့ RT-PCR နည်းတွေကို HIV နဲ့ တုပ်ကွေး ဗိုင်းရပ်စ် တွေ စစ်ဆေး ရှာဖွေ ဖော်ထုတ်ဖို့ ကျယ်ကျယ်ပြန့်ပြန့် သုံးပါတယ်။ အဲဒီနည်းတွေက ပုံမှန်အားဖြင့် အမှားအယွင်းနည်းပြီး တော်တော်လေး စိတ်ချယုံကြည်ရပါတယ်။

ဒါဆိုဘာမှားတာလဲ

Radiology ဂျာနယ်မှာ ဖော်ပြတဲ့ လေ့လာချက် တစ်ခုမှာ အခုလို ပြောထားပါတယ်။

အဆုတ်ကို စကင်ဖတ် ကြည့်လို့ ပြဿနာ ရှိနေတယ်ဆိုတာ ပြနေတာတောင် လူနာ ၁၆၇ ယောက် ထဲက ငါးယောက်မှာ ဗိုင်းရပ်စ် မရှိဘူးလို့ အဖြေထွက်ခဲ့ပါတယ်တဲ့။

နောက်ပိုင်းရက်တွေမှာ အဲဒီလူတွေကို ပြန်စစ်ကြည့်တဲ့အခါ ဗိုင်းရပ်စ် ကူးစက်ခံထားရတယ်လို့ အဖြေပြန်ထွက်လာပါတယ်တဲ့။

ပြီးတော့ အဲဒီလို အဖြစ်အပျက်မျိုး အများအပြား ရှိနေပါသေးတယ်။

အဲဒီထဲမှာ တရုတ်က ကိုရိုနာဗိုင်းရပ်စ်သစ်အကြောင်း စပြီး သတိပေးခဲ့တဲ့ သူရဲကောင်း အဖြစ်ချီးကျူးခံရသူ ဒေါက်တာ လီဝမ်လျန်းလည်း ပါပါတယ်။

သူနောက်ဆုံးမှာ ကုသမှု မခံရခင်အထိ အစောပိုင်းမှာ စစ်ခဲ့တဲ့ အကြိမ်တွေမှာ သူ့မှာ ဗိုင်းရပ်စ် မကူးဘူးလို့ အဖြေတွေ ထွက်ခဲ့တာလို့ သူက ပြောခဲ့ပါတယ်။

ဒါမျိုးအဖြစ်အပျက်တွေကို တရုတ် ဂျာနယ်လစ်တွေကလည်း ဖော်ထုတ်ခဲ့ပါတယ်။

အဲဒီမှာ တချို့လူတွေမှာ ခြောက်ကြိမ်အထိ စစ်ပြီးတာတောင် ဗိုင်းရပ်စ် မကူးစက်ဘူးလို့ အဖြေထွက်ခဲ့ပြီး ခုနစ်ကြိမ်မြောက်မှာမှ ကူးနေပြီလို့ အဖြေထွက်လာတဲ့ လူတွေအကြောင်း သူတို့က ဖော်ထုတ်ခဲ့တာပါ။

အဲဒါက တရုတ် တစ်နိုင်ငံတည်းမှာတော့ ဖြစ်တာမဟုတ်ပါဘူး။ ရောဂါ ကူးစက်မှုတွေ ရှိနေတဲ့ စင်ကာပူနဲ့ ထိုင်းနိုင်ငံမှာလည်း အလားတူ ဖြစ်နေပါတယ်။

အမေရိကန်က ကူးစက်ရောဂါ ထိန်းချုပ် ကာကွယ်ရေး စင်တာက ဒေါက်တာ နန်စီ မက်ဆွန်နီယာက တချို့ စစ်ဆေးမှုတွေက မရေမရာ အဖြေတွေ ထုတ်ပေးနေတယ်လို့ ပြောပါတယ်။

ဘာကြောင့် ဒီလို ဖြစ်တာလဲ

ဖြစ်နိုင်ခြေတစ်ခုက စစ်ဆေးမှုတွေကတော့ မှန်တယ်၊ ဒါပေမဲ့ စစ်ဆေးချိန်မှာ လူနာမှာ ဗိုင်းရပ်စ် မရှိတာ ဖြစ်နိုင်ပါတယ်။

တရုတ်မှာ ချောင်းဆိုး၊ ဖျားနာ တုပ်ကွေးရာသီမို့ လူနာတွေက အဲဒီ ရောဂါတွေနဲ့ ကိုရိုနာဗိုင်းရပ်စ်ကို ရောထွေးနိုင်ပါတယ်။

ကိုရိုနာဗိုင်းရပ်စ်ရဲ့ အစပိုင်း လက္ခဏာတွေက တခြား အသက်ရှုလမ်းကြောင်း ဗိုင်းရပ်စ်တွေရဲ့ လက္ခဏာတွေနဲ့ တော်တော်ဆင်တူတယ်လို့ လန်ဒန် King's College က ဒေါက်တာ မက်ဒါမော့က ပြောပါတယ်။

နောက်တစ်ခုကတော့ လူနာမှာတော့ ကူးစက်ကောင်း ကူးစက်ထားနိုင်တယ် ဒါပေမဲ့ စစ်ဆေးတွေ့ရှိဖို့ စောနေသေးတဲ့ အခြေအနေမျိုးမှာ ရှိနေသေးတာ ဖြစ်နိုင်ပါတယ်။

ဒါပေမဲ့ ခြောက်ကြိမ်လောက် စစ်ပြီးမှ တွေ့ရတယ်ဆိုတာတော့ သိပ်အဓိပ္ပာယ်မရှိဘူးလို့လည်း ဒေါက်တာ မက်ဒါမော့က ပြောပါတယ်။

နောက်တစ်မျိုးကကျတော့ စစ်တဲ့နည်းလမ်းမှာ ပြဿနာ ရှိနေနိုင်တာမျိုးပါ။

လည်ချောင်းထဲက တို့ဖတ်နမူနာစ ကိစ္စပါ။

အဲဒါကို ဘယ်လို ယူခဲ့သလဲ ဆိုတာနဲ့ ဆိုင်ပါမယ်။

အဲဒီ နမူနာကို မှန်မှန်ကန်ကန်ကန် စနစ်ကျ မသိမ်း၊ မကိုင်တွယ်ဘူးဆိုရင်လည်း အဖြေမှန် မရနိုင်ပါဘူး။

အဲဒီမှာ ပြောစရာရှိလာတာက ဆရာဝန်တွေက လူနာရဲ့ လည်ချောင်းရဲ့ နောက်ဘက်က တို့ဖတ်နမူနာစကို ယူတာ နေရာမှားနေသလားဆိုတာပါ။

အခုက နှာခေါင်းနဲ့ လည်ချောင်းထက် အဆုတ်မှာ ကူးစက်တာ ဖြစ်လို့ပါ။

ဒါပေမဲ့ လူနာက ချောင်းဆိုးလိုက်တဲ့အခါမှာတော့ ဗိုင်းရပ်စ်တချို့က စမ်းသပ်ဖို့ အပေါ်ကို ရောက်လာနိုင်ပါတယ်။

နောက်ဆုံး ဖြစ်နိုင်ခြေတစ်ခုကတော့ ကိုရိုနာဗိုင်းရပ်စ်ကို စစ်ဆေးတဲ့ RT-PCR နည်းတွေက အားနည်းချက်ရှိတဲ့ နည်းလမ်းတွေကို သုံးနေမိတာမျိုးပါ။

ဒီစမ်းသပ်မှုတွေ လုပ်နိုင်ဖို့အတွက် သုတေသန သမားတွေဟာ ဗိုင်းရပ်စ်ရဲ့ မျိုးဗီဇ သင်္ကေတ အပိုင်းအစ တစ်ခုကို ရယူရပါတယ်။

အဲဒါကို ပရိုင်မာ လို့ ခေါ်ပါတယ်။ အဲဒီ ရယူ စစ်ဆေးတဲ့နေရာမှာ လိုအပ်ချက်ရှိပြီး ဗိုင်းရပ်စ် မရှိဘူးလို့ အဖြေထွက်တာ ဖြစ်နိုင်ပါတယ်။

အခု အခြေအနေမှာတော့ ဘယ်နေရာတွေမှာ အမှားအယွင်း ရှိနေတယ်ဆိုတာ အတိအကျ မပြောနိုင်လို့ တခြားနိုင်ငံတွေက ဘယ်လို သင်ခန်းစာယူ လိုက်လုပ်သင့်တယ်ဆိုတာ ရှင်းရှင်းလင်းလင်း မသိရ ဖြစ်နေပါတယ်။

ဒါပေမဲ့ လူနာတွေမှာ ရောဂါ လက္ခဏာ ပြလာပြီဆိုရင် ထပ်ပြီး စစ်ဆေးရမယ်လို့ ဒေါက်တာ မက်ဒါမော့က ပြောပါတယ်။