ကိုရိုနာဗိုင်းရပ်စ် - အဖေဆေးရုံရောက်နေတုန်း မသန်စွမ်းကလေးသေဆုံး
ဓာတ်ပုံ ရင်းမြစ်, Weibo
အဖေက ကိုရိုနာဗိုင်းရပ်စ် သံသယနဲ့ ဆေးရုံမှာ သီးသန့်ခွဲထားခံရတုန်း အိမ်မှာစောင့်ရှောက်မယ့်သူမရှိဘဲ ကျန်နေတဲ့ ဆယ်ကျော်သက် မသန်စွမ်း သူငယ်နာအကြောတင်းရောဂါသည်ကလေး သေဆုံးသွားတဲ့အတွက် တာဝန်ရှိသူနှစ်ယောက်ကို ရာထူးက ထုတ်ပစ်လိုက်ပါတယ်။
သူ့အဖေနဲ့ အစ်ကိုတို့ ကိုရိုနာဗိုင်းရပ်စ် သံသယနဲ့ ဆေးရုံ ရောက်နေတာ တစ်ပတ်အကြာမှာ အသက် ၁၆ နှစ်အရွယ် ယန်ချန်းဆိုတဲ့ ယောက်ျားလေး အိမ်မှာ တစ်ယောက်တည်း သေဆုံးနေတာကို ပြီးခဲ့တဲ့ ရက်ပိုင်းက တွေ့ခဲ့ရတာပါ။
သူအိမ်မှာ ကျန်နေခဲ့စဉ်မှာ နှစ်ခါပဲ အစာစားခဲ့ရတယ်လို့ သတင်းတွေက ဆိုပါတယ်။
အခုလို သူသေဆုံးခဲ့တဲ့အတွက် ဟွေ့ကျားဟော်မြို့ ကွန်မြူနစ်ပါတီ အတွင်းရေးမှူးနဲ့ မြို့အုပ်ချုပ်ရေးမှူးတို့ကို ရာထူးက ထုတ်ပစ်လိုက်တာ ဖြစ်ပါတယ်။
ယန်ချန်းရဲ့ အကြောင်းဟာ ဆိုရှယ်မီဒီယာနဲ့ အွန်လိုင်းစာမျက်နှာတွေမှာ လူအများစိတ်ဝင်စားတဲ့ အကြောင်းအရာ ဖြစ်နေခဲ့တာပါ။
သူတို့မိသားစုဟာ ကိုရိုနာဗိုင်းရပ်စ် ကူးစက်မှုအမြင့်ဆုံးဖြစ်တဲ့ ဟူပေးပြည်နယ်မှာ နေထိုင်တာ ဖြစ်ပါတယ်။
ဆေးရုံရောက်နေတဲ့ သူ့အဖေက အိမ်မှာ သူ့သားတစ်ယောက်တည်း စားသောက်စရာနဲ့ ရေမရှိဘဲ တစ်ယောက်တည်း ကျန်နေခဲ့လို့ ကူညီကြဖို့ တရုတ်ဆိုရှယ်မီဒီယာ ဝေဘိုကနေ အကူအညီတောင်းတဲ့ ပို့စ်တင်ခဲ့တာပါ။
အခုလို တာဝန်ရှိသူတွေကို ရာထူးက ထုတ်ပစ်တာ မလုပ်ခင်က ယန်ချန်းသေဆုံးခဲ့တဲ့အတွက် စုံစမ်းစစ်ဆေးမှုတွေလုပ်မယ်လို့ အာဏာပိုင်တွေက ကြေညာခဲ့ပါတယ်။
ကိုရိုနာဗိုင်းရပ်စ် ကူးစက်မှုကြောင့် တရုတ်မှာ သေဆုံးသူ ၄၂၅ ဦး ရှိပြီး ကူးစက်မှု နှစ်သောင်းကျော်ရှိလာပါပြီ။ ဒါ့အပြင် တခြားနိုင်ငံ ၂၅ နိုင်ငံလောက်ကိုလည်း ရောဂါ ကူးစက်ထားပြီ ဖြစ်ပါတယ်။
ကမ္ဘာ့ကျန်းမာရေးအဖွဲ့ WHO ကလည်း ကိုရိုနာဗိုင်းရပ်စ် ကူးစက်မှုကို အပြည်ပြည်ဆိုင်ရာ ကျန်းမာရေး အရေးပေါ် အခြေအနေလို့ ကြေညာထားပြီး ကူးစက်မှုတွေ ပိုတိုးလာဖွယ်ရှိတယ်လို့ သတိပေးထားပါတယ်။
တရုတ် အာဏာပိုင်တွေကတော့ ရောဂါပြန့်ပွားမှုကို တားဆီးနိုင်မယ့် နည်းလမ်းတွေကို ဆောင်ရွက်နေပါတယ်။
