တရုတ်မှာတွေ့တဲ့ ဗိုင်းရပ်စ်အသစ်ကြောင့်သေဆုံးသူ ၉ဦးရှိလာ၊ သန္ဓေပြောင်းလဲပြီး ကူးစက်နိုင်ကြောင်း သတိပေး

တရုတ်နိုင်ငံမှာဖြစ်ပွားနေတဲ့ ဗိုင်းရပ်စ်အသစ်တစ်မျိုးဟာ သန္ဓေပြောင်းလဲနိုင်ပြီး ကူးစက်နိုင်ကြောင်း ကျန်းမာရေးဝန်ကြီးဌာန တာဝန်ရှိသူတွေက သတိပေးပြောကြားလိုက်ပါတယ်။

လောလောဆယ်မှာဆိုရင် ရောဂါကူးစက်ခံထားရသူ ၄၄၀ ရှိနေပြီး အဲဒီအထဲက လူ ၉ ဦး သေဆုံး သွားခဲ့ပြီလို့လည်း ဆိုပါတယ်။

အမျိုးသားကျန်းမာရေးကော်မရှင်အနေနဲ့ ဗိုင်းရပ်စ်ပိုးကို ထိန်းချုပ်နိုင်ဖို့၊ ပြီးတော့ ကာကွယ်ကုသရေးလုပ်ငန်းတွေ လုပ်ဆောင်နိုင်ဖို့ အရေးကြီးတဲ့အဆင့်ကို ရောက်နေပြီလို့လည်း ကျန်းမာရေးဌာနတာဝန် ရှိသူတွေက ပြောကြပါတယ်။

အဆိုပါ ဗိုင်းရပ်စ်ဟာ လူ လူချင်း ကူးစက်နိုင်ကြောင်းကို ကျန်းမာရေးဌာန တာဝန်ရှိသူတွေက မနေ့က ထုတ်ပြန်ခဲ့တာပါ။

ဗိုင်းရပ်စ်ကူးစက်မှုတွေ ကျယ်ကျယ်ပြန့်ပြန် ဖြစ်ပေါ်လာပြီးနောက်ပိုင်းမှာလုပ်တဲ့ သတင်းစာ ရှင်းလင်းပွဲမှာ၊ အမျိုးသားကျန်းမာရေးကော်မရှင်ရဲ့ ဒုတိယဥက္ကဋ္ဌဖြစ်သူ လီဘင်း က

''ဒီဗိုင်းရပ်စ်ဟာ အသက်ရှု လမ်းကြောင်းကနေ တဆင့်ကူးစက်တယ်ဆိုတဲ့ သက်သေအထောက်အထားတွေ ရထား တယ်'' လို့ ပြောဆို ခဲ့ပါတယ်။

ဒီဗိုင်းရပ်စ် ဘယ်လို စတင်ပေါ်ပေါက်လာသလဲဆိုတဲ့ ရင်းမြစ်ကိုတော့ တရုတ်တာဝန်ရှိသူတွေ အနေနဲ့ မသိရှိသေး ပါဘူး။

ဗိုင်းရပ်စ် ပိုး စတင် ပေါ်ပေါက်လာပုံနဲ့ ကူးစက်ပုံတွေကို နားလည် နိုင် လေ့လာနေဆဲပါ။ သန္ဓေပြောင်းပြီး ကူးစက် နိုင်တယ်ဆိုတာ ကို သိထားပြီးပါပြီ။ ပျံ့ပွားပြီး ကပ်ရောဂါအခြေအနေအဖြစ် ပြောင်းလဲနိုင်တယ်လို့လည်း အမျိုးသား ကျန်းမာရေး ကော်မရှင် ဒုတိယ ဥက္ကဋ္ဌ လီဘင်း က ပြောဆို ထားပါတယ်။

တရုတ် နိုင်ငံမှာ နှစ်သစ်ကူး ကာလ ခရီးအသွားအလာတွေလည်း များပြားနေပြီး၊ နိုင်ငံပြင်ပကို သွားရောက်မှုတွေ ရှိနေချိန်မှာ ကျန်းမာရေးဌာန တာဝန်ရှိသူတွေအနေနဲ့ အခုလို သတိပေးချက်တွေ ထုတ်ပြန်လာတာလည်း ဖြစ်ပါတယ်။

ဒီလို ခရီးသွားတွေများတဲ့ ကာလမှာ ဗိုင်းရပ်စ်ကူးစက်မှု များပြားနိုင်တဲ့ အတွက် စိုးရိမ်စရာ အခြေအနေ တစ်ရပ် ဖြစ်တယ်လို့လည်း တာဝန်ရှိသူတွေက ပြောပါတယ်။

ရောဂါ ကာကွယ်ရေးအတွက် တင်းကျပ်တဲ့ စည်းမျဉ်းတွေ ထုတ်ပြန်သွားဖို့ရှိပြီး၊ ဗိုင်းရပ်စ် စတင် ပေါ်ပေါက် ခဲ့တဲ့ ဝူဟန်ဒေသက လူတွေအနေ ခရီးသွားလာတာ ကို ရှောင်ကြဉ် ကြဖို့နဲ့ လူ အများအပြား ရှိတဲ့ နေရာတွေကို တတ်နိုင်သမျှ မသွားဖို့ တောင်းဆိုထားပါတယ်။

ဒါ့အပြင် ကြက်၊ ဝက် အသား ရောင်းချမှုတွေနဲ့ တောရိုင်း တိရစ္ဆာန် ရောင်းချမှုတွေကိုလည်း မလုပ်ကြဖို့ တာဝန် ရှိသူတွေက တားမြစ်နေပါတယ်။