လယ်သမားသပိတ် တိုက်ပွဲဝင် ‌‌ဘောလိဝုဒ် မင်းသမီး

ထင်ရှားကျော်ကြားတဲ့သူတွေက ဆန္ဒပြတဲ့သူတွေကို ထောက်ခံအားပေးတာတွေကို မကြာခဏ ကြားဖူးကြပါလိမ့်မယ်။

ဒါပေမဲ့ အခုပြောပြမယ့်အကြောင်းက သူ့ရဲ့ ရုပ်ရှင်မင်းသမီး ဘဝကို စွန့်လွှတ်ပြီး လယ်သမားတွေနဲ့ အတူသပိတ်တိုက်ပွဲဝင်နေတဲ့ အိန္ဒိယအမျိုးသမီး ဘောလိဝုဒ်မင်းသမီး တစ်ယောက်အကြောင်းဖြစ်ပါတယ်။

"ဒီလထဲ ကျွန်မနဲ့ ရိုက်ဖို့လုပ်ထားတဲ့ရုပ်ရှင် မရိုက်တော့ဘဲ ပြန်ရုပ်သိမ်းသွားတယ်" လို့ ဆိုနီယာမန်းက ဘီဘီစီ Outlook ရေဒီယိုအစီအစဥ်မှာ ပြောခဲ့ပါတယ်။

ဆိုနီယာဟာ ၂၀၁၂ခုနှစ် ကစပြီး ရုပ်ရှင်သရုပ်ဆောင် အလုပ်ကို လုပ်ခဲ့တဲ့သူတစ်ယောက် ဖြစ်ပြီး အခုချိန်ထိ ဆိုရင် အိန္ဒိယနိုင်ငံတွင်းက ဘာသာစကားမျိုးစုံနဲ့ ဖေါ်ပြတဲ့ ရုပ်ရှင်ကား ၂၀ကျော်လည်း ရိုက်ကူထားပြီးပါပြီ။

လတ်တလော သူပါဝင်သရုပ်ဆောင်ထားတဲ့ ရုပ်ရှင်ကတော့ ၂၀၂၀မှာရုံတင်ပြသခဲ့တဲ့ "Happy Hardy and Heer"ဖြစ်ပြီး အဲ့ဒီရုပ်ရှင်ထဲက ဇာတ်ဝင်ခန်းတစ်ချို့ကို လန်ဒန်နဲ့ စတော့တလန်မှာရိုက်ကူးထားပါတယ်။

ဘောလိဝုဒ်ရုပ်ရှင်ဟာ အိန္ဒိယနိုင်ငံ အတွက် ဘယ်လောက်အရေးပါတယ်ဆိုတာကို စကားလုံးနဲ့တောင်ရှင်းပြဖို့ ခက်ခဲ ပါတယ်။

အခုဆို ဆိုနီယာရဲ့ အနေအထားဟာ သူ့ဘဝအတွက် ကျော်ကြား မှု၊ချမ်းသာကြွယ်ဝမှုတွေအများကြီးပေးနိုင်တဲ့ ကမ္ဘာ့ အကြီးဆုံးရုပ်ရှင်လုပ်ငန်းကြီး ဘောလိဝုဒ်ထဲကို ပြန်ဝင်နိုင်ဖို့ တောင် မလွယ်တော့တဲ့ အနေအထား ဖြစ်နေပါပြီ။ ဒါပေမဲ့ အဲ့ဒီအတွက်လည်း ဆိုနီယာကတော့ နောင်တရ ဝမ်းနည်းပုံတော့မရပါဘူး။

ဘောလိဝုဒ်စူပါစတားတွေနဲ့ အတူရှိနေရတာထက် လယ်သမားသပိတ်မှာ ပါနေရတာက သူ့အတွက် ပျော်ရွှင်မှု ၊ကျေနပ်မှုတွေပိုရစေတယ်လို့တောင် ဆိုနီယာကပြောပါတယ်။

သူတို့ကို ဆန့်ကျင်တဲ့ကိစ္စတွေမှာ ရုပ်ရှင်လောက သားတွေပါဝင်ပတ်သက်မှုတွေနဲ့ပတ်သက်လို့ လည်း အိန္ဒိယအစိုးရဘက်က လက်မခံတဲ့ အနေအထားကိုလည်း ရှင်းရှင်းလင်းလင်းမြင်နေရပါတယ်။

အရင်တုန်းက လည်း အစိုးရကို ဝေဖန်တိုက်ခိုက်တဲ့ ရုပ်ရှင်သရုပ်ဆောင်တွေ ရုပ်ရှင်အလုပ်နဲ့ ဆက်အသက်မွေးဖို့ အခက်တွေ့တာတွေနဲ့ ရင်ဆိုင်ခဲ့ရတာတွေရှိပါတယ်။

သူ လယ်သမားသပိတ်မှာဝင်ပါနေတာဟာ သူ့ရဲ့ ရုပ်ရှင်သရုပ်ဆောင်ဘဝကို ထိခိုက်စေနိုင်ဆိုတာကို ဆိုနီယာကလည်း သိပြီးသားပါ။ ပြီးတော့ အစိုးရကိုဆန့်ကျင်တိုက်ခိုက်တာတွေ ထုတ်မပြောဖို့လည်း သတိပေးခံခဲ့ ရတာတွေရှိပါတယ်။ ဒါပေမဲ့ ဒီအခြေအနေကြားကပဲ ဆိုနီယာဟာ သူလုပ်ချင်တာကို ဆက်လုပ်ခဲ့ပါတယ်။

လယ်သမားတွေရဲ့ စိုးရိမ်မှု

အိန္ဒိယအစိုးရက ချမှတ်ခဲ့တဲ့ ဥပဒေအသစ်၃ခုကို ဆန့်ကျင် ပြောင်းလဲဖို့အတွက် ပြီးခဲ့တဲ့ စက်တင် ဘာလကတည်းက ပြည်နယ်ပေါင်းစုံက လယ်သမားတွေ ‌ဒေလီမြို့ အပြင်ဘက်မှာ စုရုံး ဆန္ဒပြနေကြပါတယ်။

ဒီလယ်ယာဥပဒေတွေကို လယ်သမားတွေဝင်ငွေတိုးလာစေအောင်ဆိုတဲ့ ဝန်ကြီးချုပ် နာရန်ဒါမိုဒီနဲ့ သူ့ရဲ့ ဘာရာတီယာဂျန်တာပါတီ ဦးဆောင်တဲ့ အစိုးရကချမှတ်ပေးခဲ့တာလို့သိရပါတယ်။

ဒါပေမဲ့ တကယ်တော့ ဒီဥပဒေတွေဟာ အစိုးရထင်သလိုဖြစ်မလာဘဲ ကုမ္ပဏီကြီးတွေကို စျေးကွက် ထိန်းချုပ်နိုင်တဲ့ လုပ်ပိုင်ခွင့် ပိုပေးလိုက်သလိုဖြစ်သွားတယ်လို့ လယ်သမားတွေက ပြောနေကြပါတယ်။

"အိန္ဒယက လယ်သမားတွေ အကြွေးနွံ့နစ်နေကြတယ်ဆိုတာ ကျွန်မသိတယ်။ အစိုးရဆီကအထောက်အပံ့ အမတော်ငွေတွေလည်း အများကြီးရတာမဟုတ်ဘူး ။ ပြောင်း တစ်ရာကီလိုဂရမ်ကို အနိမ့်ဆုံးစျေး ရူပီ၁၈၀၀ နဲ့ညီတဲ့ ၂၅ဒေါ်လာရရမယ်လို့ အစိုးရကပြောပါတယ်။ ဒါပေမဲ့ လယ်သမားတွေ တကယ်ရနေတာက ရူပီးကိုးရာနဲ့ ညီမျှတဲ့ ၁၂ဒေါ်လာ ခွဲနီးပါးကနေ ရူပီးတစ်ထောင်နဲ့ညီမျှတဲ့ ၁၃ဒေါ်လာခွဲကျော်ကျော်ပဲရှိတယ်။" လို့ ဆိုနီယာက ရှင်းပြ ပါတယ်။

ဥပဒေသစ်တွေကြောင့် အစိုးရကချမှတ်ထားတဲ့ အနိမ့်ဆုံးစျေးတွေ ပျက်သွားပြီး စီးပွားရေး အဖွဲ့အစည်းတွေအတွက် အကျိုးအမြတ်ပိုရသွားမှာကို လယ်သမားတွေက စိုးရိမ်နေပေမဲ့ အစိုးရဘက်ကတော့ ဂျုံ၊ကြံ၊ ဆီထွက်သီးနှံတွေနဲ့ အခြားလယ်ယာထွက်ကုန်တွေရဲ့ စျေးနှုန်းတွေကို ထိန်းညှိထားပါတယ် လို့ပြောနေပါတယ်။

ပုံကန်မှုဖြစ်စေရန်လှုံ့ဆော်တယ်လို့ဆို

အစိုးရက လယ်သမားသပိတ်ကို ဖြိုခွင်းခဲ့ပြီး ဆန္ဒပြသူတွေအနေနဲ့ လည်း ပုန်ကန်မှုဖြစ်စေရန်လှုံဆော်သူတွေ နိုင်ငံတော်အကြည်ညိုပျက်အောင်လုပ်တဲ့သူတွေလို့ တံဆိပ်ကပ်ခံခဲ့ရပါတယ်။

အစိုးရအရာရှိကြီးတွေဘက်ကလည်း ဆန္ဒပြသူတွေကို ၁၉၈၀ကျော်က လှုပ်ရှားခဲ့တဲ့ ဆစ်ခ်ခွဲထွက်ရေး လှုပ်ရှားသူတွေနဲ့တူတယ်လို့တောင် ရည်ညွှန်း ပြောဆိုခဲ့တာတွေ လည်းရှိပါတယ်။

တကယ်တော့ ရဲတပ်ဖွဲ့နဲ့ထိပ်တိုက်ရင်ဆိုင်မှုမျိုးတွေရှိခဲ့တာတောင် လယ်သမားသပိတ်ကလူတွေက ငြိမ်းငြိမ်းချမ်းချမ်း ရင်ဆိုင်ခဲ့ကြတာပါ။

သူဟာ ဥပဒေကိုလိုက်နာပြီး ထိပ်တိုက်ရင်ဆိုင်မှုတွေ ရှောင်ကွင်းခဲ့ပါတယ်လို့ ဆိုနီယာကလည်း ပြောပါတယ်။

ဆိုရှယ်မီဒီယာက တိုက်ခိုက်မှုတွေကို ရင်ဆိုင်ရင်း

ပြီးတော့ ဆိုနီယာဟာလည်း ဆန္ဒပြပွဲတွေကို ဆန့်ကျင်နေတဲ့ သူတွေရဲ့ အကြီးအကျယ်ပစ်မှတ် တစ်ခု ဖြစ်နေပါတယ်။

"ကျွန်မရုပ်ရှင်ထဲပါတဲ့ ဘစ်ကနီဝတ်ထားတဲ့ပုံ ကိုကိုင်ပြီး ကျွန်မက ယုံကြည်စိတ်ချရတဲ့သူ မဟုတ်ဘူး။ ဒီလိုမလုံမလဲဝတ်ထားတဲ့ မိန်းမတစ်ယောက်က လယ်သမားတွေကို ကိုယ်စားပြုတယ်ဆိုတာကော ဖြစ်နိုင်ပါ့မလား ဆိုပြီး အစိုးရထောက် ခံသူတစ်ချို့က ကျွန်မကို မေးခွန်းထုတ်ကြပါတယ်။

ဒါပေမဲ့ ဆိုနီယာ ဒီလိုလူမှုကွန်ရက်ပေါ်ကတိုက်ခိုက်မှုတွေက လယ်သမား‌တွေဆီကရ တဲ့ ထောက်ခံမှုတွေကို သုံးပြီး ရင်ဆိုင်ကျော်လွှားခဲ့ရပါတယ်။

"လူကြီးတွေအများစုက ကျွန်မကို သူတို့သမီးလိုဆက်ဆံကြတယ်။ သူတို့မျက်ဝန်းတွေထဲက နာကျင်မှုတွေကိုလည်း ကျွန်မတွေ့ နေရတယ်။ ကျွန်မကို သူတို့ယုံကြတော့ သူတို့ကိုပစ် မထားခဲ့နိုင်ဘူး"လို့ ဆိုနီယာ ကပြော ပါတယ်။

ထောင်နဲ့ချီတဲ့လယ်သမား ဆန္ဒပြသူတွေဟာ ဒေလီမြို့နားက လမ်းဘေးတစ်နေရာမှာ သပိတ်စခန်းဖွဲ့ခဲ့ကြပြီး အဲ့ဒီမှာ စခန်းချကြပါတယ်။ ဇန်နဝါရီထဲ ရောက်လာတော့ ရာသီဥတုက ပြောင်းလာပြီး အရမ်းလည်း အေးလာပါတယ်။

"ကျန်းမာရေးနဲ့ သိပ်မညီညွတ်တော့ နေထိုင်ရတာခက်လာ တယ်။ ဘာလို့ဟော်တယ်မှာမနေတာလဲလို့ တစ်ချို့ လူတွေကလာမေးကြတယ်။ ဘာလို့ဟော်တယ်မှာ နေရမှာလဲလို့ ပဲကျွန်မ ပြန်ဖြေလိုက်တယ်။"

အမျိုးသမီးတွေ အတွက် တဲတွေဖန်တီးပေး

အခုတော့ အစိုးရမဟုတ်တဲ့ ပရဟိတအဖွဲ့အချို့ကလူတွေလာပြီး သန့်စင်ခန်းနဲ့ အိမ်သာတွေ ဖန်တီးပေးကြပါတယ်။ ဆိုနီယာကလည်း သူအိပ်တာ၊စားတာတွေကို ယာယီတဲတွေမှာပဲနေပြီးလုပ်ပါတယ်။

သူများတွေလိုပဲ ချက်ပြုတ်တာနဲ့ သန့်ရှင်းရေးတွေ လုပ်ပါတယ်။ ပြီး‌တော့ သူတတ်နိုင်သလောက်လည်း အဲ့ဒီကအခြေအနေ ပို ကောင်းလာအောင် လုပ်ပေးခဲ့ပါတယ်။

ပြီးတော့ သူ့အနေနဲ့ အမျိုးသမီးတွေအနေနဲ့လည်း ဒီဆန္ဒပြပွဲမှာ ပါဝင်သင့်တယ်လို့ယူဆတဲ့ အတွက် အမျိုးသမီး ၂၅၀၀နေဖို့ တဲတွေပါ ဆောက်ပေးခဲ့ပါတယ်။ "သူတို့နေဖို့ တဲတွေ၊ သူတို့စားဖို့နဲ့ သူတို့ခြုံဖို့စောင်တွေရအောင် ကျွန်မဖန်တီး ပေးခဲ့ပါတယ်။အခုတော့ နွေရာသီရောက်လာလို့ သူတို့ပျော်အောင်အတွက်ပဲ ဖန်တီး ပေးရ တော့မယ်။ "

အိပ်မက်တွေပြိုကွဲ

ဆိုနီဟာ သူ့စိတ်ကို ဆန္ဒပြပွဲထဲမှာပဲ နှစ်မြုပ်ထားပြီးတော့ လယ်သမားတွေဆီက ထောက်ခံမှုရဖို့ အတွက်ပဲ အပြင်ထွက်ပြီး စကားပြောပါတယ်။ ဒါပေမဲ့ တစ်ချိန်တည်းမှာပဲ သူဆုံးရှုံးခဲ့ရတာတွေ အတွက်လည်း ပြန်စဉ်းစားမိပါတယ်။

တကယ်တော့ ဆိုနီယာဟာ ရီသစ်ရိုရှန်တို့လို အဓိကသရုပ်ဆောင် တစ်ယောက်ဖြစ်ပြီး ထိပ်တန်းအမျိုးသမီး သရုပ်ဆောင်တစ်ယောက်ဖြစ်လာဖို့လည်း ရည်မှန်းထားပါတယ်။

ကျွန်မအိပ်မက်က ရှာရွတ်ခန်းနဲ့ တွဲသရုပ်ဆောင်ချင် တာလို့ သူကပြောပါတယ်။

ဒါပေမဲ့ ဒီလိုမျိုးအခြေအန မရောက်လာတော့ဘူးဆိုတာ သူသိနေပါတယ်။

ကျွန်မက လယ်သမားမျိုးရိုး

ဆိုနီယာဟာ အမ်ရစ်ဆာ မြို့မှာကြီးလာတဲ့သူဖြစ်ပြီး သတင်းနည်းပညာဘာသာရပ်နဲ့ ဘွဲ့ရထားတဲ့ သူလည်းဖြစ်ပါတယ်။ သူနေတဲ့ ပန်ဂျပ်ပြည်နယ်ကလည်း အိန္ဒိယရဲ့ ဂျုံခြင်းတောင်း လို့ လူသိများပါတယ်။ သူနေတဲ့နေရာက ဆစ်ခ်ဘာသာဝင်အများစု ဒီ ဆန္ဒပြပွဲတွေမှာထိပ်ဆုံးကပါတဲ့သူတွေဖြစ်ပါတယ်။

"ကျွန်မက လယ်သမားမိသားစုက လာတဲ့သူဖြစ်လို့ ကိုယ့်ကိုလည်း လယ်သမားတစ်ယောက်လို့ပဲ ခံယူပါတယ်။ ကျွန်မတို့ယာထဲမှာ သစ်တော်သီးတွေစိုက်တယ်"လို့သူကပြောပါတယ်။ ပြီးတော့ သူကိုယ်တိုင်ကလည်း ဆစ်ခ်ဘာသာဝင် တစ်ယောက်ဖြစ်ပါတယ်။ ရုရှင်ရိုက်ကွင်း မရှိတဲ့ရက်တွေ ဆိုရင်လည်း သူ့ပိုင်တဲ့ ၁၀ဧကခြံကြီးထဲမှာနေပြီး လယ်သမားတစ်ယောက်လို စိတ်ပျိုးတဲ့ အလုပ်ကို သွားလုပ်နေကြဖြစ်ပါတယ်။ ပြီးတော့ သူလမ်းပေါ်ထွက်ဆန္ဒပြဖို့ ဖြစ်လာတာက သူကိုးကွယ်တဲ့ဘာသာ၊ သူချစ်တဲ့ သစ်တော်သီးတွေနဲ့ တော့ မဆိုင်ပါဘူး။

လှုံ့ဆော် အားပေးမှု

တော်လှန်ရေးက သူ့သွေးထဲမှာရှိနေတာလို့ ဆိုနီယာကပြောပါတယ်၊၊ သူအသက်၁၆ရက်သားအရွယ် ၁၉၉၀ စက်တင်ဘာလထဲမှာ သူ့ကိုပထမဆုံးအကြိမ်တွေ့ဖို့ လာတဲ့ သူ့အဖေဟာ အမ်ရစ်ဆာမြို့ထဲမှာ အသတ်ခံ ခဲ့ရပါတယ်။

အဲ့ဒီအချိန်တုန်းက သူ့အဖေ ဘာလ်ဒက်ဗ်ဆင်းမန်းက မွေးကာစ ဆိုနီအတွက် စာကိုရေးပြီး ယူလာတာပါ။ အဲ့ဒီစာကပဲ သူ့ကိုရှေ့ဆောင်လမ်းပြဖြစ်စေခဲ့ပါတယ်။

"ချစ်တဲ့သမီးလေးရေ သမီးအနေနဲ့ အမှန်တရားတိုက်ပွဲကြီးမှာ ထိပ်ဆုံးက ဦးဆောင်ပါဝင်ရမယ်။ ဆစ်ခ်ဖြစ်ဖြစ် ဟိန္ဒူဖြစ်ဖြစ် မွတ်စလင်ဖြစ်ဖြစ် ကိုယ့်ဘာသာ ကိုယ့် လူမျိုး သီးသန့်အမှတ်အသားတွေထက် ပိုအရေးကြီးတဲ့ လူသားဖြစ်တည်မှု ကို လေးစားတန်ဖိုးထားရမယ်လို့ " သူ့အဖေက စာထဲမှာရေးခဲ့ပါတယ်။

ဒါပေမဲ့ အခုချိန်ထိတော့ အလုပ်သမားတွေ လယ်သမားတွေအတွက်တိုက်ပွဲဝင်ခဲ့တဲ့ ကွန်မြူနစ်တစ် ယောက်ဖြစ်တဲ့ သူ့အဖေကို သတ်တဲ့တရားခံကိုတော့ ဘယ်သူမှ တရားရုံးမတင်နိုင်ခဲ့ပါဘူး။

ဆိုနီယာက သူ့အတွက် သူ့အဖေရေးတဲ့စာကို သူ့တို့ ဘိုးဘွားအိမ်မှာ သိမ်းထားပြီး မိတ္တူ တစ်စောင်ကိုတော့ ကိုယ်နဲ့မကွာ အမြဲယူလာတတ်ပါတယ်။

ကျွန်မရဲ့ သူရဲကောင်း

သူ့အဖေက အမှန်နဲ့အမှားကို ရှင်းရှင်းလင်းမြင်တတ်သူလို့ ဆိုနီယာကပြောပါတယ်။ ပြီးတော့ ၂၀၁၉ခုနှစ်တုန်းက စာရေးဆရာတစ်ယောက်ရေးတဲ့ သူ့အဖေ အကြောင်းစာအုပ်မှာ အခုလို သူရေးခဲ့ပါတယ်။

"ချစ်လှစွာသော ဖေဖေ၊ ဖေဖေဟာ ကျွန်မရဲ့ပဲ့ကိုင်ရှင်၊ကျွန်မရဲ့ သူရဲကောင်းပါ၊ အဖေ့သမီးဖြစ်ရတာ ဘယ်လောက်ဂုဏ်ယူစရာကောင်းသလဲ၊ အဖေ့စာထဲမှာ ရေးထားသလို သမီးကို အဖေဖြစ်စေချင်တဲ့ ပုံစံမျိုးကြိုးစားပြီး အဖေဂုဏ်ယူရတဲ့သမီး ဖြစ်အောင်ကြိုးစားနိုင်မယ် လို့ မျှော်လင့်တဲ့ "အကြောင်း ဆိုနီယာကရေးပေး ခဲ့ပါတယ်။

ဘယ်လိုတိုက်ပွဲဝင်မယ်ဆိုတာ အစီစဥ်ဆွဲပြီးသား

လယ်သမားသပိတ်ကို နိုင်ငံတစ်လွှားကလူတွေက ထောက်ခံအားပေးပြီး စာနာမှုတွေလည်းပြခဲ့ကြပါတယ်။ သပိတ်ကို ဖြိုခွင်းတဲ့ ရဲတပ်ဖွဲ့ရဲ့ လုပ်ထုံးလုပ်နည်းတွေ ကိုလည်း ကနေဒါနဲ့ယူကေပါလီမန်တွေက ဝေဖန်ပြစ်တင် ခဲ့ကြပါတယ်။

ပြီးတော့ အစိုးရကိုယ်တိုင်ကလည်း အဲ့ဒီလယ်သမား ဥပဒေကို ဆက် မကျင့်သုံးဖို့ ၁၈ လ ရပ်ဆိုင်းခဲ့ရပြီး တွေ့ဆုံ ဆွေးနွေးရေးတွေ လုပ်ဖို့ အတွက်လည်း ကမ်းလှမ်းခဲ့ပါတယ်။လယ်သမားတွေကတော့ဒါကိုသဘောမကျဘဲ သူတို့တောင်းဆိုချက် အသေးစိတ်တွေကို ဆုပ်ကိုင်ရင်း ဆန္ဒပြတဲ့အရှိန်ကို ဆက်ထိန်းထားနေပါတယ်။

"ပန်ဂျပ်ပြည်နယ်ထဲမှာရှိတဲ့ ဟာရာနာ၊ ရာဂျာစသန်တို့လိုနေရာတွေက ရွာတိုင်း ရွာတိုင်းက လူ၂၀ကို တစ်အုပ်စု ကျွန်မတို့ သပိတ်နဲ့ ပူးပေါင်းဖို့ လွှတ်ပေးကြတယ်။ နောက်ရက်၂၀ပြီးရင် သူတို့ကို အခြားအဖွဲ့နဲ့ အစား ထိုးလိုက်တယ်။"

အခုလို လူတွေကို အလှည့်ကျဆန္ဒပြဖို့ လုပ်တာက သူတို့လိုချင်တာရဖို့ အတွက် ရေရှည်သပိတ်တိုက်ပွဲဆင်နွဲဖို့ ပြင်ဆင်တာလည်းဖြစ်ပါတယ်။ပြီးတော့ ဆန္ဒပြပွဲမပါတဲ့ အိမ်ကလူတွေလည်း အဲ့ဒီရွာက လူတွေက ဝိုင်းကျဥ်ကြတယ်လို့လည်း ဆိုနီယာကပြောပါတယ်။

"အစိုးရက ချမှတ်ထားတဲ့ လယ်သမားဥပဒေတွေ ပြန်မရုပ်မချင်း ဒီနေရာကနေ ဆက်ပြီး တိုက်ပွဲဝင်သွားမယ်"

လို့ သန္နိဌာန်ချထားတယ်ဆိုတာကိုလည်း ဆိုနီယာက ပြောပါတယ်။