Norma - အိမ်ထောင်ရေးဖောက်ပြန်ဇာတ်လမ်းတွေကို အာရှမှာ ဘာကြောင့်လူကြိုက်များတာလဲ

အိမ်ထောင်ဖက်ရဲ့ဖောက်ပြန်မှုနဲ့ သစ္စာမဲ့မှုကို ပုံ‌ဖော်ရိုက်ကူးထားတဲ့ ရုပ်ရှင်ဇာတ်လမ်းတွေ လူတွေကြားမှာ စိတ်ဝင်စားမှုတစ်ခုအဖြစ် ပြန်ပြီး ရေပန်းစားလာပါတယ်။

ယောက္ခမနဲ့ သားမက်တို့ လူမှုရေးဖောက်ပြန်တဲ့ဇာတ် နော်မာရုပ်ရှင်ကို နိုင်ငံတကာရုပ်ရှင်တွေကို လစဉ်ကြေးပေးပြီး အွန်လိုင်းကနေ ကြည့်နိုင်တဲ့ Netflix မှာတင်အခါ အင်ဒိုနီးရှား၊ မလေးရှားနဲ့ စင်္ကာပူစတဲ့နိုင်ငံတွေမှာ အတော်လေး အောင်မြင်ပါတယ်။

မြန်မာက ရုပ်ရှင်နှစ်သက်သူတွေလည်း လူမှုကွန်ရက်မှာ သူတို့ အတွေးအမြင်တွေကို မျှဝေ ပြောဆိုကြတဲ့အထိ ဒီဇာတ်ကားကို လူသိပါတယ်။

၂၀၂၂ ခုနှစ်နှောင်းပိုင်းလောက်မှာ နော်မာ ရစ္စမာ ဆိုတဲ့ အမျိုးသမီးတစ်ဦးက ခင်ပွန်းသည်ရဲ့သစ္စာဖောက်တာကို ခံခဲ့ရတဲ့အကြောင်း တစ်တော့(TikTok)လူမှုကွန်ရက်ပေါ်ကနေ ဖွင့်ချခဲ့ပြီးတဲ့နောက်မှာပဲ ဒီအကြောင်းကို အခြေခံပြီး ရုပ်ရှင်ရိုက်ကူးခဲ့တာဖြစ်ပါတယ်။

နော်မာရဲ့ ခင်ပွန်းသည်ဟာ နော်မာရဲ့အမေအရင်းဖြစ်သူနဲ့ ဖောက်ပြန်ခဲ့တာကြောင့် ထောင်ချခံရတဲ့အပြင် လူ့ပတ်ဝန်းကျင်အသိုင်းအဝိုင်းက ပေးတဲ့ လူမှုရေးပြစ်ဒဏ်တွေကိုပါ ကြုံနေရပြီလို့ နော်မာက ပြောပြခဲ့ပါတယ်။

ဒီဇာတ်လမ်းဟာ လူမှုရေးဖောက်လွဲဖောက်ပြန်မှုတွေကို လူမှုကွန်ရက်ကနေတဆင့် ဖွင့်ချကြတဲ့ဖြစ်ရပ်တွေထဲ နောက်ဆုံးဖြစ်ရပ်ဖြစ်ပါတယ်။ ဒီဇာတ်လမ်းလိုပဲ ရုပ်ရှင်အဖြစ် ဖန်တီးခဲ့တဲ့ ဇာတ်လမ်းအချို့လည်း ရှိပါတယ်။

Netflix ပေါ်က ဇာတ်ကားတွေထက် ကျော်လွန်တဲ့ ဇာတ်ကားနောက်ကြောင်း ဇာတ်ဝင်ခန်းတွေ၊ အကြောင်းအရာတွေနဲ့ အင်တာဗျူးတွေကို ဖော်ပြတဲ့ တူဒမ်(Tudum) ရဲ့ အချက်အလက်တွေအရ ဆိုရင် နော်မာ ရုပ်ရှင်ကို ၂၀၂၄ ခုနှစ်၊ သြဂုတ်မှာ ဖြန့်ချိတာဖြစ်ပါတယ်။

ဒီရုပ်ရှင်ဟာ အင်္ဂလိပ်စကားပြောမဟုတ်တဲ့ထိပ်တန်း ရုပ်ရှင် ၁၀ ကားစာရင်းထဲမှာ သီတင်းပတ် ၂ ပတ်ကြာအောင် ရပ်တည်နိုင်တဲ့အထိ လူကြိုက်များခဲ့ပါတယ်။

အဲဒီ ၂ ပတ်အတွင်း ဒီရုပ်ရှင်ကို ကြည့်ရှုမှု အကြိမ်ရေ ၂ သန်းခွဲကျော်အထိ ရှိခဲ့ပါတယ်။ ဒီပမာဏဟာ အင်ဒိုနီးရှားမှာ ဒီရုပ်ရှင်ရုံတွေမှာ ဒီရုပ်ရှင်ကို ရုံတင်ချိန်က ကြည့်တဲ့ပမာဏထက် စာရင် အတော်လေးကို များနေပါတယ်။

ဒီရုပ်ရှင်ကို ၂၀၂၅ ခုနှစ် မတ်လကုန်ပိုင်းမှာ အင်ဒိုနီးရှားက ရုပ်ရှင်ရုံတွေမှာ ပြသခဲ့တဲ့အချိန်တုန်းက ကြည့်ရှုသူ ၆ သိန်းကနေ တက်မလာခဲ့ပါဘူး။

ဒါပေမဲ့ ဒီနေရာမှာ ထွက်လာတဲ့ မေးခွန်းတစ်ခုရှိနေပါတယ်။ လူမှုရေးဖောက်ပြန်မှုအကြောင်း အခြေခံ ရိုက်ကူးထားတဲ့ ဒီ အင်ဒိုနီးရှား ရုပ်ရှင်ဟာ တခြားနိုင်ငံတွေမှာလည်း ဘာကြောင့် လူသိများတာလဲ ဆိုတဲ့ မေးခွန်းပါ။

အမျိုးသမီးချင်းမို့ ခံစားချက် ထပ်တူကျပြီး အချင်းချင်းဖေးမချင်စိတ်ကြောင့်လား။ ဒါမှမဟုတ် လူပြောများတဲ့အရှုပ်တော်ပုံတစ်ခုကို အတင်းအဖျင်းပြောရင်း ကိုယ့်ရဲ့ဒေါသကို ထွက်ပေါက်ပေးလိုက်ရုံ သက်သက်ကြောင့်လား။

နော်မာ ရုပ်ရှင်ကို ဘယ်လို ဖန်တီးခဲ့လဲ

ဒီဆောင်းပါးကို ထုတ်တဲ့အချိန်အထိ နော်မာဟာ သူ့အကြောင်း ရိုက်ထားတဲ့ရုပ်ရှင်နဲ့ပတ်သက်ပြီး မှတ်ချက်ပေးဖို့ ဆန္ဒမရှိခဲ့ပါဘူး။

ဘီဘီစီ အင်ဒိုနီးရှားဘာသာစကားဌာနရဲ့ လေ့လာချက်အရ နော်မာဟာ လက်ရှိမှာ အနောက်ဂျာဗားပြည်နယ်က ကုမ္ပဏီတစ်ခုမှာ ပြင်ပ ဝန်ထမ်းတစ်ဦးအဖြစ် လုပ်ကိုင်နေပါတယ်။ သူ့ မိခင် ရီဟားနားကတော့ ထောင်ဒဏ် ၈ လ ကျခံပြီးလို့ အပြင်ပြန်ရောက်နေပါပြီ။

ဒါပေမဲ့ ၂၀၂၅ ခုနှစ်၊ ဖေဖော်ဝါရီလမှာတော့ ရုပ်ရှင်နဲ့ပတ်သက်ပြီး သတင်းစာရှင်းလင်းပွဲ တစ်ခုကို နော်မာ ပြုလုပ်ပါတယ်။

အဲဒီလို လုပ်ချိန်မှာ နော်မာက အိမ်ထောင်ဖက်တွေရဲ့ ဖောက်ပြန်မှုကို ကြုံရတဲ့အမျိုးသမီးတွေ သူ့ကို လူမှုကွန်ရက်ကနေတဆင့် ရင်လာဖွင့်ကြပေမဲ့ လူသိရှင်ကြား ထုတ်ပြောဖို့ မရဲဝံ့ကြဘူးလို့ ပြောပါတယ်။

နော်မာကတော့ တခြားအမျိုးသမီးတွေလည်း သူ့လို အဖြစ်အပျက်မျိုးနဲ့ကြုံပြီး နာကျင်ရတာမျိုးမဖြစ်ရအောင် သူ့အကြောင်းကို ရုပ်ရှင်ပြန်ရိုက်ကူးဖို့ ဆုံးဖြတ်ချက်ချခဲ့တာပါ။

သူကြုံတွေ့ခဲ့ရတဲ့အတိုင်း တထေရာတည်း တီဗီဖန်သားပြင်ပေါ်မှာ ပြန်မြင်ရတဲ့အခါမှာလည်း ရင်ထဲက နာကျင်မှုနဲ့ စိတ်ဒဏ်ရာဟောင်းတွေ ပြန်ပေါ်လာခဲ့တယ်လို့ နော်မာက ဝန်ခံခဲ့ပါတယ်။

ဇာတ်လမ်း၊ ဇာတ်ကွက်တွေ အစီအစဉ်တကျဖန်တီးတဲ့နေရာမှာလည်း နော်မာက ပါဝင်ကူညီခဲ့တယ်လို့ ဒီရုပ်ရှင် ဇာတ်ညွှန်းရေးဆရာ အိုကာ အော်ယိုရာက ဘီဘီစီ အင်ဒိုနီးရှားသတင်းဌာနကို ပြောပါတယ်။

ဇာတ်ကြောင်းရေးသားနေချိန်တွေမှာလည်း နော်မာရဲ့ခံစားချက်တွေနဲ့ပတ်သက်လို့ အကြိတ်အနယ်ဆွေးနွေးတာ၊ တူးဆွဖော်ထုတ်တာတွေ လုပ်ခဲ့ရပြီး အတော်လေး အားစိုက်ခဲ့ရတယ်လို့ အိုကာက ဝန်ခံခဲ့ပါတယ်။

ဇာတ်ဆောင်ရွေးချယ်တဲ့နေရာမှာတောင် နော်မာနဲ့ ဇာတ်ညွှန်းဆရာတို့ ဆွေးနွေးခဲ့ကြပါတယ်။ အရေးကြီးဆုံးကတော့ သရုပ်ဆောင်ခဲ့တဲ့ နော်မာရဲ့အမေဖြစ်သူ နေရာမှာ သရုပ်ဆောင်မယ့် မင်းသမီး ဝူလန် ဂူတိုရီ ဇာတ်ရုပ်အတွက် ဇာတ်ကြောင်းနဲ့လည်း မသွေအောင်၊ လူသားဖြစ်တည်မှုကိုလည်း ထိန်းနိုင်အောင် ဘယ်လိုပုံဖော်မယ်ဆိုတာကိုလည်း အဓိက ဆွေးနွေးခဲ့တယ်လို့ ဆိုပါတယ်။

"ဇာတ်လမ်းရဲ့ပင်မဇာတ်ကြောင်း ပြတ်မကျန်ခဲ့အောင် လုပ်ရတာပေါ့။ ဒါပေမဲ့ ပရိသတ်ရဲ့ စိတ်ခံစားချက်ကိုလည်း ထည့်တွက်ပြီး တချို့နေရာတွေကို ခံစားချက် အနိမ့်အမြင့် အတက်အကျ ဖြစ်အောင် လုပ်ခဲ့ရတဲ့ဇာတ်ဝင်ခန်းတွေလည်း ရှိတယ်'' လို့ အိုကာက ပြောပါတယ်။

"အမေဖြစ်သူရဲ့ ဇာတ်ကွက်မှာ လှည့်ကွက်လေးတွေ ထည့်ခဲ့တယ်။ အမေက ဘာကြောင့် ဒီလိုဖောက်ပြန်ရလဲဆိုတဲ့ စိတ်ပိုင်းဆိုင်ရာ နောက်ခံအကြောင်းတရားလေးတွေပေါ့၊ ပြီးတော့ နော်မာရဲ့ခင်ပွန်းဖြစ်သူကလည်း စိတ်ပိုင်းဆိုင်ရာ ရောဂါတစ်ခု ခံစားနေရတဲ့အခြေအနေမျိုးနဲ့ ပုံဖော်ခဲ့တာလိုမျိုးပေါ့"

"ရုပ်ရှင်ကို ရုံတွေမှာ တင်တဲ့အချိန်တုန်းက မအောင်မြင်ခဲ့ဘူး။ ကြည့်ရတာ ပရိသတ်က သူတို့ကို ရုံထဲအထိ လာကြည့်ခိုင်းပြီး ကျူးလွန်သူကို သနားခိုင်းတာမျိုး ခံစားသွားရတာမျိုးကြောင့်ဖြစ်နိုင်တယ်'' လို အိုကာက ပြောပါတယ်။

သူ့ရဲ့အားထုတ်မှုတွေဟာ ဒီလောက်အထိ အောင်မြင်မှုရခဲ့လိမ့်မယ်လို့ အိုကာက မထင်ထားခဲ့ပေမယ့်လည်း Netflix ကနေ ပြသခဲ့ပြီးနောက်မှာပဲ နော်မာရုပ်ရှင်ဟာ အရှေ့တောင်အာရှတလွှားမှာ အောင်မြင်မှုတွေ တခဲနက်ရရှိခဲ့တာပါ။

သူ့အတွေ့အကြုံအရ အိမ်ထောင်ရေး ဖောက်ပြန်တဲ့ဇာတ်ကြောင်းပါတဲ့ရုပ်ရှင်တွေကို ရုံမှာလာကြည့်တဲ့သူတွေဟာ ပိတ်ကားထက်က မြင်ကွင်းကို ကြည့်ပြီး သူတို့ ဒေါသကို ထွက်ပေါက်ပေးတတ်ကြတာလို့ အိုကာက ပြောပါတယ်။

"သူတို့ကို ဆဲချင်တာ၊ ဖြစ်နိုင်မယ်ဆိုရင် ဖိနပ်နဲ့တောင် ပစ်ပေါက်လိုက်ချင်တာ။ တအားကိုစိတ်ဆိုးလို့ပါ။ ဒီလိုရုပ်ရှင်မျိုးကလည်း စိတ်ဆိုးလွယ်၊ ပျော်ရွှင်လွယ်တဲ့ သူတွေအတွက်တော့ ခံစားချက်တွေ ဖွင့်ထုတ်တဲ့ နည်းလမ်းတစ်ခုလိုဖြစ်နေတာကိုး။ ရုပ်ရှင်ရုံထဲက ထွက်သွားတာတောင်မှ ဒီရုပ်ရှင်နဲ့ ပတ်သက်ပြီး သူတို့ရင်ထဲမှာ စိတ်ခံစားမှုတွေ၊ ဇာတ်လမ်းအကြောင်းအရာတွေ ကျန်နေခဲ့ကြတာ။"

လူမှုရေးဖောက်ပြန်တဲ့ ရုပ်ရှင်တွေမှာ ဖောက်ပြန်တဲ့သူကို ခြေရာကောက် အမိဖမ်းတာ၊ ဖော်ထုတ်ပြီး ပြစ်တင်တာ ဒါမှမဟုတ် အိမ်ထောင်ဘက်က လက်ပူးလက်ကြပ်မိတာ ဒါမှမဟုတ် ပတ်ဝန်းကျင်က လူတွေပါ အကွက်ကျကျလှည့်ဖျားခံလိုက်ရတာ စတဲ့ ဇာတ်လမ်းဇာတ်ကွက်တွေနဲ့ ဖောက်ပြန်တဲ့ခံရတဲ့သူကို အသနားပိုလာအောင် ဖန်တီးတင်ဆက်လေ့ရှိပါတယ်။

နော်မာရုပ်ရှင်မှာတော့ ရွာသူ၊ ရွာသားတွေက ကျူးလွန်တဲ့သူရဲ့ အိမ်အထိရောက်လာပြီး ဖောက်ပြန်တဲ့သူကို ပြောဆိုကဲ့ရဲ့ကြပြီး အပြစ်တင်တဲ့ပုံစံနဲ့ တင်ဆက်ထားပါတယ်။

ဒီဇာတ်ကွက်ဟာ ရုပ်ရှင်ရုံမှာ သွားကြည့်ခဲ့တဲ့ အသက် ၄၂ နှစ်အရွယ် အိမ်ရှင်မဖြစ်တဲ့ ဗာရိုရဲ့ အမြင်နဲ့လည်း ထပ်တူကျပါတယ်။

နော်မာနဲ့ ရွာထဲက လူတွေက တံခါးကိုတွန်းပြီးဖွင့်တဲ့အချိန် မပွင့်ခဲ့ဘဲ အဲဒီနောက်မှာတော့ နော်မာနေရာမှာသရုပ်ဆောင်တဲ့ မင်းသမီး တစ်ဆာ ဘိုင်ယာနီက သူ့ခင်ပွန်းသည်နဲ့ အမေ အခန်းထဲမှာ ဖောက်ပြန်တာကို မြင်လိုက်ရတဲ့ ဇာတ်ဝင်ခန်းမှာတော့ ဗာရိုတစ်ယောက် မျက်ရည်တွေကျလာပြီး ခံစားချက်တွေ ပေါက်ကွဲခဲ့ပါတယ်။

ဗာရိုက လူမှုကွန်ရက်ကတဆင့် နော်မာရဲ့အဖြစ်အပျက်တွေကို နားစွင့်ခဲ့သူဖြစ်လို့ ဖြစ်စဉ်အတိအကျကို သိချင်ခဲ့တာကြောင့် ရုပ်ရှင်ကိုသွားကြည့်ဖို့ ဆုံးဖြတ်ခဲ့တာပါ။

"တစ်တော့ကနေ လူတွေက ဒီအကြောင်းပဲ ပြောနေတာ၊ ကျွန်မလည်း အကောင့်တွေကို လိုက်အပ်၊ နားစွင့်ခဲ့တယ်။ ကျွန်မ ခင်ပွန်းသည်နဲ့ ယောက္ခမကလည်း ဒီအပေါ်မှာ စိတ်တွေဆိုးခဲ့ကြတာ။ ဘယ်လိုတောင် လုပ်ရက်နိုင်တာလဲဆိုပြီးတော့ပေါ့။ ဒီအကြောင်းကို ရုပ်ရှင်ရိုက်မယ်ဆိုတာ သိလိုက်ရတော့ ဒီထဲက ဖောက်ပြန်တဲ့ ၂ ယောက်က နော်မာ့ကို ဘယ်လိုတောင် ရက်စက်ခဲ့ကြလဲဆိုတာကို သိချင်ခဲ့တာ" လို့ သူငယ်ချင်း ၄ ယောက်နဲ့ ရုပ်ရှင်ရုံမှာ ကြည့်ဖြစ်ခဲ့ကြပုံကို ဗာရိုက ပြောပြပါတယ်။

"နော်မာ့ ယောက်ျားရဲ့အပြုအမူတွေက တကယ့်ကို စိတ်ပျက်ဒေါသထွက်စရာကောင်းပါတယ်"

"ရုပ်ရှင်ရုံထဲက ထွက်လာပြီးတာတောင် စိတ်တွေဆိုးပြီး ထပ်ခါထပ်ခါ ပြောမိနေတုန်းပဲ။ ဒါပေမဲ့လည်း စိတ်ကို ဟင်းကနဲချပြီး အိမ်က ကလေးတွေနဲ့ မိသားစုတွေရှေ့ရောက်တော့ ဒေါသစိတ်တွေကို ပြန်ထိန်းခဲ့ရတာပေါ့" လို့ ဗာရိုက ရယ်မောရင်းပြောပါတယ်။

နော်မာရုပ်ရှင်ကြည့်ပြီးတဲ့နောက်မှာ ဗာရိုက တခါတလေမှာ သူ့ခင်ပွန်းသည်အပေါ် သံသယစိတ်ထားတာတွေ၊ ခင်ပွန်းသည်ရဲ့ အပြုအမူတွေကို သတိထားစောင့်ကြည့်တာတွေ လုပ်ခဲ့မိတယ်လို့လည်း ဗာရိုက ဖွင့်ပြောခဲ့ပါတယ်။

အိမ်ထောင်ရေး ဖောက်ပြန်တဲ့ဇာတ်ကားတွေ အရှေ့တောင် အာရှမှာ ဘာကြောင့် နာမည်ကြီးတာလဲ

နော်မာရုပ်ရှင်ကားလိုမျိုး တကယ့်ဖြစ်ရပ်မှန်ကို အားထုတ်ပြီး အခြေခံရိုက်ကူးထားတဲ့ ဇာတ်လမ်းတစ်ခုကနေ အမျိုးသမီးတွေအချင်းချင်း နားလည်စည်းလုံးမှုတွေကိုလည်း ပြသလိုက်ရာရောက်တယ်လို့ ဂျာကာတာ ရုပ်ရှင်ကောင်စီကော်မတီက အက်စ်အမ် ဂီရက်တီ တမ်ဘူနန်က မှတ်ချက်ပြုပါတယ်။

ဒီလိုရုပ်ရှင်တွေကနေ အမျိုးသမီးတွေ ကြုံနေရတဲ့အကြမ်းဖက်မှုတွေကို ရင်ဖွင့်ဖို့နေရာတစ်ခုတင်မကဘဲ ဒါတွေကြုံလာရင် ဘယ်လိုထုတ်ပြောပြီး အကူအညီတောင်းရမလဲဆိုတာကိုပါ နည်းလမ်းပေးလိုက်သလိုပါပဲ။

"ဘာကြောင့်လဲဆိုတော့ အမျိုးသားတွေကြီးစိုးတဲ့ လူမှုအဝန်းအဝိုင်းထဲမှာ အမျိူးသမီးတွေက များသောအားဖြင့် ကိုယ်စီဖွင့်ပြောဖို့ အခွင့်အရေး မရတတ်ကြပါဘူး။ ဒါတွေကို လူသိရှင်ကြားအဖြစ်အပျက်တစ်ခုအဖြစ် မြင်လိုက်တဲ့အခါကျတော့ သူတို့မှာ ဖွင့်ထုတ်ပြီးပြောဖို့ သတ္တိတွေ ရှိသွားကြသလိုပေါ့။ ဒါကလည်း အမျိုးသမီးတွေကို စိတ်ဓာတ်ခွန်အားပေးပြီး ရင်ဖွင့်ဖို့ နေရာပေးလိုက်သလိုဖြစ်သွားတာပေါ့" လို့ ဂီရက်တီက ပြောပါတယ်။

အရှေ့တောင်အာရှတလွှားမှာ နော်မာ ရုပ်ရှင်ပေါက်ခဲ့ရတဲ့အကြောင်းအရင်းတွေထဲက တစ်ခုကတော့ ရုပ်ရှင်ဇာတ်လမ်းထဲမှာ ပါတဲ့အကြောင်းအရာတွေအတွက် အမျိုးသမီးတွေက စည်းလုံးပြီး သဘောတူညီခဲ့ကြလို့ပဲလို့ သူက အကဲဖြတ်ပါတယ်။

မလေးရှားနဲ့ မြန်မာတို့လို နိုင်ငံတွေမှာလည်း ဖောက်ပြန်တဲ့ အမျိုးသားတွေအတွက် မယားပြိုင်ယူတဲ့အလေ့အထကို အသိုင်းအဝိုင်းတချို့မှာ ကြည်ဖြူလက်ခံထားကြတာ၊ လူမှုဝန်းကျင်က ပေးတဲ့ လူမှုရေးပြစ်ဒဏ်တွေကလည်း လျော့ရဲနေကြတာတွေကို ရည်ရွယ်ပြီး သူကဆိုပါတယ်။

ဆန့်ကျင်ဘက်အနေနဲ့ အမျိုးသမီးတွေက လူမှုရေးဖောက်ပြန်တယ်လို့ စွပ်စွဲခံရပြီဆိုရင်တော့ အခွင့်အရေးတွေလည်း ဆုံးရှုံးနိုင်သလို အသိုင်းအဝိုင်းထဲမှာလည်း အမည်းစက်ကြီးတစ်ခုလို ဖြစ်သွားနိုင်ပါတယ်။ အင်ဒိုနီးရှားနိုင်ငံက အမျိုးသမီးတွေလည်း ထိုနည်း လည်းကောင်းပါပဲ။

ဒါပေမဲ့ ဂီရက်တီက အမျိုးသမီးတွေကို အခွင့်အလမ်းမရှိ၊ မလုပ်နိုင်မကိုင်နိုင်ဖြစ်တဲ့ ဝဲဂယက်ထဲကိုပဲ ပုံဖော်တွန်းပို့စေပြီး အမြတ်ထုတ်ကိုယ်ကျိုးရှာတာမျိုး မလုပ်မိဖို့ကိုလည်း ရုပ်ရှင်အသိုင်းအဝိုင်းကို သတိပေးထားပါတယ်။

၂၀၁၈ ခုနှစ်က ဂီရက်တီလုပ်ခဲ့တဲ့"တစ်ဖက်အမျိုးသမီးကိုပဲ အရှက်ခွဲခြင်း(Pelakor)"လို့ အမည်ပေးထားတဲ့ သုတေသနတစ်ခုမှာဆိုရင်လည်း လူမှုရေးဖောက်ပြန်မှုတွေဖြစ်လာတဲ့အခါ လူမှုကွန်ရက်တွေပေါ်မှာ အမျိုးသားတွေထက် အမျိုးသမီးတွေအပေါ်ကိုပဲ ပိုပြီးပစ်မှတ်ထား တိုက်ခိုက်ကြတယ်လို့ မီးမောင်းထိုးပြနေပါတယ်။

Pelakor ဆိုတာကတော့ ဇနီးသည်ရှိတဲ့ ခင်ပွန်းနဲ့ ဖောက်သည်တဲ့ အမျိုးသမီးကို ဆိုလိုတာဖြစ်ပါတယ်။

ဖြစ်စဉ်တွေကို ကြည့်ရင်တော့ Pelakor တွေ ပေါ်လာတာက ဇနီးသည်တွေအနေနဲ့ ခင်ပွန်းကို စိတ်ကျေနပ်အောင် မစွမ်းဆောင်နိုင်တာ၊ သူတို့ ကိုယ်သူတို့လည်း တကိုယ်ရေလှပကျန်းမာမှုတွေကို မထိန်းသိမ်းနိုင်တာတွေကြောင့် ခင်ပွန်းသည်တွေက ဖောက်ပြန်သွားကြတာလို့ ပုံဖော်ခံရလေ့ရှိပါတယ်။

"ဒီလိုဖြစ်စဉ်တွေမှာ ခင်ပွန်းသည်တွေဟာ ပိုးဖလံ မီးတိုးသလိုပေါ့ နက်နက်နဲနဲဖြစ်ကုန်တယ်။ ဒါတွေကို ရုပ်ရှင်တွေအပြင် အပြင်လောကမှာလည်း တွေ့လာရတယ်။ တရားဝင် ဇနီးမယားသည်နဲ့ အငယ် အမြှောင်တို့ ဇာတ်လမ်းလို့ပဲ မြင်ကြတယ်။ ဒီနေရာမှာ တကယ့် အမျိုးသားက ဘယ်လို ပြစ်ဒဏ်မှ မခံရဘူး။ ရရင်လည်း မပြင်းထန်ဘူး'' လို့ ဂီရက်တီကပြောပါတယ်။

အိမ်ထောင်ရေးဖောက်ပြန်တဲ့ရုပ်ရှင်တွေမှာ အမျိုးသမီးတွေအချင်းချင်း ယောက်ျားတစ်ယောက်အတွက် ဒေါသထွက်မီးပွင့်ပြီး ခိုက်ရန်ဖြစ်ဟန်ပုံဖော်ထားတဲ့ ဇာတ်လမ်းမျိုးတွေက ပိုပြီးရောင်းအားကောင်းလေ့ရှိပါတယ်။

"အမျိုးသမီးတွေရဲ့ ခန္ဓာကိုယ်ကို လိင်အသားပေး ဖော်ပြထားတဲ့ ခိုက်ရန်ဖြစ်နေတဲ့ ပုံစံမျိုး၊ ကာတွန်းတွေထဲမှာ ဥပမာပြောရရင် အမျိုးသမီးတွေအချင်းချင်း ရွှံ့နွံထဲမှာ ခိုက်ရန်ဖြစ်နေကြတဲ့ပုံစံကို ရုပ်ရှင်ရိုက်ကွက်အနေနဲ့ သရုပ်ဖော်ထားပြီး ဒါကိုကြော်ငြာတာနဲ့ ရုပ်ရှင်ထဲမှာသုံးတာမျိုးတွေပါ"လို့ ဂီရက်တီက ဆိုပါတယ်။

ဒါတွေကြောင့်ပဲ အဲဒီလို လိင်အသားပေးဓာတ်ပုံတွေက အိမ်ထောင်ရေးဖောက်ပြန်တဲ့ကားတွေမှာ ကူညီအားဖြည့်ထားသလိုဖြစ်ပါတယ်။

ဥပမာပြောရရင် တရားဝင်မိန်းမဟာ အလုပ်ကြိုးစား၊ ချစ်ဖို့ကောင်းပြီး ယဥ်ကျေးတဲ့သူတွေ အဖြစ် မကြာခဏ ပုံဖော်ခံရပါတယ်။ တချိန်တည်းမှာပဲ နောက်ထပ်မိန်းမကတော့ လိင်ဆွဲဆောင်မှုအပြည့်ရှိအောင်ဝတ်စားဆင်ယင်တဲ့သူ၊ လိင်စိတ်ကြွလာအောင် ဖြားယောင်းတဲ့သူ၊ သူများအိမ်ထောင်ရေးကို ဖျက်ဆီးတဲ့သူ၊ ပြီးတော့ ဉာဏ်နီဉာဏ်နက်များတဲ့သူမျိုး သရုပ်ဖော်ခံရပါတယ်။

နောက်ထပ်လည်း ခင်ပွန်းနဲ့ နောက်မိန်းမအကြား ရမ္မက်သွေးကြွတဲ့မြင်ကွင်းတွေမှာလည်း မဆင်မခြင်ပုံစံမျိုးနဲ့ အမျိုးသမီးတွေရဲ့ ခန္ဓာကိုယ်ကို လှစ်ဟပြတဲ့ ပြကွက်တွေကိုလည်းမကြာခဏဆိုသလို အသုံးချအမြတ်ထုတ်ကြပါတယ်။

"သစ္စာမဲ့ဖောက်ပြန်မှုကို ကျွန်မ ခွင့်မလွှတ်ပါဘူး။ ဒါပေမယ့် ရုပ်ရှင်ပေါက်အောင် ဒီလိုအရိုးစွဲနေတဲ့ ဇာတ်လမ်းဇာတ်ကွက်တွေ ဖန်တီးဖို့ သရုပ်ဆောင် အမျိုးသမီးတွေရဲ့ ကိုယ်ပိုင်ဆုံးဖြတ်ချက်မပါဘဲ လုပ်ခဲ့ရတာမျိုးဆိုရင်လည်း လက်မခံနိုင်ပါဘူး" လို့ ဂီရက်တီကပြောပါတယ်။

ပြဿနာကတော့ အရှေ့တောင်အာရှတလွှားရဲ့ အမျိုးသမီးအားပေးမှု ဈေးကွက်မှာ အမျိုးသမီးတွေအပြိုင်အဆိုင် လုကြ၊ ခိုက်ရန်ဖြစ်ကြတဲ့ ဇာတ်လမ်းတွေက အောင်မြင်တာထက်ကို ကျော်လွန်နေပြီလို့ ဂီရက်တီက ဆိုပါတယ်။ ဂီရတ်တီရဲ့ အပြောအရ အမျိုးသမီးတွေအချင်းချင်း ဒီလိုခိုက်ရန်ဖြစ်တာတွေကိုပဲ ဖော်ပြနေဦးမယ်ဆိုရင် ဖိုဝါဒတွေက ကြီးစိုးနေဦးမှာပဲလို့ သူက ထောက်ပြပါတယ်။

''နောက်ထပ် လူမှု ယဉ်ကျေးမှု အကြောင်းရင်း တစ်ရပ်ကတော့ အရှေ့တောင်အာရှ ရုပ်ရှင်နယ်ပယ်ထဲ သဘာဝထက်ပိုတဲ့ ဇာတ်မြူးအောင် ဇာတ်နာအောင် တင်ဆက်ပြတာနဲ့ ရင်းနှီးကျွမ်းဝင်နေတာကြောင့်လည်းဖြစ်ပါတယ်။ ဒီတော့ အင်ဒိုနီးရှား ဇာတ်ကားဟာ ဒီလိုခေါင်းစဉ်အောက်ကနေ ရိုက်ကူးတဲ့အခါမှာ သူတို့အတွက် ပိုပြီး ရင်ဘတ်နဲ့နီး ခံစားလို့လည်း ရသွားတာပေါ့''

လိင်အသားပေး ဇာတ်လမ်းဇာတ်ကွက်တွေမှာ အမျိုးသမီးတွေရဲ့ ကိုယ်ပိုင်ဆုံးဖြတ်ချက်နဲ့ လုပ်ခဲ့တာဟုတ်၊ မဟုတ်ဆိုတဲ့ ဝေဖန်ချက်နဲ့ ပတ်သက်ပြီး ရုပ်ရှင်ဇာတ်ညွှန်းရေးသူ အိုကာ အော်ယိုရာက စောဒက တက်တာမျိုးမရှိပါဘူး။

အမျိုးသမီးတွေ ကိုယ်ပိုင်ဆုံးဖြတ်ချက်နဲ့ လုပ်ခဲ့တာဟုတ်၊ မဟုတ်ဆိုတဲ့အကြောင်းအရာနဲ့ပတ်သတ်တဲ့အပေါ် စိုးရိမ်မှုကိုလည်း ရုပ်ရှင်ဇာတ်ညွှန်းရေးသူ အိုကာ အော်ယိုရာက မငြင်းပယ်ပါဘူး။ သူ့ရဲ့ ဇာတ်ညွှန်းဟာအဲဒီလိုအရာမျိုးကို ဦးတည်တဲ့ သားကောင်လိုမျိုးမဖြစ်ဖို့ ဇာတ်ညွှန်းကိုသေချာစေအောင် ခက်ခက်ခဲခဲ မကြာခဏဆိုသလို စဥ်းစားခဲ့တယ်လို့ ဆိုပါတယ်။

သေချာတာကတော့ သူတစ်ယောက်တည်း ဖန်တီးခဲ့တာမဟုတ်ဘဲ အကုန်လုံးကို အသိပေးလုပ်ဆောင််ခဲ့တယ်လို့ပြောပြီး ဂီရက်တီရဲ့ သတိပေးချက်ကို တုံ့ပြန်ခဲ့ပါတယ်။

"ဖြစ်နိုင်သလောက် ဇာတ်ကိုချုံ့တယ်။ ဒါပေမယ့် သစ္စာမဲ့ဖောက်ပြန်မှုနဲ့ အကြမ်းဖက်မှုကိုရင်ဆိုင်နေရတဲ့ အမျိုးသမီးတွေအနေနဲ့ ဘာမှမလုပ်နိုင်တာထက် စာရင် ဖွင့်ထုတ်ပြောလာနိုင်အောင် ခြေလှမ်းအစပျိုးပေးနိုင်ခဲ့တဲ့ သဘောပါပဲ" လို့ အိုကာက ပြောခဲ့ပါတယ်။

လူသိများခဲ့တဲ့ဇတ်ကြောင်းကနေ ရုပ်ရှင်ပိတ်ကားထံဆီသို့

လူတွေ စိတ်ဝင်တစားဖြစ်လာအောင် ဆွဲဆောင်နိုင်ခဲ့တယ်ဆိုပေမဲ့ နော်မာရုပ်ရှင် Norma: Antara Mertua dan Menantu ဟာ လူမှုကွန်ရက်တဆင့် ပျံ့နှံ့ခဲ့တဲ့ ဖြစ်ရပ်မှန် အကြောင်းအရာတစ်ခုကို အခြေခံခဲ့တာဖြစ်လို့ ပရိသတ်တွေရဲ့ ဝေဖန်မှုတွေလည်း မြင့်တက်ခဲ့တာဖြစ်ပါတယ်။

"အင်ဒိုနီးရှား ရုပ်ရှင်ထုတ်လုပ်ရေးတွေဟာ သူတို့ နောက်ကျကျန်ခဲ့မှာကို သိပ်ကို စိုးရိမ်ကြပြီး လူမှုကွန်ရက်မှာ ဘယ်လိုအကြောင်းအရာသေးသေးလေးပဲ ပျံ့ပျံ့ ရုပ်ရှင် ထရိုက်တတ်ကြတာမျိုးပါ။ ဒါက ရုပ်ရှင်တစ်ခုရဲ့ ဖန်တီးမှု အရည်အသွေးကိုလည်း ထိခိုက်စေနိုင်ပါတယ်။ နောက်လည်း ဒါမျိုးတွေပဲ ဆက်ရိုက်မနေဖို့ မျှော်လင့်တယ်။ ဘာလို့လဲဆိုတော့ အက်ကြောင်းထပ်နေတဲ့ ဇာတ်လမ်းမျိုးတွေက ပရိသတ်တွေကို ရေရှည်မဆွဲထားနိုင်ဘဲ ငြီးငွေ့စေတတ်တာကြောင့်ပါ" လို့ ဂျာကာတာမြို့က အလုပ်သမားတစ်ဦးဖြစ်တဲ့ စီဖာကပြောပါတယ်။

တစ်ဖက်မှုလည်း လူမှုကွန်ယက်ကတဆင့် ပျံ့နှံ့ ပေါ်ထွက်လာတဲ့ဇာတ်ကြောင်းက ရုပ်ရှင်ရိုက်ဖို့အတွက်တော့ အတွေးအိုင်ဒီယာ အရင်းအမြစ်တစ်ခု ဖြစ်နိုင်ပါတယ်လို့ အင်ဒိုနီးရှားတက္ကသိုလ်၊ ယဥ်ကျေးမှုသိပ္ပံမဟာဌာနရဲ့ ကထိကဖြစ်တဲ့ ဂီရက်တီ တမ်ဘူနန်ကပြောပါတယ်။

"ဒီရုပ်ရှင်လုပ်ငန်းဟာ တစ်ခါတရံမှာ စိတ်ကူးယဥ်ဆန်တာမျိုးပဲလည်း မဖြစ်ဖို့ လိုအပ်ပါတယ်။ စျေးကွက်ကို ကြည့်ဖို့လိုအပ်တယ်။ ဖန်တီးသူကိုယ်တိုင်ရော ဒါကို ကြိုက်လားမကြိုက်ဘူးလားပေါ့။ ဈေးကွက်အကြိုက်မှာလည်း လူပြောများ စိတ်ဝင်စားနေတဲ့ အကြောင်းအရာတွေ ဒါမှမဟုတ် သစ္စာမဲ့ဖောက်ပြန်တဲ့ပုံစံလိုမျိုး အထက်မှာ ပြောပြပြီးခဲ့တဲ့ အရာတွေထဲလည်းဖြစ်နိုင်ပါတယ်။"

မူရင်းဇာတ်ညွှန်းကို ဒီထက်ပိုပြီးချဲ့ချင်ခဲ့တာလို့ ဇာတ်ညွှန်းရေးဆရာ အိုကာ အော်ယိုရာကဝန်ခံခဲ့ပါတယ်။ ဒါပေမယ့်လည်း အွန်လိုင်းပေါ်မှာ ပျံ့နှံ့ပြီးသား အကြောင်းအရာကို ဇာတ်ညွှန်းပြန်ရေးရတာမျိုးက စိန်ခေါ်မှု များခဲ့တယ်လို့ သူက ပြောပါတယ်။

နော်မာအတွက်ကိုလည်း သူတွေ့မြင်ခံစားခဲ့ရတဲ့အပိုင်းတွေကို ဒီထက်ပိုပြီး နက်နက်နဲနဲမြင်သာအောင် ပြချင်ခဲ့တယ်။ ဘာလို့ဆိုရင် အဲဒီလိုကျူးလွန်ခဲ့တဲ့သူတွေနဲ့ သူကိုယ်တိုင် ရင်ဆိုင်ခဲ့ရတာကြောင့်ပါ။ အီပါ အစ် မောက်အတွက်လည်း အတူတူပါပဲ။

ဖောက်ပြန်ခံရတဲ့သူတွေဆီကနေ ဖွင့်ပြောတဲ့ ဖောက်ပြန်ရတဲ့အကြောင်းအရင်းတွေကို စုဆောင်းဖလှယ်တာတွေ လုပ်ခဲ့တယ်လို့ ဆိုပါတယ်။

ဒါပေမယ့်လည်း တချို့နေရာတွေမှာ ဇာတ်လမ်းအကြောင်းအရာက အပေါ်ယံသာဖြစ်နေတတ်တာကြောင့် ဇာတ်လမ်းကျောရိုးခိုင်မာအောင် ဇာတ်ကွက်အသေးစိတ်အလိုက် ပါရမယ့်အချက်တွေကို ပုံဖော်စဉ်းစားခဲ့ရတယ်လို့ အိုကာက ပြောပါတယ်။

ကြိုက်သည်ဖြစ်စေ၊ မကြိုက်သည်ဖြစ်စေ ရုပ်ရှင်လုပ်ငန်းအရတော့ ဇာတ်ညွှန်းတွေကို ဆီလျော်အောင် ပြန်ပြုပြင်မွမ်းမံရတဲ့ ရုပ်ရှင်တွေ အများကြီးရှိလာဦးမှာပါ။ ဒီလိုအိမ်ထောင်ရေးဖောက်ပြန်တဲ့ဇာတ်လမ်းတွေလည်း အပါအဝင်ပေါ့လို့ သူက ပြောပါတယ်။