ဆေးစစ်ဖို့ငြင်းတဲ့ တရုတ်လင်မယားကို ထိန်းသိမ်းပြီး မေဒါဝီဆေးရုံကို ပို့ခဲ့
ဓာတ်ပုံ ရင်းမြစ်, MPA
အသက်ရှုကျပ်တဲ့လက္ခဏာကိုတွေ့လို့ ယာဉ်မောင်းက သင်္ကန်းကျွန်း စံပြဆေးရုံကိုပို့ဆောင်ပေးပေမယ့် ဆေးစစ်ဖို့ငြင်းဆန်ပြီးထွက်ပြေးတဲ့ တရုတ်လင်မယား ကို ရဲနဲ့ ရပ်ကွက်အုပ်ချုပ်ရေးမှူးအဖွဲ့တွေက ရှာဖွေပြီး မြောက်ဥက္ကလာပ မေဒါဝီ ဆေးရုံကို ဒီနေ့မတ်လ ၂၈ရက်မနက် (သန်းခေါင်) ၁၂နာရီကျော်မှာ ပို့ဆောင်ခဲ့ရတယ်လို့ သင်္ကန်းကျွန်းမြို့နယ် ရဲတပ်ဖွဲ့မှူး ရဲမှူးကောင်းနိုင်က ဘီဘီစီကိုပြောပါတယ်။
တရုတ်လင်မယားက ဒဂုံဆိပ်ကမ်း၊ ယုဇနဥယျာဉ်မြို့တော်ဘက်ကနေ မုဒိတာအိမ်ရာကို အငှားယာဉ်နဲ့ ငှားစီးလာတဲ့အချိန် လမ်းမှာအသက်ရှုကျပ်၊ ချောင်းဆိုးပြီး တက်နေတဲ့အတွက် ကားဆရာက သင်္ကန်းကျွန်း ဆေးရုံကို ပို့ပေးတဲ့အချိန် ဆေးရုံအရောက်မှာ ဆေးစစ်ဖို့ လက်မခံဘဲ ထွက်ပြေးကြတာလို့ တာမွေကွန်ရက်ပရဟိတအဖွဲ့၊ ရဲတပ်ဖွဲ့၊ သက်ဆိုင်ရာ လွှတ်တော်အမတ်နဲ့ ရပ်ကွက်အုပ်ချုပ်ရေးမှူးတို့ထံက သိရပါတယ်။
ထွက်ပြေးကြသူ ၂ဦးကို သိပ်မကြာခင်မှာဘဲ ပြန်လည်တွေ့ရှိပြီး တွေ့ရှိချိန်မှာ အပူချိန်တိုင်းတာခဲ့ရာ အမျိုးသားမှာ ၉၉ ဒီဂရီစင်တီဂရိတ်နဲ့ အမျိုးသမီးက ၉၈ ဒီဂရီစင်တီဂရိတ်သာရှိတယ်လို့ ဆ(ခ) ရပ်ကွက် အုပ်ချုပ်ရေးမှူး ဦးရဲမင်းကျော်က ဘီဘီစီကိုပြောပါတယ်။
ပြန်လည်တွေ့ရှိတဲ့အချိန်မှာဘဲ မြောက်ဥက္ကလာ ဝေဘာဂီဆေးရုံကို တာမွေကွန်ရက် ပရဟိတအဖွဲ့က သွားရောက်ပို့ဆောင်ပေမယ့် ဆေးရုံကလက်မခံတဲ့အတွက် အဲဒီကတဆင့် မေဒါဝီဆေးရုံကို ပို့ဆောင် ထားတယ်လို့ သိရပါတယ်။
အဲဒီတရုတ်နိုင်ငံသားလင်မယားနှစ်ဦးလုံးက မြန်မာပြည်တွင်းကို တရားဝင် ဝင်ရောက်လာကြသူတွေဖြစ်ပြီး ပတ်စ်ပို့သက်တမ်းလည်း ကျန်ရှိနေသေးသူတွေ ဖြစ်ပေမယ့် သူတို့လာရောက်တဲ့ ဒေသနဲ့ အခြားကိုယ်ရေး အချက်အလက်တွေကိုတော့ ရဲတပ်ဖွဲ့က ဖြေကြားခြင်းမရှိပါဘူး။
လင်မယားနှစ်ဦးစလုံးမှာ ကိုရိုနာဗိုင်းရပ်စ်ရှိမရှိကိုတော့ ရဲတပ်ဖွဲ့၊ လွှတ်တော်အမတ်နဲ့ ဒေသခံတို့က သိရှိထားတာ မရှိပါဘူး။
လက်ရှိအချိန်အထိတော့ မေဒါဝီဆေးရုံမှာ ကျန်းမာရေးကုသမှုတွေပေးပြီး သီးခြားထားရှိကုသပေးနေတယ်လို့ မေဒါဝီဆေးရုံက ဒေါက်တာဝင်းသန္တာဖြူက ဘီဘီစီကို အတည်ပြုပါတယ်။ အခြားဗိုင်းရပ်စ်ကူးစက်ခံရမှု ရှိမရှိကိုတော့ မသိရသေးပါဘူး။
