Profiad newydd - y Sadwrn diwethaf es i Stadiwm y Mileniwm - nid am y tro cyntaf, ond am y tro cyntaf i weld gem rygbi.
Gem ryngwladol , Cymru yn erbyn y Barbariaid, ond daeth yn eithaf clir nad aelod o'r Gymuned Ewropeaidd oedd Barbaria. Yn wir, nid gwlad mohoni o gwbl, ond tîm Mickey Mouse - ond a bod yn hollol deg, tîm Teyrnas Unedig Mickey Steele-Bodger .
Mae'r rygbi teips wastad wedi dweud fod yna ddelwedd o awyrgylch unigryw mewn gem rygbi - efo'r canu yn profi fod y Cymry yn gantorion o fri.
Doedd y Sadwrn diwethaf yn ddim gwahanol os am greu stereoteips.
Gwahoddwyd pob côr, fel yr ymddengys, o dde Cymru i ganu pob can ystrydebol a oedd yn bodoli cyn y gêm, ond dim son am Delilah, Calon Lan na Chwm Rhondda gan y cefnogwyr !
Wel dyna ddelwedd wedi ei chwalu.
Yna daeth y timau allan, Hen Wlad Fy Nhadau i ni, a dim son am anthem i Deyrnas Unedig y Steele-Bodgers.
Yna, a dyma oedd y sioc fwyaf, cefnogwyr rygbi yn trio eu gorau i ymddwyn fel cefnogwyr peldroed - ac yn llwyddo.
Fel y daeth y dyfarnwr ar y cae, anelwyd bonllefain o gymanfa o sarhad i'w gyfeiriad!
Be oedd y dyn druan yma wedi ei wneud i'r Cymry bondigrybwyll yma i haeddu'r fath groeso?
Gwyddel oedd y dyfarnwr - Alain Rolland. Wel, fyddai Roland Rat ddim wedi cael ei sarhau i'r fath raddau a'r Gwyddel yma! Roedd yn edrych fel petai wedi tynnu'r byd a'i ben i waered!
A dyna ddelwedd frawdgarol honedig y byd rygbi wedi ei chwalu hyd yn oed cyn i'r gêm gychwyn!
Yna cymhlethdod arall i mi - roedd deg munud o'r gem wedi ei chwarae cyn imi sylweddoli nad oedd pêl o unrhyw fath i'w weld ar y cae! A'i rhyw gystadleuaeth ryngweithiol newydd o ddarganfod ble mae'r bel oedd hwn?
Digon o ymrafael a gwthio a tharo pennau wrth i'r ddau dîm ruthro ar ben ei gilydd, ond er imi edrych yn ofalus , doedd dim pêl i'w weld yn unman!
Yna megis fel mellten, aeth yr asgellwr ar garlam i lawr yr ochor dde ar gyflymder a fyddai yn gwneud I Gareth Bale edrych fel trên bach yr Wyddfa - llwyddodd Harry Robinson i fy argyhoeddi bod pêl yn bod, a'i sodro ar y gwair gan ennill pum pwynt I Gymru!
Pum pwynt - am un gôl! Dim rhyfedd na allwn gymhwyso ar gyfer unrhyw gystadleuaeth fyd eang peldroedaidd! Anodd deal y peth!
Cyn cloi dylwn ddweud fy mod yn fythol gwyno mewn gemau peldroed fod pobol yn methu ac eistedd yn llonydd ac yn codi pan mae unrhyw beth cyffrous yn digwydd. Doedd dim byd yn wahanol y Sadwrn diwethaf, ond i wneud pethau'n waeth ymddengys na all y cefnogwyr boneddigaidd yma fyw am awr a hanner heb fynd i brynu galwyni o gwrw. Roedd cymaint o fynd a dod a phobol yn ceisio cydbwyso cwpanau plastic o gwrw ar blât cardfwrdd nes gwneud i gêm ddartiau edrych fel cyfarfod o gymdeithas y dirwestwr!
Daeth dos o realiti i'r sefyllfa pan ofynnodd y wraig imi os hoffwn botel o gwrw! Pam meddwn i wyt ti eisiau cwrw mewn gem rygbi? Am fy mod yn cael, oedd ei hateb!
Ie, rhywle ynghanol hyn i gyd roedd yna gêm rygbi yn ceisio darganfod ei hun! Wn i ddim be oedd yn mynd ymlaen, ond pan sgoriodd Cymru efo cyffyrddiad olaf y gêm - ymddengys fod pawb wedi cael digon gan wneud eu ffordd adre wedi cynhyrfu yn lan.
Manchester City, Chelsea neu hyd yn oed Cymru a'r Barbariaid - mae rhai pethau yn gorffen jyst yr un fath!!
Bydd profiad newydd arall yn Stadiwm y Mileniwm cyn hir - tîm peldroed merched GB yn y Gemau Olympaidd , a cyn ichi ofyn, na ddwi ddim am fynd yno!
Trin a thrafod y byd pêl-droed yn ffordd unigryw criw 
