Croesawu Wali Tomos a Mr Picton i gêm fwya'r ganrif!
|12:35, Dydd Gwener, 1 Mehefin 2012
Cynhelir gêm bêl droed hollbwysig nos Wener, 8 o Fehefin 2012 ar gae pêl droed Nantlle Vale ym Mhenygroes ger Caernarfon.
Gêm dathlu brwydr fawr Maes Dulyn fydd hi, sef y gêm a gynhaliwyd rhwng tîm Pobol y Cwm a thîm C'mon Midffild yn ystod Eisteddfod yr Urdd Dyffryn Nantlle ac Arfon yn 1990.
Y tro hwn tîm Arthur Picton fydd yn wynebu tîm Wali Tomos - a bydd y ddau yn sgwrsio ar raglen Ar y Marc fore Sadwrn, Mehefin 2ail am y gem fawr.
Bydd Tecwyn 'Tecs' Parry yn dychwelyd i'r maes am y tro cyntaf ers ugain mlynedd fel Capten Tîm Arthur Picton, a Malcolm Allen, y cyn bêl droediwr proffesiynol a sylwebydd Sgorio yn gapten y tîm arall. Mae eraill o'r timau gwreiddiol yn gobeithio ymddangos ar y cae, ond bydd criw Rownd a Rownd a Sgorio yn rhan o sgwad enfawr Tîm Mr Picton.
Criw 'Ar Y Marc' BBC Radio Cymru fydd yn helpu Wali Tomos. Malcolm Allen fydd yn arwain Dylan Jones, Meilir Owen ac eraill, ac yn dilyn cyfarwyddiadau manwl Wali Tomos. Y dyfarnwr, fel yn y gêm wreiddiol yn 1990, fydd y Barnwr Nic Parry. Dylai fod yn achlysur i'w gofio!
Bydd gêm 1990 yn cael ei chwarae ar sgrin fawr, a bydd maes Clwb Pêl-droed Dyffryn Nantlle yn cael ei agor yn swyddogol ar ei newydd wedd fel rhan o ddathliadau'r noson.
Yn ôl Aled Jones Griffiths, Rheolwr y Clwb, mae hi'n fraint gwahodd ymwelwyr ag Eisteddfod yr Urdd a phobl leol i'r maes newydd: "Rydyn ni wrth ein boddau bod digwyddiad mor fawr yn digwydd eto yma yn Nantlle Vale. Nôl ym 1990, pan oedd Steddfod yr Urdd yma ddiwethaf, roedd 3,000 o bobl yn gwylio'r gêm rhwng Bryn Coch United a Phobol y Cwm. Doedd dim modd symud yma, roedd ceir ym mhobman, ac roedd hi'n orlawn. Fe gawson ni amser gwych!"
Mae'r gêm i ddechrau am 6.45 o'r gloch, gyda digwyddiadau eraill ar y maes ynghynt.
Tâl mynediad yn £3 a phlant am ddim.
Trin a thrafod y byd pêl-droed yn ffordd unigryw criw 
