Archifau Chwefror 2012

A fydd Caerdydd yn chwifio'r faner dros Gymru brynhawn Sul?

Mae yna ddigon o bobl yn meddwl hynny (ac mae yna rai hefyd yn credu fod Abertawe yn gwneud yr un peth yr Uwchgynghrair).

Ond tybed beth petai rhywun yn teithio ar hyd a lled gogledd Cymru yn ceisio argyhoeddi pawb mai cefnogi'r timau Cymreig sydd rhaid?

Roedd gan Sam Hamman syniad cyffelyb yn ei ddyddiau gyda Chaerdydd - gan feddwl y gallai greu Caerdydd ar ddelwedd Barcelona a chreu Cymru gyfan yn rhyw Gatalonia peldroedaidd i'w gefnogi. 'Scêrsli bilîf' a distaw iawn oedd hi o gyfeiriad Abertawe, Wrecsam a Bangor pan gafodd hyn ei grybwyll!

Yn wir daeth atgofion o ymdrechion Hamman yn ôl wrth imi weld fod Caerdydd yn cynnig gostyngiad pris o £12 oddi ar grys replica'r clwb os daw rhywun a chrys clwb Lerpwl iddynt a'i gyfnewid am grys Caerdydd. Ymddengys fod yna gymaint o gefnogwyr Lerpwl yn ôl y son yn byw o gwmpas y brif ddinas a chymoedd y de!

Mae yna bocedi o gefnogwyr ym mhob man - a daw 'Jacks y Gogledd' i feddwl ar unwaith, a'u teyrngarwch diffuant i Abertawe.

Ond gyda llawer mwy o gefnogwyr peldroed gogledd Cymru yn heidio i gyfeiriad Anfield, Parc Goodison, Elland Road ac Old Trafford yn gyson, allai ddim gweld y siwrnai yn cael ei hymestyn ar hyd ar A470, neu i lawr y gororau i gyfeiriad y brif ddinas na chwaith i'r Liberty.

Does gen i fawr o amheuaeth fodd bynnag y byddai bron pob Cymro sydd yn dilyn peldroed (heblaw cefnogwyr Lerpwl a hwyrach Abertawe) yn gobeithio y gall yr Adar Gleision lwyddo yn Wembley.

A chofiwch - y tro diwethaf i dîm o Gymru fynd i Wembley, daeth dyrchafiad i'r Uwchgynghrair yn sgil y fuddugoliaeth.

Tybed mai tro Caerdydd fydd cael buddugoliaeth yn Wembley eleni?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Bid iddo yn ei law lwyth
o faw diawl; ef a'i dylwyth!

Cwpled gan Dafydd ap Gwilym, ond tybed a oedd Luis Suarez yn ymwybodol o ganu'r hen feirdd Cymreig wrth iddo ymddangos fel petai am ddymuno rhywbeth tebyg i Patrice Evra a thylwyth Manchester United bnawn Sadwrn diwethaf yn Old Trafford yng nghanol y ddefod seremonïol o ysgwyd llaw cyn y gêm?

Annoeth yw cicio nyth cacwn ond llwyddodd Suarez i roi cic go iawn i drefn yr F.A. gan gynhyrfu Syr Alex a Kenny Dalglish cymaint nes bod y cafalri o'r Unol Dalaethau wedi cyrraedd Lerpwl i ddod a threfn ar bethau yn Anfield.

Ond o ddifri, oes yna unrhyw bwrpas i'r ysgwyd llaw ddefodol sydd yn cael ei chynnal yn enw chwarae teg cyn y gemau yma?

Alla'i fawr feddwl fod unrhyw un yn cymryd y rhain o ddifrif. Ond mae gweinyddwyr y gêm yn credu fod hyn i gyd yn cyfrannu yn llesol tuag at ysbryd gêm ac yn hybu'r agwedd o chwarae teg, cyn i'r chwaraewyr ddeifio, twyllo a chicio ei gilydd yn ddarnau am awr a hanner.

Ai rhagrith llwyr ydi hyn?

Os felly, tybed mai'r unig un sydd yn ddieuog o gael ei alw yn rhagrithiwr ydi Luis Suarez ac mai fo sydd yn gywir wedi'r cwbl!

Hmmm!!!!

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Curtis Obeng ydi'r ail gefnwr i ymadael a Wrecsam ac ymuno ac Abertawe o fewn cyfnod o ddwy flynedd.

Os bydd symudiad Obeng cystal ag un Neil Taylor, yna bydd dyfodol disglair i'r chwaraewr hoffus a ymunodd a thîm y Cae Ras o Manchester City yn 2009. Fel rhan o'r trosglwyddiad mae amddiffynnwr Abertawe a chapten tîm Cymru o dan 21 oed, Daniel Alfei, wedi mynd ar fenthyg i'r Cae Ras am weddill y tymor.

Ond nid dyma'r unig ddau chwaraewr i symud rhwng Wrecsam ac Abertawe. Gwnaeth Joe Allen, chwaraewr canol cae Abertawe, y daith i Wrecsam - gan chwarae dwy gêm ar fenthyg yno yn 2008.

Peidier ag anghofio cyn-flaenwr y Cae Ras, Lee Trundle a ddaeth yn dipyn o ffefryn i'r Elyrch, gan sgorio 78 o goliau mewn 148 o gemau rhwng 2003 a 2007 gyda'i 'magic daps'! - hyn ar ôl chwarae 97 o gemau i Wrecsam a sgorio 27 o weithiau. Dychwelodd Trundle i'r Liberty yn 2009/10 ar fenthyg o Bristol City gan sgorio 5 gol mewn ugain gêm.

Aeth y golwr Dai Davies o Wrecsam I Abertawe hefyd - wedi chwarae 144 o gemau ar y Cae Ras rhwng 1977 a 1981, fe ymunodd a thîm Abertawe yn yr adran gyntaf yn 1981, gan aros yno am ddwy flynedd.

Er mai gyda Wrecsam mae enw Brian Flynn yn cael ei gysylltu fwyaf, a hynny fel rheolwr - bu yno o 1989 hyd 2001, cafodd hefyd gyfnod o ddwy flynedd fel rheolwr ar Abertawe rhwng 2002 a 2004.

Mae Flynn yn cael ei gysylltu yn aml gyda rhediadau Wrecsam yng nghwpan Lloegr - yn enwedig y gêm honno welodd y tîm yn trechu Arsenal ar y Cae Ras yn 1992. Aeth sgoriwr yr ail gôl yn y gêm honno, Steve Watkin hefyd ymlaen i chwarae dros Abertawe yn 1997, gan aros yno nes 2001.

Tra mae llawer yn son y dyddiau yma am sefyllfa Abertawe ar waelod yr hen bedwaredd adran yn nhymor 2003/04, Flynn oedd yr arweinydd a roddodd y gobaith newydd iddynt, gan sicrhau eu dyfodol yn y gynghrair gyda buddugoliaeth hanesyddol dros Hull City yng ngêm olaf tymor 2003/04.

Tipyn o hanes felly rhwng y ddau glwb, ac mae nifer o gefnogwyr Wrecsam yn dechrau meddwl, os gall y Swans achub eu dyfodol a dringo i'r uchelfannau y maen't ynddo heddiw (wyth mlynedd ar ôl curo Hull) pam na all Wrecsam ail godi a chamu ymlaen llawn mor hyderus?

Pam lai?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?