Archifau Awst 2009

Pryd oedd y tro diwethaf i dîm a fethodd â churo Tamworth ystyried cynnal gêm Cwpan y Byd ar eu maes eu hunain?

Gyda Wrecsam yn colli ar Faes y Lamb nos Fawrth, ac edrych fel oen ar y ffordd i'r lladdfa, mae Cymdeithas Bêl Droed Cymru wedi cyhoeddi eu bod yn awyddus i chwarae gemau rhagbrofol Cwpan y Byd a Phencampwriaethau Ewrop ar feysydd heblaw Stadiwm y Mileniwm yn y dyfodol.

Stadiwm newydd Caerdydd, y Liberty yn Abertawe a Pharc y Scarlets yn Llanelli ydi'r lleoliadau dan ystyriaeth.

Ond ni fydd y Cae Ras yn Wrecsam yn cael ei ystyried hyd nes i'r stadiwm gael ei foderneiddio ac yn cyrraedd safonau UEFA yn ogystal â gofynion myfyrwyr Prifysgol Glyndŵr.

Tydi diweddaru'r Cae Ras ddim yn rhywbeth a all ddigwydd dros nos, er mai dyma'r stadiwm gorau yng Nghymru, sydd ddim wedi ei leoli ar arfordir aber yr afon Hafren.

Mae rhywun yn amau nad oes fawr o sylw yn cael ei roi i unrhyw beth, yn enwedig yn y byd pêl-droed, sydd yn gorwedd i'r gogledd o'r M4.

Cafwyd digon o ffwdan y llynedd wrth i'r Gymdeithas Bêl Droed gyhoeddi mai yn Llanelli y byddai rownd derfynol Cwpan Cymru yn cael ei chynnal, gyda nifer o gefnogwyr Bangor yn gofidio teithio mor bell yn ystod gwyliau'r Banc

Cafwyd cefnogaeth wleidyddol hefyd i'w cwyn, felly, gyda'r Cae Ras yn edrych yn flinedig, ond onid dyma'r cyfle i'r rhai sydd mewn grym wrth y Bae i'r De o'r M4, i fynd ati winedd a dannedd i ddwyn perswâd ar eu cyd-aelodau yn y Cynulliad i gyfrannu ychydig tuag at ddatblygiad y Cae Ras a sylweddoli fod yna fwy i fywyd hamdden Gogledd Cymru na cherdded i fyny'r Wyddfa er mwyn cael coffi mewn caffi ar y copa!

Rwy'n edrych ymlaen am gyhoeddiad fyddai'n sicrhau stadiwm deilwng i Ogledd Cymru, un a fyddai hefyd yn sicrhau y gall tref Wrecsam ymfalchïo fod y Cae Ras gyfoes ei gyfanwaith yn disgleirio, yn genedlaethol a rhyngwladol, fel Oen Duw ar fynydd Seion.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Ydi'r amser wedi cyrraedd pan ddylai camerâu gael eu gosod wrth ochor pob gôl?

Yn dilyn y gôl a sgoriodd Crystal Palace yn erbyn Bristol City, ac na chafodd ei ganiatáu, gan nad oedd y dyfarnwr wedi gweld beth a ddigwyddodd, mae rheolwr Palace, Neil Warnock, yn barod ei gwyn am y diffyg o beidio â defnyddio technoleg gyfoes i benderfynu materion dadleuol.

Gwnaethpwyd y pwynt fod y byd yn gallu anfon dyn i'r lleuad, neu y gellir defnyddio technoleg mewn gêm tennis yn Wimbledon, ond ni chaniateir gosod camerâu ar ochor gôl i benderfynu os yw'r bêl wedi croesi'r llinell neu ddim.

Pwynt teg - ond mae awdurdodau pêl-droed yn parhau i fynnu mai gan y dyfarnwr mae'r gair olaf. Digon teg, ond oni ellir helpu'r dyfarnwr i sicrhau fod ei air olaf yn gywir, drwy roi cymorth gweledol a thechnolegol iddo? Wedi'r cwbwl, does neb yn meddwl fod hygrededd dyfarnwyr tennis, criced, neu rygbi yn lleihau wrth ddefnyddio technoleg weledol i benderfynu canlyniadau digwyddiadau aneglur.

Hen bryd felly i symud ymlaen yn y byd pêl-droed, ac os am gael y pedwerydd dyfarnwr yn sefyll ar ochor y cae gyda monitor deledu o fewn cyrraedd, yna, fe ddylai gael yr hawl i'w ddefnyddio ( rhywbeth na chaiff ar hyn o bryd) , ac anfon y wybodaeth berthnasol drwy'r system gyfathrebu glywedol sydd eisoes yn bodoli, i'r dyfarnwr.

Hwyrach y bydd nifer yn cwyno am y gost ariannol, ond beth ydi'r gost o beidio â symud ymlaen a cholli allan oherwydd ystyfnigrwydd?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

A ydi'n amser i Gymru chwilio am gapten newydd?

Yn sgil absenoldeb Craig Bellamy o'r gêm yn erbyn Montenegro, a'r smonach a wnaethpwyd gan Manchester City wrth iddynt fethu a chysylltu â Chymru i roi gwybodaeth am ei absenoldeb yn sgil anaf, mae rhaid gofyn beth ydi dyfodol Bellamy.

Rhaid gofyn hefyd beth petai John Terry yn methu a chwarae dros Loegr oherwydd anaf, ac a fuasai Chelsea yn ymddwyn yn yr un ffordd drwy fethu â rhoi gwybodaeth i Gymdeithas Bêl Droed Lloegr neu Fabio Capello, amdano?

A ydi Manchester City wedi dod yn rhy bwysig, yn sgil eu cyfoeth newydd, i dalu unrhyw sylw am sefyllfa eu chwaraewyr rhyngwladol?

Tydi Bellamy ond wedi chwarae deg gêm allan o ddau ddeg tri ers pan iddo ddod yn gapten ar Gymru, ac onid gwell felly fuasai gadael i rywun arall dderbyn yr awenau ar y cae, a gadael i Bellamy ganolbwyntio ar ddod yn holliach.

Mae'n wir i Bellamy fod wedi chwarae dros Gymru er nad oedd yn hollol ffit yn y gorffennol, ac wedi methu gemau i'w glybiau yn dilyn hyn - ond ai dyma'r amser i ystyried y dyfodol, a hwyrach gofyn mwy o gwestiynau am agwedd Manchester City yn sgil ei absenoldeb?

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?

Tymor arall a gobeithion newydd, ond be' sydd o flaen Caerdydd, Abertawe a Wrecsam eleni?

Mae tipyn o newid wedi bod yn ystod yr haf gyda Chaerdydd wedi symud i stadiwm newydd sbon, Abertawe yn penodi rheolwr newydd a Wrecsam bron hefo tîm newydd sbon!

Bydd ymadawiad Roger Johnson yn creu bwlch ynghanol amddiffyn, ac arweiniad Caerdydd, ond mae angen chwaraewr canol cae a all sgorio arnynt hefyd.

Hwyrach y gall Joe Ledley ddatblygu i wneud hyn, ond a fydd o yn aros? Ac a fydd Ross McCormack o gwmpas, ac os bydd, a oes angen blaenwr cryf a tal i arwain y llinell flaen wrth ei ochor?

Mwy o gwestiynau nac atebion yn y stadiwm newydd mi dybiwn!

I lawr yr M4 yn Abertawe, mae Paulo Sousa yn ceisio gwisgo'r fantell a adawyd gan Roberto Martinez. Mae eisoes wedi gwisgo siwtiau sy'n tynnu sylw, ond a fydd y tîm yn ddigon da i hawlio'r sylw eleni?

Does dim amheuaeth mai Abertawe oedd yn chwarae'r pêl-droed gorau yn y gynghrair y llynedd, ond bydd angen cysondeb arnynt os am wneud hyn yn effeithiol erbyn diwedd y tymor.

Mae gen i deimlad hefyd fod nifer o dimau'r Bencampwriaeth wedi dod i adnabod dull Abertawe o chwarae ac erbyn diwedd y tymor diwethaf yn ymwybodol o sut i leihau eu heffeithiolrwydd.

Heb Jason Scotland a Jordi Gomez, fe fydd y disgwyliadau yn uchel ar Steve Dobbie y blaenwr newydd o Queen of the South ac ar Gorka Pintado a Guillem Bauza.

Bydd disgwyl hefyd i Jordi Lopez o QPR etifeddu dull Abertawe o basio'r bêl o gwmpas canol y cae yn gelfydd.

Draw yn Wrecsam mae Dean Saunders wedi cael gwared â phedwar chwaraewr ar ddeg (hyd yn hyn) ac wedi arwyddo naw chwaraewr newydd.

Mae'r gyllideb yn llai, ond parhau yn uchel mae'r gobeithion, ac fe fydd rhaid i'r to newydd addasu yn sydyn i ofynion Uwchgynghrair y Blue Square.

Bydd croeso yn ôl i Marc Williams a'i ddylanwad yng nghanol y cae, a chroeso hefyd i Gareth Taylor fel blaenwr.

All pethau ond fod yn well os yw Taylor am gymryd lle Jefferson Louis!

Gyda thimau cryf fel Caerlŷr, Middlesbrough, Derby, West Bromwich Albion a Sheffield United yn y Bencampwriaeth mae'n anodd gweld Caerdydd ac Abertawe, yn sgil eu newidiadau, yn cyrraedd y gemau ail gyfle.

Bydd angen dechrau da i'r tymor os am weld Wrecsam yn codi gobeithion unwaith eto mewn Cynghrair fydd yn cynnwys Luton, Rhydychen yn ogystal â AFC Wimbledon.

• Llyfrnodi gyda
• del.icio.us |
• Digg |
• Newsvine |
• NowPublic |
• Reddit
• - Beth yw hwn?