|13:00, Dydd Gwener, 31 Gorffennaf 2009
Gan ei bod hi'n ddechrau wythnos yr Eisteddfod Genedlaethol yn y Bala beth am gael ychydig o farddoni ar Ar y Marc? Rhowch gynnig ar gwblhau'r limerig isod:
Sdim ffwti yn y Steddfod eleni,
Dim arian i wario ar beli.
Ond draw ar y llwyfan -
Mae'r orsedd yn syfrdan....
Ebostiwch eich cynigion at: [email protected]
Neu ffoniwch: 03703 500 500
Testun: 67500
Cofiwch - does dim gwobr dim ond yr anrhydedd o ennill! Pob lwc!
Mae'r sioe fawr drosodd a'r beirniadu, wel, hwyrach ond ar fin dechrau.
Wedi'r cwbwl, mae'r lle yn cael ei fynychu gan amlaf gan fobol sydd yn hoffi cwyno yn feunyddiol a methu â gwneud eu meddyliau i fyny os mai angen glaw i feddalu'r borfa, yntau angen haul sydd orau ar gyfer llwyddiant.
A doedd hi ddim yn sioe frenhinol go iawn chwaith gan mai Prif Weinidog Cymru, Rhodri Morgan oedd yno i agor y lle.
Ie, croeso i Stadiwm newydd Dinas Caerdydd gyda Rhodri Morgan yn cynnal agoriad swyddogol ac urddasol cyn y gêm nos Fercher diwethaf rhwng Dinas Caerdydd a Celtic.
Er hynny, os ewch yno, hwyrach y bydd well i chi fynd a'ch wats efo chi, gan nad oes cloc, na chwaith sgôrfwrdd ar gyfer y lle, ond fel pob stadiwm newydd sbon arall, roedd y lle yn sbic a sban o lân
Roedd yno ddigon o sŵn hefyd er waethaf awgrymiadau yn y wasg leol yn
dilyn y gêm gyntaf yno, rhwng Caerdydd a Chasetown, nad oedd fawr o awyrgylch o gwmpas y lle.
Stori cyfarwydd mewn stadiwm newydd, cafwyd yr un feirniadaeth am Stadiwm yr Emirates lle mae Arsenal yn chwarae.
Hwyrach na fydd Joe Ledley na Ross McCormack yn gweld llawer o'r lle yn y dyfodol, ond yn ôl y perfformiad Caerdydd yn erbyn Celtic, hwyrach y bydd angen presenoldeb angor o amddiffynnwr caled ynghanol y cae i gynnal tymor llwyddiannus eleni.
Creu awyrgylch mae rhywun, nid ei adeiladu, ac os ceir angerdd yn y chwarae, bydd yna angerdd ymysg y cefnogwyr.
Mae llawer yn dibynnu ar gymanfa y cefnogwyr os am ail-greu awyrgylch drydanol Parc Ninian ar ei orau yn stadiwm newydd ein prifddinas.
Beth yw eich argraff chi o'r lle ? Cysylltwch a rhowch eich barn.
Yn dilyn gêm gyfeillgar gyfartal yn erbyn Prestatyn nos Lun, dywedodd Dean Saunders, rheolwr Wrecsam y dymunai weld ail dîm Wrecsam yn chwarae yng Uwchgynghrair Cymru yn y dyfodol.
Os na allant gael dyrchafiad o Gynghrair y Blue Square yn fuan, yna hwyrach y bydd yn well i Wrecsam ystyried rhoi y tîm cyntaf yn yr Uwchgynghrair, ac anelu am daith i Ewrop yn hytrach na breuddwydio am dripiau i Gaerwysg neu Dagenham a Redbridge.
Colli oedd ein hanes yng ngemau Ewrop eto yr wythnos yma ond, llygedyn o obaith i Fangor ar gyfer yr ail gymal ar y Cae Ras yn erbyn Honka.
Roedd tasg y Rhyl yn mynd i fod yn un anodd yn erbyn Partizan Belgrade, ac felly y bu.
Rhaid dweud fod ymroddiad y Rhyl yn arbennig, a phetai Osian Roberts, rheolwr dros dro y Rhyl, a Slavisa Jokanovic, rheolwr Partizan, yn newid timau, yna rwyf hollol o'r farn na fuasai unrhyw beth gwahanol wedi digwydd yn y gêm.
Roedd y Rhyl yn drefnus ac yn ddisgybledig, ond yn erbyn tîm sydd yn arfer chwarae yn gyflymach, yn meddwl yn gynt ac yn cadw meddiant yn well, gyda chwaraewyr gwell, roedd ond un canlyniad yn bosibl.
Yn y cyfamser os am ddilyn syniad Dean Saunders, beth am gael bob un tîm yng Nghymru yn cystadlu ar lefel cenedlaethol a rhoi iddynt y cyfle i geisio cystadlu yn Ewrop?
Siawns na allai Abertawe neu Gaerdydd wneud yn well, wedi'r cwbwl timau Cymreig ydi hwythau hefyd!
Allai ddim gweld pan na all hyn ddigwydd yng Nghwpan Cymru, heb greu unrhyw drafferth - er y byddai ailwampio'r Uwchgynghrair i gynnwys timau o Gaerdydd neu Abertawe braidd yn anodd - yn enwedig o ystyried yr holl drafferth a fu i gytuno cwtogi'r cynghrair i ddeuddeg tîm ar gyfer tymor 2010/11.
Cyn cloi, dymuna pob un o griw rhaglen Ar y Marc yn dda i John Hartson - sydd yn ein meddyliau - yn gyson wrth iddo frwydro yn ddewr yn erbyn ei afiechyd.
Ac wedi elwch, tawelwch fu!
Dau o dimau Cymru, Llanelli a'r Seintiau Newydd eisoes allan o Ewrop cyn i'r tymor dechrau, gwledydd tramor yn cael cymaint o lwyddiant ar feysydd pêl-droed Cymru ac ydynt yng Ngŵyl Ryngwladol Llangollen, a llais yr hen Twm Twm o 'Fo a Fe' yn fythol barhau i lefain 'Nefar in Ewrob gw'boi!'
Stori cyfarwydd - a'r wythnos nesaf bydd Bangor yn herio Honka â'r Rhyl yn gobeithio curo Partizan Belgrad, tîm sydd yn y gorffennol, wedi cyrraedd Ffeinal Cwpan Ewrop!
Sur felly y gellir symud ymlaen?
Mae'r Uwchgynghrair ar fin cael eil ail strwythuro, i ddeuddeg tîm ond a ydi hyn yn ddigon ynddo'i hun i sicrhau gwelliant ?
Mae dau bwnc llosg yn parhau, sef a ellir cynyddu'r nifer o dimau proffesiynol o fewn yr Uwchgynghrair, ac a ddylid ystyried cynnal yr Uwchgynghrair yn ystod misoedd yr Haf.
Does yr un o'r ddau yna yn hawdd i'w wireddu, ac mae meddwl am sefydlu clybiau llawn amser, a'r oblygiadau ariannol yn ei sgil, yn anodd ei amgyffred mewn cyfnod o gyfyngder economaidd.
Ond beth am newid amseriad y tymor?
Ai dyma'r amser i dimau Cymru frathu'r fwled, fel petai ac ystyried chwarae drwy'r Haf?
Mae Gweriniaeth Iwerddon wedi cymryd y cam, a'r farn gyffredinol ydi fod hyn yn creu timau sydd yn fwy parod ar gyfer Ewrop.
Mae timau Gogledd Iwerddon fel Cymru yn chwarae drwy'r gaeaf, ond os edrychwch ar ganlyniadau Linfield a Glentoran yng Nghwpan Ewropa, yna mae lle i gredu eu bod hwythau mewn sefyllfa debyg.
A fydd y detholedig ddeuddeg yng Nghymru yn ddigon dewr i orfodi newid mewn agwedd ac arferiad, er mwyn lles pêl-droed Cymru, neu a ydynt yn fwy tebygol o saethu eu hunain yn eu traed gyda'r fwled na chaiff ei brathu?
Yr wythnos diwethaf, fe gynhwyswyd y gosodiad yma ar y blog yn cyfeirio at obeithion Llanelli ym Motherwell:
'Gyda'r Albanwyr heb dîm rheoli ar hyn o bryd, hwyrach y gall ysgogiad newydd Andy Legg arwain bois y Sosban i ganlyniad annisgwyl'.
Dyna yn union beth a ddigwyddodd.
Llwyddodd Llanelli i drechu'r tîm o Uwchgynghrair yr Alban o un gôl i ddim gan roi eu hunain mewn sefyllfa gref ar gyfer yr ail gymal.
Chwaraeodd y Rhyl hefyd yn erbyn Motherwell, y penwythnos diwethaf mewn gêm gyfeillgar, a'u curo o dair gôl i un.
Hwyrach i chi gofio'r Barri yn colli i Aberdeen a Chwmbrân yn cael eu chwalu gan Celtic mewn gemau Ewropeaidd yn y gorffennol.
Ond gyda'r Seintiau Newydd yn sgorio oddi cartref yn Fram Reykavik, ac yn colli yno ond o dwy gôl i un, hwyrach, hwyrach, fod y rhod yn troi.
Ydi'r Sosban yn berwi a'r Seintiau yn barod? Bydd sylw mawr i'r gemau ail gymal.
Neidio i fwy o gynnwys o’r blog hwn
Trin a thrafod y byd pêl-droed yn ffordd unigryw criw Ar y Marc. Blog Ar y Marc - Tanysgrifio(RSS)
Blog Ar y Marc - Tanysgrifio(ATOM)
Ddim yn siwr beth yw RSS? Edrychwch ar ein canllaw defnyddiol i ddechreuwyr.
Lawrlwythwch neu tanysgrifiwch i'r podlediad wythnosol, am ddim.
BBC © 2014Nid yw'r BBC yn gyfrifol am gynnwys safleoedd allanol.
Mae'r dudalen hon yn ymddangos ar ei gorau mewn porwr cyfoes sy'n defnyddio dalennau arddull (CSS). Er y byddwch yn gallu gweld cynnwys y dudalen hon yn eich porwr presennol, fyddwch chi ddim yn cael profiad gweledol cyflawn. Ystyriwch ddiweddaru'r porwr os gwelwch yn dda, neu alluogi dalennau arddull (CSS) os yw'n bosib i chi wneud hynny.
