EucoirDè a' bhuaidh a tha aig eucoir?

Nuair a thèid eucoir a dhèanamh, tha droch bhuaidhean no droch bhuilean ann. A rèir 's dè an seòrsa eucoir a chaidh a dhèanamh, faodaidh e buaidh a thoirt air bodhaig, faireachdainn no airgead.

Bhidio - Dè a' bhuaidh a tha aig eucoir air a' chomann-shòisealta?

Coimhead a' bhidio seo agus faigh a-mach mun bhuaidh a tha aig eucoir air a' chomann-shòisealta.

Buaidh eucoir air daoine fa leth

Faodaidh iomadh droch bhuaidh a bhith aig eucoir leithid mèirle air daoine fa leth agus air an teaghlaichean:

• Buaidh air bodhaig – leòn gu dìreach bho ionnsaigh. Faodaidh seo a bhith anns a' gheàrr-ùine no anns an ùine-fhada.
• Buaidh air faireachdainnean – dragh, uallach no streas inntinn air sgàth eucoir air choreigin fhulang. Uaireannan, bidh daoine ag atharrachadh gu tur agus dìreach a' fuireach a-staigh nan dachaigh, no bidh e doirbh dhaibh deagh dhàimhean a chumail suas ris an teaghlach aca.
• Buaidh air airgead – a' call airgead, cairt creideis no a' feumachdainn pàigheadh airson fòn-làimhe ùr, msaa. Dh'fhaodadh nach tèid aig a' phrìomh neach-cosnaidh ann an teaghlach obrachadh tuilleadh agus tha seo a' dèanamh an teaghlaich nas bochda.

Buaidh eucoir air an neach a rinn e

Tha droch bhuaidhean aig eucoir cuideachd air an neach a nì e:

• A' faireachdainn nàire no ciont
• A' call obair no doirbh obair fhaighinn anns an àm ri teachd
• Duilgheadasan ann an dàimhean còmhla ri teaghlach agus caraidean

Buaidh eucoir air coimhearsnachdan

Faodaidh droch bhuaidh a bhith air coimhearsnachdan a tha a' fulang ìre mhòr de dh'eucoir:

• bidh an t-eagal air daoine nan dachaigh no taobh a-muigh na dachaigh
• tha e a' toirt buaidh air prìs thaighean
• faodaidh gum bi e nas dorra do dhaoine dachaigh a reic
• bidh àrachas dhachaighean a' dol suas bhon a tha e nas buailtiche gum bi tagraidhean gan dèanamh
• 's dòcha gum bi gnothachasan ùra a’ seachnadh na sgìre
• 's dòcha gun dùin gnothachasan a tha ann mar-thà air sgàth eucoir leithid mèirle a' tachairt tric, bhandaileachd no ro bheag de luchd-ceannach

Buaidh eucoir air gnothachasan

Tha eucoirean leithid goid à bùithtean agus foill a' cosg nam billeanan notaichean do ghnothachasan san RA gach bliadhna. Tha na cosgaisean sin a' dol air an luchd-ceannach agus luchd-cleachdaidh sheirbheisean ann am prìsean nas motha.

Rinn aon aithisg bhon Scottish Retail Consortium agus bhon Scottish Grocers Federation a-mach ann an 2021-22 gun do chosg goid à bùithtean £90m ann an Alba a-mhàin.

Thuirt na buidhnean ghnothachasan sin cuideachd gun robh eucoir eagraichte air cùl cuid dhe na 28,619 eucoir goid à bùithtean a' bhliadhna sin, le gràisgean ag amas air bailtean air fad agus an uair sin a' gluasad air adhart.

Eucoir-saidhbear

Tha barrachd is barrachd mhèirlich a' gluasad air falbh bho eucoirean traidiseanta leithid goid, agus an àite sin, tha iad a' cleachdadh an eadar-lìn airson eucoir a dhèanamh.

Tha eucoir-saidhbear gu mòr co-cheangailte ri bhith a' goid fiosrachadh dìomhair. Ma gheibh mèirlich cothrom air fiosrachadh mar seo, faodaidh gun tèid aig na mèirlich air sùimean mòra, mòra de dh'airgead a ghoid. Ann an 2022-23, a rèir tuairmse, chaidh 14,890 eucoir-saidhbear a chlàradh leis na poilis ann an Alba. (Stòr: Riaghaltas na h-Alba)

Dh'fhuiling cuid de chompanaidhean san RA mar na bancaichean, companaidhean àrachais agus solaraichean lùth eucoir tron eadar-lìon o chionn ghoirid. Uile-gu-lèir, tha co-dhiù an treas cuid de dh'eucoir co-cheangailte ri gnothachas co-cheangailte ris an eadar-lìon.

Gus stad a chur air eucoir-saidhbear, stèidhich riaghaltasan na h-Alba is na RA ionadan sònraichte airson eucoir eadar-lìn. Le bhith ag obair còmhla ri gnothachasan, tha Ionad Eucoir Gnothachas na h-Alba ag amas air an teicneòlas as ùire a chleachdadh airson mèirlich an eadar-lìn a ghlacadh.

Buaidh eucoir air a' chomann-shòisealta san fharsaingeachd

A thaobh a' chomainn-shòisealta san fharsaingeachd, tha cosgais an cois a h-uile eucoir oir feumaidh luchd-pàighidh nan cìsean na poilis a phàigheadh airson eucoir a rannsachadh, na cùirtean airson eucoraich a thoirt gu cùirt, agus ma thèid am faighinn ciontach, feumaidh an t-eucorach seirbheis coimhearsnachd a dhèanamh no a dhol dhan phrìosan. Tha eucoir cuideachd a' cosg do sheirbheisean smàlaidh agus slàinte, mar eisimpleir, nuair a bhios iad a' dèiligeadh ri lasadh theineachan a dh'aon ghnothaich no cùram meadaigeach an dèidh ionnsaigh.

A' pàigheadh airson eucoir

Ann an 2022-23, thug Riaghaltas na h-Alba beagan nas lugha na £4 billean airson òrdugh agus sàbhailteachd phoblach, agus b' e sin 3.6% de na chosg Riaghaltas na h-Alba.