Y system resbiradol mewn bodau dynolYsmygu

Effeithiau ysmygu

Nicotin ydy’r sylwedd caethiwus mewn tybaco. Mae’n cyrraedd yr ymennydd yn gyflym ac yn creu dibyniaeth sy’n golygu bod pobl yn mynd yn gaeth i ysmygu.

Effeithiau ar y pibellau aer

Mae mwcws gludiog yn yr ysgyfaint yn trapio pathogenau. Fel arfer, mae’r mwcws yn cael ei ysgubo allan o’r ysgyfaint gan y cilia ar y celloedd epithelaidd sy’n leinio’r tracea, y bronci a’r bronciolynnau. Fodd bynnag, mae mwg sigaréts yn cynnwys cemegau niweidiol sy'n parlysu'r cilia hyn, gan arwain at grynhoad o fwcws a pheswch ysmygwr. Mae mwg yn llidio’r bronci, gan achosi broncitis.

Effeithiau ar yr alfeoli

Mae mwg yn niweidio muriau’r alfeoli. Mae muriau’r alfeoli yn ymddatod ac yn uno â’i gilydd, gall ffurfio gofodau aer mwy na’r arfer. Mae hyn yn lleihau effeithlonrwydd cyfnewid nwyon, felly mae pobl sy’n dioddef clefyd yr ysgyfaint emffysema (math o COPD neu glefyd rhwystrol cronig yr ysgyfaint) yn cludo llai o ocsigen yn eu gwaed ac yn ei chael yn anodd gwneud ymarfer ysgafn hyd yn oed.

Carbon monocsid

Mae carbon monocsid, CO, yn cyfuno â’r haemoglobin yng nghelloedd coch y gwaed, gan roi straen ar y galon a chynyddu’r risg o glefyd coronaidd y galon a strociau.

Canser yr ysgyfaint

Mae mwg tybaco’n cynnwys llawer o garsinogenau, gan gynnwys tar. Mae ysmygu’n cynyddu’r risg o ganser yr ysgyfaint, canser y geg, y gwddf a’r oesoffagws.