Gaol

Tha an sgeulachd seo a' sealltainn cho cumhachdach 's a tha gaol agus a' bhuaidh a tha e a' toirt air daoine. Dh'atharraich beatha a' phrìomh charactar gu mòr air sgàth 's mar a dhèilig e ri suidheachadh gaoil. Bha Daibhidh deònach feitheamh ri boireannach nach do thill thuige, is leis a sin, chuir e seachad an còrr de bheatha a' feuchainn ris a' mhearachd sin a dhìochuimhneachadh.

Aithreachas

Tha e a' tighinn am follais gu bheil aithreachas mòr air Daibhidh gun do dh'fhuirich e ri Winnie agus gu bheil e a' feuchainn ris an t-aithreachas sin a sheachnadh. Ach, tha e follaiseach gu bheil an t-aithreachas sin air fhathast, is chan eil e a' faighinn cuidhteas an aithreachais gu deireadh na sgeulachd.

Tha an sgrìobhadair cuideachd a' toirt oirnn beachdachadh air mar a tha daoine a' dèiligeadh ri aithreachas: bidh cuid a' dèiligeadh ris gu dìreach, is cuid eile, mar a tha Daibhidh, gan cumail fhèin trang airson an aire a thoirt far an aithreachais. Tha e air a bheatha a lìonadh le obair agus tha sin air a chuideachadh gu ìre, ach chan eil e a' faighinn faochadh ceart gus am faigh e an cothrom a' mhearachd a rinn e a chur ceart.

Roghainn agus saorsa

Tha MacLeòid a' sealltainn dhuinn cho cudromach 's a tha e do dhaoine gu bheil sinn a' faireachdainn gu bheil smachd againn air na tha a' tachairt nar beatha. Chan eil Daibhidh dha-rìribh riaraichte no toilichte gu deireadh na sgeulachd, nuair a tha e fhèin a' gabhail smachd air na tha a' tachairt dha agus ga chur fhèin aig an stiùir. Tha e air innse dhuinn aig fìor dheireadh na sgeulachd gu bheil e a' toirt mathanas dha fhèin airson na mearachd a rinn e.