Caractarachd

Anns An Tàillear (Iris STEALL 02, CLÀR, 2017) tha MacLeòid a' cruthachadh caractar a tha toinnte agus iomadh-fhillte. Seach a bhith ag innse dhuinn gu dìreach cò ris a tha am prìomh charactar coltach, tha an sgrìobhadair a' sealltainn rudan dhuinn mu Mr Weir (Daibhidh). Mar eisimpleir, aig toiseach na sgeulachd tha e a' tighinn am follais gu bheil Daibhidh stèidhichte na dhòighean:

Tha an doras a' còrdadh ris, aost' agus dubh, mar a tha a' ghlas a' greimeachadh air an iuchair, agus am fàileadh.

Tha e follaiseach gu bheil Daibhidh dèidheil air an dòigh-bheatha aige, agus gur e na rudan beaga, àbhaisteach a tha ga dhèanamh toilichte. Tha caractarachd – mar eisimpleir na smuaintean beaga seo – air an cleachdadh gu tric san sgeulachd airson caractar domhainn agus inntinneach a chruthachadh.

Ìomhaigheachd agus samhlachas

Tha ìomhaigheachd agus samhlachas air an cur gu feum san sgeulachd. Tha an dreuchd agus an dòigh-obrach aig Daibhidh ag innse dhuinn mu dheidhinn fhèin: duine a tha mionaideach, cùramach agus nach eil measail air mearachdan.

Tha ìomhaigheachd a' nochdadh nuair a tha Daibhidh a' smaoineachadh mun ghaol a bh' aige air Winnie:

Cinnteach gun robh e ann an gaol rithe. Cho ceangailte rithe ri combaist.

Tha MacLeòid ag innse dhuinn mun smachd a bh' aig Winnie air a' phrìomh charactar, leis an dòigh san robh e ga leantainn agus a' gabhail stiùireadh bhuaipe, coltach ri combaist.

Taghadh-facail

Tha MacLeòid a' cleachdadh taghadh-facail sgileil airson cur ris an ìomhaigheachd agus ris an t-samhlachas san sgeulachd. Tha e ag innse dhuinn mun bhuaidh a thug Winnie air Daibhidh le faclan is abairtean mar mhùchadh agus an cuideam air a chridhe. Tha e follaiseach nach do dhèilig Daibhidh ri na faireachdainnean aige gu ceart agus gu bheil iad fhathast a' dèanamh dragh dha is tha na faclan a tha e a' taghadh gar cuideachadh ann a bhith a' tuigsinn na buaidh seo.

Structar agus plot

Tha structar àraid air an sgeulachd, a tha sgrìobhte ann an earrannan beaga. Tha an leughadair a' faighinn a-mach, beag air bheag, mun eachdraidh a tha eadar an dithis charactaran. Tha sinn a' faighinn a-mach mu bheatha a' phrìomh charactar agus tha sin a' cur an taghaidh a th' aige ann an co-theacsa: an dèan e an aon mhearachd a-rithist? Tha an dòigh-aithris seo a' cumail aire an leughadair oir tha sinn a' beachdachadh air dè nì e aig a' cheann thall.