Ceistean is freagairtean air sgeulachd ghoirid, Na h-Iùdhaich
Question
1. Leugh paragraf a h-aon a-rithist. Cuin a tha an sgeulachd seo suidhichte? Thoir seachad adhbharan airson do bheachd.
Chan eil an sgrìobhadair ag innse dhuinn gu dìreach, ach tha a h-uile coltas ann gu bheil an sgeulachd suidhichte aig àm an Dara Cogaidh. Tha sinn a' leughadh gu bheil dà bhuidheann de dhaoine ann: na h-Iùdhaich agus na Gearmailtich (na Nadsaidhich). Le eòlas air a' chogadh seo, tha fios againn gum biodh na Nadsaidhich a' cur dhaoine air trèanaichean airson an toirt gu campaichean bàis, mar eisimpleir Auschwitz sa Phòlainn.
Question
2. 's bha na boireannaich cho toilicht 's gun theab iad a dhol air an glùinean riutha mar gum b' e diathan a bh' annta.
Seall mar a tha an sgrìobhadair a' cleachdadh ìoranas gu h-èifeachdach san earrainn seo.
Tha an sgrìobhadair a' cleachdadh ìoranas san earrainn seo leis an t-samhla mar gum b' e diathan a bh' annta
. Tha na h-Iùdhaich cho taingeil dha na Nadsaidhich airson an cuideachadh agus gu bheil iad gam faicinn mar dhiathan. Tha ìoranas an seo ann an diofar dhòighean. Tha e ìoranach gun smaoinicheadh na h-Iùdhaich gun robh na Nadsaidhich cho beusach no airidh air moladh, nuair a tha fios aig an leughadair cho olc 's a bha iad.
A thuilleadh air a sin, tha na Nadsaidhich mar dhiathan ann an dòigh, ach ann an dòigh gu tur diofraichte, a chionn 's gu bheil smachd aca air beatha nan Iùdhach is gur iad a chuireas às dhaibh aig a' cheann thall.
Question
3. Seall mar a tha Mac a' Ghobhainn a' cleachdadh conaltradh nan caractaran airson faireachdainnean nan Iùdhach a chur an cèill nuair a tha an turas aca a' tòiseachadh.
Tha tòna dòchasach agus toilichte anns na còmhraidhean a tha a' dol eadar na h-Iùdhaich aig toiseach na sgeulachd:
Seadh. Bidh sinn sàbhailt. Tha iad gu math do na h-Iùdhaich ann an Ameireaga.
Tha e follaiseach bho na tha na h-Iùdhaich ag ràdh aig toiseach na sgeulachd gu bheil iad an dùil a dhol a dh'àite snog agus gu bheil na Nadsaidhich gan cur air na trèanaichean airson a dhol a dh'àite nas fheàrr. Tha iad a' bruidhinn mu cho laghach 's a tha muinntir Ameireaga ri Iùdhaich agus a' sùileachadh gum bi iad gu dòigheil an sin.
Question
4. Bha dithis no thriùir a' tairgsinn bìdh do na Gearmailtich ach cha ghabhadh iad e.
Carson a tha Mac a' Ghobhainn soirbheachail ann a bhith a' dùsgadh truas san leughadair san às-earrainn seo?
Tha an às-earrann seo a' dùsgadh truas ri na h-Iùdhaich. Tha na daoine seo deònach am biadh a thoirt dha na saighdearan is tha sin a' sealltainn gur e daoine còir is fialaidh a th' annta. Tha an truas sin air a dhèanamh nas treasa buileach leis gu bheil fios aig an leughadair gu bheil na saighdearan an sàs ann a bhith a' marbhadh nan daoine seo.
