Ilir Kadia Korrespondent i BBC-së në Tiranë

	Edi Rama fitoi mandatin e tretë si kryetar bashkie i Tiranës

Peripecitë që e shtynë presidentin, Alfred Moisiu, të shtyjë zgjedhjet nga 20 janari në 18 shkurt, pas presionit të opozitës u harruan në mbrëmjen pas ditës së zgjedhjeve prej saj kur rezultatet paraprake flisnin për një triumf të opozitës në Tiranë dhe në bashkitë kryesore te vendit.

Edi Rama, kryetari i PS-së, fitoi mandatin e tretë radhazi si kryebashkiak i kryeqytetit dhe pretendoi për fitore të madhe në të gjithë vendin.

Mirëpo demokratët nuk pranuan se kishin humbur zgjedhjet lokale në shkallë vendi dhe pritën KQZ të zgjidhte pakënaqësitë e pretendimet e kandidatëve humbës e të jepte rezultatin përfundimtar në mes të qershorit.

Sipas rezultateve të KQZ-së, kandidatët e mbështetur nga PD-ja dhe aleatët fituan në 36 bashki, 3 njësi bashkiake dhe 188 komuna.

Ndërsa kandidatët e mbështetur nga PS dhe aleatët fituan 26 bashki, 8 njësi bashkiake dhe 92 komuna.

	Jorgen Grunet shprehu pakënaqësi për zgjedhjet.

Mirëpo që ditën e parë të pas zgjedhjeve, ndërkombëtarët thanë përmes shefit të vëzhguesve të OSBE/ODHIR-it, Jorgen Grunet, se Shqipëria nuk e kaloi me këto zgjedhje provën e zhvillimit të zgjedhjeve në përputhje të plotë me detyrimet e standardet ndërkombëtare.

"Zgjedhjet në Shqipëri ishin për politikën shqiptare një mundësi dhe një shans i humbur për të patur një përputhje të plotë me standardet ndërkombëtare për zgjedhje demokratike," tha shefi i ODHIR-it.

Vizita e Bushit

	Vizita e presidentit Bush në Tiranë u cilësua si historike.

Në 13 qershor Shqipërinë e vizitoi për herë të parë një president i SHBA-së.

Fjala është për vizitën disa orëshe në Tiranë të presidentit amerikan, Xhorxh Bush.

Pamjet e banorëve të Fushë-Krujës që mikpritën me shumë dashuri Bushin bën xhiron e botës, ndërsa Bush dha si zgjidhje finale të çështjes së Kosovës, pavarësinë e saj.

Vizita e tij u quajt në Tiranë si historike.

Zgjedhja e presidentit

	President i Shqipërisë u zgjodh kandidati i shumicës, Bamir Topi.

I nxehti i korrikut ishte ku e ku më i paktë se ai që përjetoi politika shqiptare gjatë zgjedhjes së presidendtit të ri të vendit.

Opozita nuk arriti ta çojë dot vendin në zgjedhje të reja pasi gjashtë deputetë të saj i bashkuan votat me shumicën dhe president i Shqipërisë u zgjodh kandidati i shumicës, Bamir Topi.

Ndërsa kreu i demokratëve në pushtet, Sali Berisha, e quajti këtë zhvillim si shenjë domethënëse të pjekurisë së politikës shqipëtare, Edi Rama kreu i socialistëve në opozitë, e quajti këtë zhvillim si më të turpshmin e politikës së vjetër.

Kreu i ri i shtetit, Bamir Topi, tha se në respekt të kushtetutës do ta vendoste politikën shqiptare në ekulibër.

Prokurori i përgjithshëm

	Ina Rama u zgjodh në postin e Prokurores së Përgjithshme.

Vjeshta mbarti me vete problemin dyvjeçar të politikës shqiptare, të ashtuquajturën "Çështja Sollaku".

Shumica ngriti një tjetër komision hetimi ndaj prokurorit të përgjithshëm dhe megjithë kundërshtimet e forta në sallën e Kuvendit të opozitës dhe të vetë prokurorit të përgjithshëm, Theodhori Sollaku, arriti ta shkarkojë atë me shumicë votash.

Opozita tha se qeveria po vinte nën kontroll njëra pas tjetrës të gjitha institucionet e pavarura në vend, ndërsa shumica tha se po i hapte kështu rrugën reformës në drejtësi.

Pas disa ditësh të shkarkimit të Sollakut, Presidenti i Republikës propozoi dhe emëroi në vend të tij 35-vjeçaren, Ina Rama.

Prokurorja e Përgjithshme, Ina Rama, tha se ishte kundër mandatit të përjetshëm të kryeprokurorit.

Gjatë gjithë vitit pati lajmet që patën të bëjnë me krizën energjitike, korrupsionin që, sipas organizatës Gallup, erdhi dhe u shtua më shumë, varfërinë e të ardhurave të qytetarëve shqiptarë që, sipas "Eurobarometrit", renditen të fundit në Evropë.

	Aktorja e mirënjohur Violeta Manushi, ndëroi jetë këtë vit.

Pati lajme që prekën thellë masat e gjera të artdashësve si largimi përgjithmonë nga jeta i artistëve të mëdhenj shqiptarë si Kadri Roshi, Sulejman Pitarka, Violeta Manushi e, ditët e fundit të dhjetorit, edhe të Xhanfize Kekos.

Kishte lajme që në qendër patën lojërat e shkëlqyera të kombëtares të futbollit me Holandën dhe Bullgarinë dhe pastaj zhgënjimet e bujshme me Bjellorusinë e Rumaninë.

Gëzim solli marrëveshja e shtatorit për lëvizje të lirë në Evropë apo suksesi artistik i Elsa Lilës e Timo Fllokos. Të gjitha këto e të tjera erdhën dhe i lanë vendin radhazi njera-tjetrës duke ndryshuar faqet e para të gazetave dhe mediave elektronike.

Kosova dhe protesta e opozitës

Lajmi që mbeti i pandryshuar gjatë gjithë vitit ishte qëndrimi i palëkundur i Shqipërisë, i gjithë anëve të politikës së saj, për pavarësinë e Kosovës.

Në ditët e fundit të dhjetorit, si ngjarje më e spikatur, u vlerësua dalja në shesh e përkrahësve të opozitës, të cilët akuzuan qeverinë se e kishte zhytur vendin në një varfëri të pamerituar.

Edi Rama, kreu i PS-së, bëri thirrje për një bashkim të gjitha qytetarëve pavarësisht bindjes politike për ta nxjerrë vendin nga kjo situatë, sipas tij, të mjeruar.

Duke pretenduar të kundërtën, demokratët thanë se opozita nuk duhej t'i nxirrte njerëzit në sheshe e të nxiste destabilizim, ndërsa problemi madhor i gjithë shqiptarëve është tani, sipas demokratëve, çështja e Kosovës.