Zoti Guldimann merr postin para zhvillimit të zgjedhjeve

Ai do të drejtojë një prej misioneve më të mëdha që ka OSBE-ja në rajon dhe që në fillim do të përballet me vendime jo pak të rëndësishme të cilat kanë të bëjnë me zgjedhjet e përgjithshme dhe lokale që pritet të mbahen më 17 nëntor të këtij viti.

Emërimi i Guldimann shënon kthimin e tij në shërbim të OSBE-së. Ai ishte shef i misionit të OSBE-së në Kroaci nga viti 1997 deri në 1999. Po ashtu, ka udhëhequr Grupin për Asistim të OSBE-së në Çeçeni nga viti 1996 deri në 1997.

Para këtij posti ai ka ligjëruar në një numër universitetesh në Evropë, siç janë Universiteti i Frankfurtit, Universiteti i Bernës dhe Kolegji i Evropës në Bryzh dhe Varshavë.

Diplomat karriere

Guldimann iu ka bashkuar shërbimit diplomatik zviceran në vitin 1982.

Nga viti 1999 deri 2004 shërbeu si Ambasador i Zvicrës në Teheran.
Postin e shefit te misionit te OSBE-se ne Kosovë e mori nga Werner Wnendt, i cili ka shërbyer në Prishtinë prej vitit 2005.

Ajo që vështirë është kuptuar nga opinioni i brendshëm dhe qarqe të ndryshme ndërkombëtare ka qenë ndërrimi i tij vetëm pak ditë para mbajtjes së zgjedhjeve parlamentare dhe lokale në Kosovë.

Misioni i OSBE-së në Prishtinë është themeluar nga Këshilli i Përhershëm i OSBE-së më 1 korrik 1999. OSBE-ja është shtylla e III-të për Demokratizim dhe Ndërtim të Institucioneve nën kornizën operative të Misionit të Administratës së Përkohshme të Kombeve të Bashkuara (UNMIK).