Arbër Vllahiu BBC, Prishtinë

Diplomatë të huaj thonë se prania ndërkombëtare do të shtrihet në shumë fusha dhe në veçanti në zhvillimin ekonomik, por ajo do të ketë një pushtet krejtësisht tjetër nga misioni i tashëm i OKB-së, që ka patur një numër përgjegjësish të rezervuara në bazë të Rezolutës 1244.

Zyrtarë ndërkombëtarë thonë se pas zgjidhjes së statusit të Kosovës, Këshilli i Sigurimit do të vendosë që t'i japë përgjegjësinë Bashkimit Evropian mbi Kosovën, i cili do të jetë i pranishëm në Kosovë edhe përmes një misioni të policisë dhe në veçanti do të mbajë përgjegjësinë në fushën e drejtësisë.

Por diplomatë perëndimorë kanë thënë se prania ndërkombëtare në Kosovën e passtatusit nuk do të jetë e lehtë dhe ajo do të ketë më shumë probleme sesa ka patur deri më tani.

Në veçanti thuhet se problemet me një ekonomi të pazhvilluar dhe me shkallën e lartë të korrupsionit, do të përshkallëzohen pas zgjidhjes së statusit të Kosovës dhe ato do të pengojnë zhvillimin e përgjithshëm në një masë të madhe.

Zyrtarë ndërkombëtarë pohojnë se një pavarësi e kushtëzuar për Kosovën do të nënkuptonte një prani ndërkombëtare për të vazhduar mbikëqyrjen mbi marrëveshjen që do të arrihet në veçanti në fushën e të drejtave të pakicave.

Megjithëse ende nuk dihet nëse Këshilli i Sigurimit do të pranojë sovranitetin e Kosovës dhe një ulëse të saj në OKB, besohet se prania e ardhshme ndërkombëtare nuk do të duhej të zgjaste më tepër se tre vjet.

Zyratrë të lartë amerikanë ndërkaq thonë se kjo do të duhej të shkurtohej në vetëm dy vjet duke u lënë përgjegjësinë vetë kosovarëve për të krijuar një shoqëri të bazuar mbi rendin dhe ligjin.