Fuqitë diskutojnë për mundësinë e sanksioneve ndaj Iranit

Gjatë një takimi në Londër, përfaqësuesit e këtyre vendeve thanë se ishin shumë të zhgënjyer që Irani nuk kishte pranuar të pezullonte pasurimin e uraniumit.

Deklarata për të cilën është rënë dakord në Londër thotë se gjashtë fuqitë e mëdha të përfshira në negociata do të diskutojnë tani lidhur me disa masa që nuk janë bërë ende publike lidhur me Iranin.

Por ka mosmarrëveshje lidhur me domethënien e kësaj deklarate.

Uashingtoni beson se vendimi për të vendosur sanksione tani është marrë praktikisht, megjithëse nënsekretari amerikan i Shtetit, Nicholas Burns, pranon se hollësitë janë ende për t'u diskutuar.

Zoti Burns tha se javën e ardhshme pritet të fillojë puna për përpilimin e një rezolute të OKB-së për sanksione ndaj Iranit.

Por duket se vende të tjera anëtare të Këshillit të Sigurimit ende ngurojnë ta ndërmarrin këtë hap.

Rusia po e minimizon rëndësinë e kësaj marrëveshjeje.

Ajo thotë se askush nuk po flet për votim në Këshillin e Sigurimit të OKB-së për sanksione në të ardhmen e afërt.

Ndërkohë sekretarja e Jashtme britanike, Margaret Beckett, e cila është më pranë pozicionit amerikan, po thekson nevojën për arritjen e një zgjidhjeje të negociuar.