Atileet Ganzabee Dibaabaa miidhamaan dorgommii Shaampiyoonaa atileetiksii Adunyaa Dohaatti gaggeeffamuun ala taate

Atileet Ganzabee Dibaabaa miidhamaan dorgommii Shaampiyoonaa atileetiksii Adunyaa Dohaatti gaggeeffamuun ala taate .

Bara 2015 fiigicha meetira 1,500'n shaampiyoonaa adunyaa kan taate Ganzabeen miidhama miilla ishee irratti ishee mudateen Shaampiyoonaa Atileetiksii Adunyaan ala tahuushee fuula Inistaagiraamii ishee irratti barreessiteetti.

Atileetiin ganna 28 Ganzabeen fageenya 1,500m rikardii adunyaa of harkatti galfattee qabdi. Kunis bara 2015 dorgommii Beejingitti gaggeeffameen yoo tahu baruma sana sa'aatii rikardii adunyaa tahe daqiiqaa 3fi sekondii 50 fi maayikiroo sekendii 07 tahe galmeesisteetti.

Ganzabeen miidhama koomee ishee mirgaa dorgommii Diyaamandi Liigii Zuurikitti gaggeeffame irratti ishee mudateen kan Dohaatti qophaa'e irratti hirmaachuu akka hin dandeenye barreesiteetti.

''Akka carraa tahee Shaampiyoonaa Atileetiksii Dohaatti qophaa'e irratti hin argamu. Cimee deebi'ee dhufuuf hojjechaan jira'' jettee suuraa ishee waliin maxxansiteetti.

Atileetiin lammii Nezerlaandis Siifan Hasan fageenyicha irratti atileetii Ganzabeetti aantee sa'aatii fooyya'aa qabdudha.

Atileetiin Keeniyaa Feez Chepingetik Kipyegon akkasuma erga yeroo dhiyoon as injifannootti deebitee ni morkatti jedhamee eegama.

Fiigicha gufachiisaa adunyaa fi Olompikaan shaampiyoonaa kan taate Feez Chepingetik Kipyegon morkii cimaa ni taasifti jedhamee eegama.

Dorgommiin kun Fulbaana 27 hanga Onkoloolessa 6tti Dohaatti gaggeeffama