KALLATTIIN, Senetiin US waraana Tiraamp labse deggere, Iraan misaa'eloota hedduu Israa'elitti dhukaaste

Haguuggii Tamsaasa Kallattii

1. Daqiiqaa 3 duraBaha jiddu galeessaatti balaliin addaan citee ture muraasni deebi'ee eegalame

   Balaliin sababa waraana Baha Giddu Galeessaatiin guyyootaaf addaan citee ture,tokko tokko deebi'ee eegalee jira.

   Waranni kun erga eegalee guyyoota 6 lakkoofsiseera.

   Balaliin lammiilee Biriteen Omaan irraa gara biyyaatti deebisuuf mootummaan UK qopheesse Roobii halkan sababa rakkoo teeknikaatiin haqame ture.

   Waajjirri Dhimma Alaa UK Kamisa kaan ''balaliin kun gara galgalaa ni taasifama jedhamee eegama,'' jedhe.

   Jarman, Ispeen, Nezerlaand, fi biyyoonni Awurooppaa biroo lammiilee isaanii Baha Giddu Galeessaa keessaa baasuun milkaa’aniiru.

   Biyya UAE keessattis Daandiin Xiyyaaraa Emirates fi Itihad Airways balalii muraasa gaggeessaa jiru. Balaliin tokko tokko Buufata Xiyyaaraa Idil Addunyaa Zaayiditti deebi’ee eegaluu Waajjirri Miidiyaa Abu dhaabii beeksise.

   Daandiin Qilleensaa Qaxar ganama har’aa Omaan Mascat irraa gara magaalota Awurooppaa adda addaatti balalii gargaarsa namoomaa akka taasisu beeksiseera.

   Isaan keessaa balalii gara Landan, Barliin, Kopenhagen, Maadriid, Roomaa fi Amsterdaamfaa keeaatti argamu.

   Daandiin xiyyaaraa kun ibsa marsariitii isaa irratti baaseen, balaliin magaalaa guddoo Doohaa irraa ''sababii cufamuu naannoo qilleensaa Qaxaraatiin yeroodhaaf addaan citeera'' jedhe.

   Akka Rooyitars gabaasetti Ministeera Geejjibaa Israa’el wabeeffachuun xiyyaarri lammiilee Israa’el fe’ee ture Tel Aviv keessa qubateera.

   Daandiin Qilleensa Itoophiyaa waraana Baha Giddugalaatti adeemaa jiruun hangam miidhame?

2. Daqiiqaa 41 duraBahareen misaa'eloota Iraan 70 ol rukutee kuffise jette

   Bahareen misaa'eloota Iraaniraanirraa itti dhuka'an 75 rukutuun kuffisuu beeksisfte.

   Misaa'eloota qofa osoo hin taane Iraan hanga ammaa dirooniwwan 123 fayyadamuun Bahareen irratti haleellaa raawwachuu mootummaan biyyattii ibse.

   Ministeerri Ittisaa Bahareen fuula Inistaagiraamii isaarratti ibsa baaseen, humni waraanaa biyyattii haleellaa Iraanirraa irratti gaggaamame qolachaa jiraachuu beeksise.

   Humni waraanaa "haleellaa shororkeessuu walitti fufiinsaan Iraan gaggeessitu qolachuu itti fufeera," jechuun ibse.

   Lammiileen biyyattii mana keessa akka turaniifis akeekkachiisera.

   Iraan bu'uuraa siviliifi namoota nagaarratti xiyyeeffachuunshee "nageenya naannichaa kan booressuufi faallaa seera idiladdunyaa ta'uus beeksise Ministeerri Ittisaa Bahareen.

3. Sa'aatii 2 duraIraan diroonidhaan Azarbaajaan haleelte

   Haleellaa diroonii Iraan Azarbaajaan irratti gaggeessiteen namoonni lama miidhamuu Ministeerri dhimma alaa biyyattii beeksise.

   Haleellaan diroonii kun buufata xayyaaraafi naannoo manni baruumsaa jirutti kan raawwate ta'uu mootummaan Azarbaajaan beeksise.

   "Dirooniin tokko buufata xayyaaraa Bulchiinsa Naakchivaan keessatti argamu haleele, dirooniin biraa ammoo naannoo manni baruumsaa jirutti kufe," jechuun ibse ministeerri dhimma alaa Azarbaajaan.

   Haleellaa diroonii buufata xayyaaraa irratti gaggeeffameen gamoowwaniifi nama lamarra miidhaan qaqqabuus beeksise.

   Iraan haleellaa diroonii biyya ollaasheerratti raawwachuurraa kan ka'e, Azarbaajaan ambasaaddarri Iraan deebii akka kennuuf hatattamaan waamtetti.

   Waraana US-Israa'el fi Iraan kanaan haleellaan Tehraan biyyoota Baha Giddugalaafi Israa'eliin ala biyya ollaashee kan taate Azarbaajaan haleeluunshee kun kan jalqabaati.

   MM Abiy daawwataa kan jiran, Azarbaajaan, biyya akkamiiti?

   Haleellaa Iraaniin hanga yoonaa kan hin miidhamne miseensi NATO, Turkiin, yoo haleelamte maaltu ta'a?

   'Sararri diimaan hunduu darbameera'-Biyyoota Galoo Galaanaa

4. Sa'aatii 3 duraMootummaan Itoophiyaa , TPLF fi Ertiraan yoo lola seenan maaltu mudata?

   Ministirri Muummee Itoophiyaa Abiy Ahimad hooggansi TPLF ''qophii waraanaa bal'aa'', ''bittaa meeshaa'' fi ''duula waraanaa gochaa jira'' jechuun himatan.

   Gama kaaniin, mootummaa Ertiraa irraa "waan gaarii argachuun kan hin yaadamnedha,'' jechuunis himataniiru.

   Dubbiin isaanii kuni yeroo Itoophiyaafi Ertiraa akkasumas TPLF gidduu walitti bu'iinsi ka'uu mala jedhamee yeroo sodaatamutti dhagahame.

   Dubbiin MM Abiy maal akeeka? Waraanni yoo ka'e maaltu mudata?

5. Sa'aatii 3 duraIlmi Ayaatolaa Ali Kaamenii abbaa bakka bu'uu mala jedhamu eenyu?

   Waraana US - Israa'el fi Iraan duraayyuu namni Alii Kaameenii bakka bu’a jedhamee yaadamaa ture, ilmasaa kan waggaa 53 Mojtabaa Kaameenii.

   Garuu inni eenyu?

6. Sa'aatii 3 dura

7. Sa'aatii 3 duraUS doonii Iraan haleeluu isheef tarkaanfii hadhaawaatu ishee eeggata- Ministira dhimma alaa Iraan

   Iraan tarkaanfii Ameerikaan doonii waraanaa isheerratti fudhatteef haaloo akka baatu dhaadatte.

   Namoota doonii waraanaa kana keessa turan keessaa reenfi namoota 80 argamuu Ministeerri Ittisaa Sirilaankaa ibseera.

   Dooniin waraanaa Iraan kan Ameerikaan misaa'ela torpeedoo jedhamuun garba Hindii, qarqara Sirilaankaatti rukutuu ibsite kun namoota 180 feetee turte.

   Kanneen keessaa namoonni 32 baraaramuun hospitaala Sirilaankaatti wal'aanamaa jiraachuu Rooyitarsi gabaaseera.

   Ministirri dhimma alaa Iraan haleellaa doonii isaanii Dena jedhamtu kanarratti raawwatameef deebii ga'aa akka kennan ibsan.

   ''US tarkaanfii fudhatte kanaaf baayyee gaabbuunshee waan hin oolle,'' jechuun X irratti barreessan Abbaas Araagchii.

8. Sa'aatii 4 duraIraan haleellaa Turkii irratti raawwachuu waakkatte

   Wayita Iraan fi hidhattoonni deeggarsa Iraan qaban biyyoota Arabaa daangaa isaanii jiran irraa hanga biyyoota Galoo Galaanaa hunda keessa jiran irratti haleellaa raawwatan, biyyi ollaa Iraan, Turkiin, garuu qilleensi ishee hanga ammaatti nagaadha.

   Haata'u malee, haleellaa Iraaniin hanga yoonaa miidhamuu baattus, Roobii (Bitootessa 4, 2026) misaa'ela Iraan irraa itti dhukaafame meeshaa ittisa NATO'n qolachuu ibsiteetti.

   Misaa'elli balistikii Iraan kun erga naannoo qilleensaa Siiriyaa fi Iraaq bira darbee gara naannoo qilleensaa Turkiitti qajeelee booda sirna ittisa qilleensaa fi misaa'ela ⁠NATO'n baha Galaana Meditiraaniyaanii keessatti barbadaa'uu Ministeerri Ittisaa Turkii ibseera.

   Ministeerichi misaa'ela Iraan dhukaaste kanaan lubbuun namaa darbe ⁠ykn miidhaan irra gahe akka hin jirre beeksise.

   Turkiin Iraanirraa misaa'elli itti dhukaafamuu himattus Iraan haleellaa misaa'elaa Turkii irratti hin raawwanne jechuun waakkachuushee miidiyaan Israa'el Haaretz gabaase.

   Haleellaa Iraaniin hanga yoonaa kan hin miidhamne miseensi NATO, Turkiin, yoo haleelamte maaltu ta'a?

9. Sa'aatii 4 duraNamoonni 100,000 ol magaalaa Tehraan gadhiisuun baqatan

   Waraana US-Israa'eli fi Iraan gaggeeffamaa jiruun guyyaa jalqabaa lamaan qofatti namoonni 100,000 ta'an magaalaa guddoo Tehraan gadhiisuun baqachuu UNHCR waabeffachuun BBC Turkey gabaase.

   Haleellaan USfi Israa'el Iraanirratti gaggeessaa jiraniin magaalaa Tehraan irratti xiyyeeffataniiru. Buufatalee waraanaa, waajjiraalee humnoota nageeenyaafi gaggeessitoota olaanoo biyyattiirrattis xiyyeeffachuun haleellaa gaggeessaa jiru.

   Iraanis haleellaa misaa'elaafi diroonii gaggeessaa jirtuun biyyoota Baha Giddugalaa USdhaaf buufata waraanaa kennaniifi Israa'el hirriba dhorkaa jirti.

   Gama biraan ammoo haleellaa Israa'el Libaanos keessatti gaggeessaa jirtuun namoonni 58,000 ta'an baqataniiru.

   Hezbollaan Iraanirra goruun Israa'el wajjin walitti dhukaasaa jira. Israa'el magaalota Iraan qofaa osoo hin taane magaala Beeruut irratti haleellaa cimaa gaggeessaa jirti. Hezbollaanis Israa'el irratti dhukaasuu itti fufaniiru.

10. Sa'aatii 5 duraAjjeechaa Godina Arsii akka dhaabsisu KMNI mootummaa hubachiise

    Ajjeechaafi badii lammiileerratti bakkeewwan garagaraa Godina Arsii keessatti raawwatu akka dhaabsisan Komishiniin Mirga Namoomaa Itoophiyaa mootummaa federaalaafi Oromiyaa hubachiise.

    Ibsi komishinichaa ajjeechaa torban darbe keessa akka haaraatti raawwate hordofee dhagahame.

    BBC'n maddeen garagaraarraa akka odeeffatetti namoonni 30 ol ta'an ajjeefamaniiru.

    Badii kanaaf qondaalli BBC'n dubbise hidhattoota WBO kan mootummaan 'Shanee' jedhu himatan.

    Hidhattooti WBO ibsa baasaniin waakkachuun badii raawwateef mootummaa himatan.

    Hidhattoonni Arsiitti namoota 30 ol akkamiin haala 'suukaneessaan' ajjeesan?

11. Sa'aatii 6 duraZeleniskiin biyyoota Baha Giddugaleessaa michuuwwan isaa ta'aniif tajaajila diroonii akka kennu ibse

    Pirezidantiin Yukireen Volodimiir Zeleniskii biyyoonni Galoo Galaanaa michuuwwan isaa ta'an akka haleellaa diroonii ofirraa qolataniif tumsa akka taasisu ibseera.

    Dhimma kanarratti Yunaayitid Arab Emireetis (UAE), Qataar, Jordaan fi Bahreen waliin dubbachuu ibseera qondaalli Yukireen kun.

    Zeleniskiin ministeerotaa fi ajajoota waraanaa biyyoota kunneenii waliin erga mari'atee booda, osoo humni ittisaa biyyasaa hin miidhaman akkaataa tumsa taasisuuf irratti mala dhahuu akka qabu gaafachuu ibse.

    Aanga'aan Yukireen kun ''Yukireen lubbuu dhala namaa gaaga'amuurraa baraaruu fi haalota tasgabbeessuun ni deggerti,'' jechuun X gubbaatti barreesse.

    ''Loltoonni keenya ga'umsa barbaachisu ni qabu. Ogeeyyiin Yukireen biyyoota kunneen [Galoo Galaanaa] waliin ni hojjetu. Gareen kana qindeessaa jiran jiru.

    ''Lubbuu baraaruu, lammiilee nagaaf eegumsa gochuu, haalota tasgabbeessuu fi imala galaanarraa naga qabeessa ta'e naannawa kana keessatti mirkaneessuuf tattaaffii taasifamu tumsuuf qophiidha,'' jedhe.

12. Sa'aatii 6 duraQataar jiraattota magaalaa Dohaa naannoo Embaasiin US jiruu baaste

    Ministeerri dhimma biyya keessaa Qataar magaalaa Dohaa naannawa Embasiin US jiru keessaa jiraattota baase.

    Kunis haleellaa mudachuu malu dursuun tarkaanfii of eeggannoof fudhatame ta'uu ibse.

    Ministeerichi ibsa X irratti maxxanseen ''jireenyaaf wanti isaan barbaachisu hundi mijateeraaf, kunis tarkaanfii of eeggannoof fudhatamedha,'' jedhe.

    Qataar erga embasiiwwan US Sa'uudii Arabiyaa fi Kuweet jiran akksumas Qontsilaan US Dubaayi jiru haleellaa diroonii Iraaniin rukatamanii tarkaanfii kana labsite.

    Mootummaan Ameerikaa lammiilee isaa Yunaayitid Arab Emireetis (UAE), Sa'uudii Arabiyaa fi Jordaan keessaa baasuuf xiyyaara mijeessaa jiraachuu ibseera.

    Ministeerri dhimma alaa US Guraandhala 28 akka ibsetti lammiileen US kuma 17 fi 500 ta'an Baha Giddugaleessaa keessaa ba'aniiru.

13. Sa'aatii 7 duraWaraanni US-Israa'el Iraan waliin gaggeessaa jiran Baha Giddu Galaa akkaan miidhaa jira

    Biyyoonni Baha Giddu-galeessaa waraana US-Israa'elifi Iraan gidduutti gaggeeffamaa jiruun daafamaa jiru. Iraan, Libaanos, Yunaayitid Arab Emireetis fi Israa'el fa'aa keessatti miidhaa gahe cimaadha.

    Akka dhaabbanni Iraan mirga namaaf falmuufi US keessa buufate Human Rights Activists News Agency ibsetti, hanga Bitootessa 3, 2026tti Iraan keessatti namoonni 1000 ajjeefamaniiru.

    Ergasii ammoo dabalataan namoonni heddu du'uu ibse dhaabbatichi.

    Suurawwan miidhaa Baha Giddugalaatti qaqqaban agarsiisan muraasni kunooti.

14. Sa'aatii 7 duraIraan misaa'eloota Israa'elitti dhukaaste, Seneetiin US waraana Tiraamp labse deggare

    Waraanni US-Israa'elii fi Iraan guyyaa ja'affaasaa qabateera. Ammallee hin qabbanoofne. Gareen lamannuu- USfi sraa'el, Iraan haleellaa itti fufaniiru.

    Iraan ganama kana misaa'eloota hedduu gara Israa'el dhukaasteetti. Waraanni Israa'el haleellaa misaa'elaa Iraan raawwatte kanaan miidhaa qaqqabe hin ibsine.

    Akka gabaasa AFPtti ganama kana Jerusaalem keessatti dhohiinsa guddaatu ture.

    Sana booda waraanni Israa'el akka uummanni dawoo achi jiru keessaa ba'u ajaje.

    Israa'el gamasheen Tehraan keessatti haleellaa haaraa raawwachuu ibsiteetti.

    Gama kaaniin Senetiin US aangoo waraana labsuu pirezidantii irratti mari'ateera.

    Senetiin kun sagalee kenneen aangoo Tiraamp waraana labsuuf qabu daangessuu hin dandeenye.

    Sagaleen akka Tiraamp waraana labsu deggere dhibbeentaa 53, kan morme ammoo dhibbeentaa 47 ture.

    US fi Israa'el maalif Iraan haleelan, waraanni kun hagam turuu mala?

    'Sararri diimaan hunduu darbameera'-Biyyoota Galoo Galaanaa

15. Sa'aatii 8 duraYooyyaa!

    Akkam jirtu hordoftoota keenya? Tamsaasa kallattii eegalleerra. Dhimma waraana US-Israa'elii fi Iraan irratti odeeffannoo jiran karaa kanaan isin biraan geenya.

    Dabalataan odeessaalee keenya karaa marsariitii (website), YouTube, Facebook fi WhatsApp hordofuu hin dagatinaa!

    Tamsaasa kallattii duraan ture keessaa odeeffannoo argachuuf kana tuqaa seenaa!

    Bakka nagaa oolaa!