Maallaqni biyyattii gatii dhabnaan mormiin Iraanitti cime

Haguuggii Tamsaasa Kallattii

1. 30 Muddee 2025Jarmanitti hattoonni diriiliin baankii uranii €30m saaman

   

   Madda suuraa, Gelsenkirchen Police

   Jarmanitti saamtonni maashina diriilii guddaa fayyadamuun baankii Lixa Jarmanitti argamu tokko uranii maallaqa €30m ta'uufi miyoota gati jabeeyyii ta'an saamuu Poolisiin beeksise.

   Dubbii himaan Poolisii yaada AFPf kenneen akki itti saamichi kun itti raawwate akka malee piroofeeshinaaliidha ("very professionally executed") jedhe.

   Saamichi kun magaalaa Gelsenkicheen jedhamu keessatti baankii qusannaa Sparkasse jedhamurratti raawwate.

   Saamtotni kun saanduuqota qusannoo 3,000 ta'an cabsan. Saanduuqota kana keessa maallaqa dheedhii, warqee fi meeshaalee faayaatu ture.

   Poolisiin waayee saamicha kanaa quba kan qabaate Wiixata ganama wayita akeekkachiifni balaa ibiddaa dhagaahamuttidha.

   Ammatti saamicha kanaan walqabatee namni to'annoo jala oole hin jiru.

   Saamtotnii callisa yeroo ayyaana gannoo dahatanii saamicha kana raawwatan jedha Poolisiin.

   Namootni ijaan argan halkan Dilbatatti bari'u bakka konkolaataa dhaabaniin namoota baayyee shaanxaa guddaa baatan arguu himaniiru.

2. 30 Muddee 2025Itoophiyaan namoota TikTok fi YouTube irraa galii argatan gibira kaffalchiisuuf

   

   Namoonni miidiyaa hawaasummaa kanneen akka TikTok fi YouTube irratti qabiyyee maxxansan irraa galii birrii miiliyoona lamaa ol argatan, hojiin isaanii ''akka daldalaatti'' fudhatamuun gibira akka kaffalan wixineen labsii qophaa'eera.

   Wixineen Ministeera Maallaqaan qophaa'e kun fayyadamtoonni miidiyaa hawaasummaarratti qabiyyeewwan maxxansan galii ''beeksisaa fi ispoonsaroota'' irraa akkasumas maloota garaagaraan argatan kan agarsiisu ''galmee herregaa'' akka qabatan dirqamsiisa.

   Dabalata: Wiixineen labsii qophaa'e maal jedha?

3. 30 Muddee 2025Dargaggoon akkamiin haadha isaa ajjeesuun shakkame?

   

   Madda suuraa, Getty Images

   Godina Arsii Lixaa aanaa Negellee Arsiitti taateen tibbana mudate dhageettiif kan hin tollee fi hawaasa biratti rifaatuu guddaa uumedha.

   Aanicha Ganda Bombaasoo Reejjii jedhamtutti shakkamaan maqaan isaa Amaanaa Nabii Daaluu jedhamu haadha isaa fi obbolaasaa saddeet deesse halkan haala sukaneessaan ajjeesuun shakkame.

   Dabalata: Negelleetti loltuun duraanii haadhasaa haala sukaneessaan 'ajjeesuun' qoratamaa jira

4. 30 Muddee 2025Maallaqi gatii dhabnaan Iraanitti mormiin cime

   

   Madda suuraa, EPA

   Gatiin maallaqa Iraan gad cabuu isaafi qaala'insa gatiin mormiin magaalaa guddoo Tehiraanitti eegale, magaalota kaanittis babal'ate.

   Mormiin kuni gaafa Dilbataa namoonni suuqii qaban duula hojii lagachuu erga jalqaban booda eegale.

   Gabaa dolaaraa irratti maallaqi Iraan, riyaaliin, gatii riikardii ta'en gad cabeera.

   Eegasii viidiyoon BBC Afaan Pershiyaan mirkanaa'e mormiin magaalota garagaraatti babal'atuu ragaa bahan.

   Poolisiinis mormitoota bittimsuuf yeroo yaalu mul'ateera.

   Mootummaan Iraan mormii kanaaf beekamtii kennuun mormii ka'aa jiruuf gurra akka kennu ibse.

5. 30 Muddee 2025Tiraamp adeemsi Gaazaatti dhukaasa dhaabuu marsaa lammeessoo saffisaan akka eegalu abdii qabaachuu hime

   

   Donaald Tiraamp karoorri Gaazaatti dhukaasaa dhaabuu marsaa 2ffaarratti walii galuuf abdiin akka jiru hime.

   Haamaas yoo hatattamaan hidhannoo hiikkachuu baate gatiisaa argata jechuunis dhaadate Tiraamp.

   Karoora nagaa abbaa qabxii 20 nageenya Gaazaaf kan qopheesse Tiraamp gareen Haamaas hidhannoo hiikkachuu akka qabu marii Ministiira Muummee Israa'el faana Wixata Filooriidaatti godhan irratti dubbate.

   Israa'el haleellaa waraanni ishee Gaazaa keessatti raawwatturraa kan hafe karoora gama isheetiin irraa eegamu harka 100 milkeessitee jirti jedhe Tiraamp.

   Gama biraan ammoo Iraan kan misooma misaayiloota baalistikii fi sagantaa meshaa waraanaa niwukilaraa kan itti fuftu yoo ta'e Ameerikaan haleellaa biraa Iraanirratti raawwatamu akka deegartus Tiraamp dubbate.

   Israa'elii fi Haamaas yoom gara gulantaa lammaffaa karoora nagaatti akka seenan kan gaafatame Tiraamp, "Saffisa dandeenyu hundaan. Garuu [Hamaas] hidhannoo hiikkachuun dirqama" jedhe.

   Waayee Haamaas yoo dubbatu: "Yoo akkaataa waliigalteetiin hidhannoo hin gatii isaanii ni argatu" jedhe.

   "Yeroo gabaabaa keessatti hidhannoo hiikkachuu qabu"

   Guutuu odeessa kanaa asii dubbisaa

6. 30 Muddee 2025Israa'el Somaalilaandiif beekamtii kennuun Itoophiyaaf maal jechuudha?

   

   Gaanfa Afrikaatti waan guddaa adeemaa yeroo jirutti biyyi guddoo Gaanfa Afrikaa, Itoophiyaan, callisuu filatte – hin toles, hin bade hin jenne.

   Tibbana biyyi Giddugala Bahatti waraana guddaa ijaarteefi michuu jabduun Ameerikaa, Israa'el, bulchiinsa ollaa Itoophiyaaf beekamtii kenniteetti.

   Israa'el bulchiinsa Somaalilaand Somaaliyaan qaama kiyya jettuuf biyya jalqabaa beekamtii kennite taatedha.

   Sababa kanaan Somaalilaand keessa gammachuu, Somaaliyaa keessammoo mufiitu jira.

   Biyyoonnifi dhaabbileen idiladdunyaa garaa gara garruu murtee Israa'el mormaafi balaaleeffataa jiru.

   Pirezidantiin Somaaaliyaa Hasan Sheek Mohaammud kuni Gaanfa Afrikaaf yaaddoodha jechuun ibsaniiru.

   Faallaan, Pirezidantiin bulchiinsa Somaalilaand Abdurraahimaan Mohaammad Abdullaahi (Irroo) kuni ''seena qabeessa'' jechuun ibsan.

   Waggaa lama dura ulaa galaanatti ishee baasu argachuuf Somaalilaandiif beekamtii ni kenniti jedhamtee kan eegamte Itoophiyaaf maaliif riphxee callifte?

   Guutuu gabaasa kanaa

7. 30 Muddee 2025Biyoonseen garee biliyeenarootatti dabalamuushee barruun Forbes ibse

   

   Madda suuraa, EPA-EFE/REX/Shutterstock

   Sirbituu beekamtuu kan taate Biyoonseen qabeenya horatteen garee biliyeenaroota addunyaatti dabalamuushee barruun qabeenya biliyeenarootaa gabaasuun beekamu Forbes ibse.

   Akka gabaasa Forbes kanatti Biyoonseen sirbitoota biliyeenaroota ta'an keessaa nama shanaffaa ta'uun galmooftee jirti.

   Jalqaba ji'a kanaa qabeenyi Biyoonsee dolaara miliyeena 800tti akka tilmaamu gabaasun yeroo gabaabaa keessatti biliyeenara akka taatu Forbes tilmaamee ture.

   Albamiishee bara 2024 Cowboy Carter jedhu baasteen badhaasa Grammy Awards ittiin argattee turte.

   Biyoonsiin badhaasa Grammy Awards argachuuf si'a afur filannoof dhiyaattuus hin milkoofne ture. Haa ta'u garuu, bara darbe albama hojjatteen yeroo jalqabaaf Grammy Awards badhaafamte.

8. 30 Muddee 2025Akkam bultan?

   Tamsaasa kallattii eegalleerra. Odeessaalee marii nagaa Gaazaan walqabatan, atakaaroo dhimma beekamtii biyyummaa Somaalilaand fi dhimmoota addunyaa kaan asiin isin biraan geenya.

   Nu hordofaa. Tamsaasa kallattii duraanii asii argattu.

   Bakka nagaa oolaa!