Dhaabbannii Iloon Maask waltajjii miidiyaa hawaasaa isaa X bite

Iloon Maask dhaabbannii hubannoo namtolchee xAI jedhamu waltajjii miidiyaa hawaasaa duraan Tiwiteer jedhamu X bitachuu beeksiseera.

Barreeffama Jimaata X irratti maxxanseen, Maask akka jedhetti gatiin xAI daldala istookiin doolaara biiliyoona 80 ta'uu fi kan X doolaara biiliyoona 33 ta'a. Lamaanuu kan Isaati.

Maask bara 2022 Tiwiteer doolaara biiliyoona 44 bite.

"Egereen xAI fi X walitti hidhameera," jechuun Jimaata X irratti barreesse. "Har'a, daataa, moodeelota, shallaggii, raabsaa fi hojjettoota keenya walitti makuun tarkaanfii fudhanneera."

Tarkaanfiin kun invastaroonni X bituuf isa gargaaran, maallaqa akka hin dhabne eeguuf kan kaayyeffate ta'uu mala.

Invastaroonni gurguddoo X fi xAI keessas qooda qabu.

Dhaabileen lamanuu qabeenya guddaas qabu.

Itoophiyaatti dubartoonni dhiirota caalaa miidiyaa hawaasaarratti haasaan jibbaa irra gaha - Qorannoo
''X'' shororkeessitoota irraa kaffaltii fudhataa jedhan duultonni iftooma teeknoloojii
'Abbaa qabeenya Twitter ta’uun mataa dhukkubbiidha'- Iloon Mask

"Dhaabbanni walitti makame kun ergama keenya isa ijoo dhugaa barbaaduu fi beekumsa guddisuudhaaf qabatee ta'ee osoo jiruu muuxannoo gaarii namoota biliyoonaan lakkaa'amaniif ni kenna," jechuun Maask barreesse.

Skip Baay'ee kan dubbifame and continue reading
Baay'ee kan dubbifame

End of Baay'ee kan dubbifame

xAI moodeelota isaa leenjisuuf barreeffamoota miidiyaa hawaasaa X irraa argamu fayyadama.

Maask dhaabbata bara 2015 hoji gaggeessaa olaanaa Saam Altmaan waliin hundeesse Openai irratti falmii seeraa irra jira.

Bara darbe, dhaabbatichii ergama jalqaba hundeeffameef dhiisee bu'aa argachuuf gara moodeela daldalaa ce'aa jira jechuun Maask fi Altmaan himate.

Akka Wool Istiriit Joornaal Jimaata darbe gabaasetti Openai dhaabata Jaappaan Softbank waliin waliigaltee maallaqaa doolaara biiliyoona 40 xumuruu isaa gabaaseera.

Maallaqni kun akka Openai gara dhaabbata bu'aa argachuuf hojjetutti akka of qopheessuuf bakki gurgurtaa Kanaan kenname jedha gabaasichi.

BBC'n waa'ee qophii kanaa Openai gaafatus deebii hin arganne.

Qeeqxonni, Maask dhaabbata Chatgpt hojjete kana to'achuu waan barbaadeef himachaa jira jedhu.

Jalqaba bara kanaa gareen Maaskiin durfamu Openai bitachuuf caalbaasii doolaara biiliyoona 97.4 dhiheessan. Altmaan garuu dhaabbatichi gurgurtaaf akka hin taane dubbate.

Sochiin daldala kun yeroo Maask siyaasaan butame keessatti dhufe.