Man allegedly rapes girl: Ọlọ́pàà fi ṣìkùn òfin mú okùnrin tó bá ọmọ ọdún 17 lòpọ́, tí ọmọ náà sì padà kú

Ileeṣẹ ọlọpaa Naijiria ti ni awọn yoo gbe ọkunrin kan to fi ipa ba ọmọ ọdun mẹtadinlogun kan lopọ, to tun pa ọmọdebinrin naa lọ sile ẹjọ.

Ninu atẹjade kan, agbẹnusọ ileeṣẹ naa ni ipinlẹ Nasarawa sọ pe awọn yoo pe Bako Anjeh lẹjọ ni kete ti wọn ba ti pari iwadii awọn lori ẹsun ti wọn fi kan an.

Lọwọ yii, ọlọpaa ni ọrọ naa ti wa lakata ẹka ileesẹ naa to n ṣewadii iwa ọdaran, CID, ipinlẹ naa.

Bi iṣẹlẹ naa ṣe waye

Wọn ni lọjọ kẹtala, oṣu Kẹrin, ọdun 2022 ni obinrin kan lọ si agọ ọlọpaa ni Akwanga lati fi ẹjọ afurasi naa sun lori bo ṣe gbiyanju lati fi ipa ba ọmọ oun lopọ inu yara rẹ.

Obinrin naa ni ọmọ oun kọ jalẹ.

Amọ, kaka ko fi ọmọ na silẹ, ni ṣe ni afurasi naa fun ọmọde naa ni oogun pakopako.

Gẹgẹ bii ohun ti ọlọpaa sọ, lẹyin ti ọmọ naa mu majele naa tan ni ara rẹ rẹwẹsi, nigba naa ni afurasi ọhun ba ni ibalopọ.

Atẹjade naa ni "Ni kete ti a gbọ nipa iṣẹlẹ naa ni a awọn ọlọpaa to wa lagbegbe Akwanga lọ sibi ti iṣẹlẹ naa ti waye ti a si fi ṣikun ofin mu afurasi ọhun."

Lẹyin naa ni wọn gbe digbadigba lọ sile iwosan ijọba to wa ni Akwanga fun itọju, ti wọn si gba ọrọ rẹ silẹ.

Lẹyinorẹyin, ọmọdebinrin na ku, wọn si ti gbe oku rẹ sile igbokupamọsi fun ayẹwo.