Ковиднинг янги HEC варианти тезликда тарқалмоқда – Европа хавотирда

test

Сурат манбаси, Getty Images

    • Author, Мишел Робертс
    • Role, BBC
  • Ўқилиш вақти: 1 дақ

Илк бор июнда Германияда аниқланган HEC номи берилган ковиднинг ушбу янги варианти шу вақтга қадар 3 та қитъада тарқалишга улгурган.

Олимлар ковид қўзғатувчи вируснинг "энг тарқалувчан" кўринишларидан бири экани айтилаётган HEC тез орада доминант штаммга айланиши мумкинлигидан огоҳлантирмоқда.

Ёзнинг бошида илк бор Берлинда аниқланганда олимлар коронавируснинг омикрон варианти субҳосиласи бўлмиш HEC'нинг бир неча ҳафтадан бир неча ой ичида кенг тарқалишини тахмин қилган эди.

Шу вақтга қадар ўттизга яқин давлатда 500 дан ортиқ HEC'ни юқтириб олиш ҳолати аниқланган.

Таҳлилларга кўра, HEC ҳозирги вақтгача Дания, Германия, Британия ва Нидерландияда тезликда тарқалмоқда.

АҚШ, Хитой, Украина, Португалия, Норвегия, Люксембургда ҳам янги вариантни юқтириш ҳолатлари кузатилган.

Кундалик мутацияга учраб бораётганидан янги вариантнинг куз мавсумида кенгроқ тарқалиш имкониятлари ортаётгани айтилади.

Шундай бир манзарада мутахассислар мавжуд вакциналар беморларнинг оғир ҳолатга тушиб қолиши олдини олишига ишонч билдирмоқда.

Skip Энг кўп ўқилган and continue reading
Энг кўп ўқилган

End of Энг кўп ўқилган

"HEC тарқалишда ковиднинг бошқа вариантлар орасида маълум устунликка эга бўлсада, вакциналар яхши ҳимояни таъминлаб бера олади", дея ишонч билдиради Би-би-си билан гаплашган Лондон университет коллежидаги Генетика институти директори профессор Франсуа Баллоу.

Профессор, бир вақтнинг ўзида, HEC келаётган қиш давомида доминант субвариантга айланиши эҳтимолини ҳам илгари суради.

Олимларнинг фикрича, HEC'нинг юқори суръатда тарқалишига яна бир неча ҳафтадан бир неча ойга қадар вақт бор.

Ковид HEC'нинг симптомлари қандай?

HEC'нинг симптомлари ковиднинг бошқа вариантлариникидан у қадар фарқ қилмайди: юқори иситма, ҳолсизлик, томоқ оғриғи ё йўтал, бўғимлардаги оғриқлар.

Бу вариантни юқтирган одамларнинг аксарияти бир неча ҳафта ичида ўзини яхши ҳис эта бошлаган, аммо асоратлардан халос бўлиш узоқроқ вақт олган.

Британия ковид тестларини олиш даражаси тушиб кетганидан касаллик тарқалиши кўламини билиш қийин бўлаётганини билдирган.

Шундай вақтда, риск гуруҳларига кирувчи ва 65 ёшдан ошган британияликларга бепул бустер вакцина таклиф қилинмоқда.

АҚШ Касалликларни назорат қилиш ва олдини олиш маркази эса одамларга гигиенага амал қилиш ва тоза ҳавода кўпроқ сайр қилишни тавсия қилган.

Бир қанча тадқиқотчилар симптомларни яхшироқ тушуниш учун HEC вариантини яқиндан кузатиш чақириғи билан чиққан.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002