Европа ичидаги келишмовчилик: Путиннинг ёнини олувчи Венгрия жазоланди

Европа Иттифоқининг ташқи ишлар бўйича раҳбари Жозеф Боррелл Венгрияни ташқи ишлар ва мудофаа вазирларининг келгуси саммитига мезбонлик қилиш ҳуқуқидан маҳрум қилди.

Бунга сабаб - Венгриянинг Украинадаги уруш борасидаги мавқеи.

Бир неча ҳафта аввал Европа Иттифоқи Кенгашига президентлик қилиш вазифаси навбати Венгрияга етиб келганди. Одатда бу вазифани қабул қилиб олган Иттифоқ аъзоси ташқи ишлар ва мудофаа вазирлари саммитини ўтказади.

Аммо, Венгрия Бош вазири Виктор Орбан ой бошида Россия Президенти Владимир Путин билан учрашгани Европа Иттифоқининг ғазабини қўзғаган. У учрашувда Путинни қўллаб-қувватлаб келувчи Орбан ЕИ мавқеини 'урушпараст сиёсат' дея тасвирлаган.

Борреллнинг Венгрияни саммитга мезбонлик ҳуқуқидан маҳрум қилиш қарорини расмий Будапешт "буткул ёш болача" қарор дея қоралади.

Ўз қарорини изоҳлар экан, жаноб Боррелл Венгрияга "рамзий бўлса-да, ишора" бериш кераклигини айтди ва Орбанга қуйидагича маслаҳат берди: "Урушқоқ томон ҳақида гапирмоқчи бўлсанг, Путин ҳақида гапир".

"Барча аъзо давлатлар, битта истисно билан, [Венгриянинг] бу мавқеидан норози", - деди Боррелл.

Европа Иттифоқининг 26та аъзосидан фақат биттаси - Словакия бу келишмовчиликда Венгрия ёнини олмоқда.

Венгрия иттифоқ президентлигини қабул қилиб олгач, Бош вазир Орбан ўз таъбиридаги "тинчлик миссияси" доирасида Путин билан учрашган. У, шунингдек, Украина ва Хитойга ташриф буюрган, ва АҚШда Республикачи номзод Доналд Трампни бориб кўрган.

Европа Иттифоқига аъзо давлатлар ташқи ишлар ва мудофаа вазирларининг саммити 28-30 август кунлари Брюсселда бўлиб ўтиши кутилади.

Россия Украинага бостириб кирганидан бери Венгрия ўзи аъзолик қилувчи ЕИнинг Россияга қарши чораларига қарши чиқиб келади.

Ўтган йили Орбан жаноблари Иттифоқнинг Украина учун ажратган 50 миллиард евролик ноҳарбий кўмагини кечиктириш учун қайта-қайта вето қўйган.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002