Байден Украинага Россия ичидаги нуқталарни АҚШ қуроллари билан нишонга олишга рухсат берди - видео
Сурат манбаси, Getty Images
АҚШ расмийларининг айтишларича, Президент Жо Байден Украинага Россия ичидаги нуқталарни нишонга олишга рухсат берган, аммо бу нуқталар фақат Харкив вилояти яқинида бўлиши керак.
Бир расмийнинг Би-би-сига билдиришича, Украина АҚШ қуролларидан "мудофаа мақсадларида" фойдаланишга ва "ўзига Россия кучлари томонидан қилинган ёки тайёрланаётган ҳужумларга қарши ҳужум қилишга" қодир бўлиши керак.
Охирги ҳафталарда Россия қўшинлари ўз чегарасига яқин Харкив вилоятида тўсатдан кенг кўламли ҳужумларни бошлаб, катта ҳудудларни босиб олишга муваффақ бўлганлар.
Жума куни Украина расмийлари Харкив шаҳрининг четидаги турар жойга қилинган Россия ҳужумида уч киши ўлгани ва 16 нафари яраланганини айтди.
АҚШ расмийси Би-би-сига шундай деди: "Бизнинг Россия ичига Армия тактик ракеталар тизими [ATACMS] ва узоқ масофали ҳужумлар қилиш сиёсатимиз ўзгаргани йўқ."
Янги сиёсатга кўра Россия учоқларига ҳужум қилиш мумкинми, дея сўралганида у қуйидагича жавоб қилди: "Биз Украинага ўзига ҳужум қилиш учун келаётган Россия учоғини Россия ҳудудида уриб туширинглар деб ҳеч қачон айтмадик."
Оқ Уй ва Давлат департаменти ҳозирча баёнот бергани йўқ.
Аввалроқ Британия ҳам Ғарб томонидан берилган қуролларни Украина қандай қўллаши борасидаги чекловларни юмшатишга очиқ эканини билдирган.
Аммо, Украинадаги қуролларнинг аксарини етказиб берадиган Вашингтон уруш эскалация бўлишидан хавотирлар туфайли бу чекловларни юмшатишга қарши чиқиб келаётганди.
Россия янги пўписаси билан Ғарбни қўрқитолмадими?
Сўнгги кунларда Россия Ғарбга пўписасини кучайтиргани кузатилмоқда: Сиз берган қурол билан Украина Россия ҳудудига ҳужум қилса, оқибати ўзингизга ёмон бўлади.
Россия нашрлари, сиёсатчилари Учинчи Жаҳон уруши яқинлашганидан огоҳлантираяптилар.
Тошкентда гапирган Президент Путин Харкив жанглари Европага ёйилиши мумкин деди.
Россия таҳлилчиларига кўра, Путин "секин ультиматум" қўйган.
Агар Ғарб қуроллари Россияга қарши ишлатилса, бу нарсани Россия НАТО билан Украинанинг қўшма корхонаси деб талқин қилади, деган.
Ушбу баёнотлар Британия Ташқи ишлар вазири Дэвид Кэмероннинг Украина Британия берган қуроллар билан Россия ҳудудидаги ҳарбий нишонларга зарба бериши мумкин, деб айтгани, НАТО Бош Котиби Йенс Столтенбергнинг Ғарб қуроллари билан Украина Россия ҳудудидаги нишонларга ҳужум қилишга ҳаққи бор, деган баёнотлари ортидан янграмоқда.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Бошқа қатор Европа сиёсатчилари ҳам Украина Россия ичкарисидаги нишонларга ҳужум қилишига рухсат бериш кераклигини айтиб чиқдилар.
АҚШ Давлат Котиби Энтони Блинкен айтишича, "Оқ Уй ўзининг мавқеини "мослаштиради ва ўзгартиради", жанг майдонидаги вазият ўзгаргани туфайли Украинага Америка қуролларини Россияга қарши қўллашига рухсат бериши мумкин.
Таҳлилчиларга кўра, ушбу қадам Президент Байденнинг ўз сиёсатини ўзгартираётганининг яққол белгисидир.
Бунгача Украина ҳарбий иттифоқчиларининг асосий шарти шундай бўлиб келган: биз сизга берган қуролни ўзингизнинг қонуний ҳудудингизни мудофаа қилишга ишлатсангиз бўлади, бироқ зинҳор Россия ичкарисидаги ҳарбий нишонларга отманг!
Украинанинг бугунги сўрови шундай: чегаранинг ортидаги ҳарбий нишонларга ҳужум қилмасак, Москванинг Харкив вилоятидаги ҳудудларни тез босиб олаётганини тўхтатиш ва тобора "очилиб қолиб" душман ҳамласини қайтариш оғирлашиб бораётган Донецк жабҳа чизиғи мудофаасини таъминлаш қийин бўлади.
Мухбирларнинг ёзишича, АҚШ ҳамда НАТО Бош котиби Йенс Столтенбергга Ғарб артиллерия снарядлари ва ракеталари билан Россиянинг ичкарисидаги қўмондонлик нуқталарига ҳужум қилишга Украинага рухсат берилганидагина Украина душманини чекинтира олади деган босим ортиб бормоқда.
30 май куни Чехия пойтахти Прагада НАТОга аъзо мамлакатлар ташқи ишлари вазирларининг учрашуви режаланган.
14 май. Блинкен Киевда, Россия Харковда янги фронт очди, ёзда Украинага қийин бўладими?
Сурат манбаси, Reuters
Россия Харковда яна бир уруш жабҳаси очаркан, АҚШ Давлат котиби Энтони Блинкен кутилмаган ташриф билан Украинага келди. Россия ҳужумлари ортаркан бу ёз Украинага ўта қийин бўлиши айтилмоқда.
Киевда президент Зеленский билан учрашган Энтони Блинкен АҚШ ҳарбий ёрдами "аллақачон йўлда эканлиги"ни, бир қисми келиб, яна келаётганини айтди.
Унинг таъкидлашича, бу давом этаётган Россия агрессиясида "вазиятни жиддий ўзгартириши" мумкин.
"Биз Украинанинг бошқа кўплаб ҳамкорлари қатори сизнинг жанг майдонида ғалаба қозонишингизни таъминлаш учун қатъий қарорлимиз", деган у.
Блинкен билан бирга Киевга келган делегация таркибидаги АҚШнинг юқори лавозимли мулозими AFP нашрига аноним тарзда ушбу ташрифдан мақсад украиналикларга аниқ сигнал бериш эканлигини айтган.
АҚШ Давлат котиби Россия Украинага бостириб киргандан бери Киевга тўртинчи марта сафар қилиши.
Россия Харковда янги фронт очди
Сурат манбаси, Reuters
Энтони Блинкеннинг Киевга эълон қилинмаган ташрифи Россия қўшинлари Украинанинг Харков вилоятига кенг кўламли ҳужумларни бошлаганидан 4 кун ўтиб содир бўлди.
Путин Москвада Ғалаба парадини ўтказгандан бир кун ўтиб 10 май куни тонгда Россия қўшинлари Харков вилояти чегарасини кесиб ўтишди ва вилоят маъмурий маркази томон ҳаракатлана бошлашди.
4 кунлик ҳужум натижасида Россия армияси давлат чегараси бўйлаб ёйилган ўнлаб катта қишлоқларни босиб олди. Ҳарбийлар Украина чегараси ичига 5-6 чақирим кирди ва яегара бўйлаб 30 чақирим масофани эгаллашнинг уддасидан чиқди.
Украина Қуролли кучлари душманни Липц қишлоғи яқинидаги тепалик ёнида ушлашга ҳамда Волчанск қишлоғини босиб олмаслик учун курашмоқда.
Украина Қуролли кучлари Бош қўмондони Александр Сирский вазиятни кескин деган. Харков йўналишидаги жангларда иштирок этаётган Украина ҳарбийлари ҳарбий истеҳкомлар ва қўмондонлик билан боғлиқ муаммолар ҳақида гапирмоқда.
Украина Мудофаа вазирлигига қошидаги Разведка Бош бошқармаси раҳбари Кирилл Буданов Россия Сум вилоятига ҳам ҳужум қилишни режалаштирганини, аммо бунинг уддасидан чиқмаганини айтган.
Олдинроқ у New York Times нашрига берган интервюсида Россия қўшинлари яқин вақт ичида Сум вилоятига ҳужум бошлаши мумкинлигини билдирганди.
Шунингдек, у Украина кучларининг захираси тугаб бораётганини ва вазият оғир даражага яқинлигини таъкидлаган.
Украина Разведка бошлиғи New York Times билан суҳбати инглиз тилида чоп қилинган ва Буданов аслида фикрини қандай шаклда бергани аниқ эмас.
Кейинчалик Украина телемарафонида гапирган Буданов Харковдаги вазиятни некбин ҳолатда эканлигини айтган.
"Улар сезиларли ютуқларга эришди дейиш нотўғри. Вазият ўта таранглиги, жуда тез ўзгараётганини ёдда тутиш керак. Аммо ўтган тун билан солиштирганда, менимча, вазият барқарорлашиши учун тезкор тенденция кузатилди", деган Украина Разведка Бош бошқармаси раҳбари Кирилл Буданов.
Будановнинг айтишича, Россия тез орада Харков вилоятига қолган захирасини юбориши мумкин.
Британия Мудофаа вазири: Ёзда қийин бўлади, аммо Украина эплайди
Сурат манбаси, Getty Images
Буюк Британия Мудофаа вазири Грант Шэппс Би-би-сига келаётган ёз Украина армиясига қийин бўлишини, аммо улар қарши тура олишини айтди.
"Ёз қийин бўлиши шубҳасиз. Аммо Украина бундан омон чиқишига шубҳам йўқ", деган Шэппс.
Унинг қўшимча қилишича, "Украина доим дунё кутганидан ортиғини қилган" ва мамлакатдаги вазият Россия 2022 йилнинг февралида бостириб кирганидан бери қийин ҳолатда қолмоқда.
Мудофаа вазиридан Харковдаги вазиятнинг кескинлашувига 6 ой Украинага ҳарбий ёрдам бериш масаласини Конгрессда ҳал қилолмаган АҚШнинг ҳам айби борми, деб сўралди.
Британия Мудофаа вазири хавотирларга сабабни Украинада бўлаётган воқеаларга эътиборнинг сусайишида кўришини айтди.
Шэппсга кўра, АҚШдаги ички сиёсий муаммолар айрим муаммоларни келтириб чиқаргани ҳаммага маълум. Аммо энди эътиборни келажакка қаратиш лозим, чунки ўтмишни ўзгартириб бўлмайди.
BBC.COM/UZBEK
Telegramda bog'lanish raqami +44 7858860002
