Украина уруши: Россия Президенти Путин Такер Карлсонга нималар деди?

Америкалик машҳур журналист Такер Карлсон Россия Президенти Владимир Путин билан интервьюсини эълон қилди.

Такер Карлсон Путин билан икки соатлик суҳбатини ўзининг веб-саҳифасида ва бир неча платформаларда эълон қилди.

Шунингдек, интервьюни Кремль расмий сайти ҳам кўчириб босди.

Алоқадор мавзулар:

Россия президенти матбуот котиби Дмитрий Песков айтишича, Карлсон билан интервьюдан кейин дунёнинг энг йирик оммавий ахборот воситаларидан Россия Президенти Путин билан суҳбат уюштириб бериш сўрови билан ўнлаб сўровлар келиб тушган.

"Булар Америка Қўшма Штатлари ОАВлари ҳам, Франция, Италия, Австрия, Австралия ОАВлари ҳам. Дунёнинг энг йирик ОАВлари", деб айтган Песков.

Такер Карлсон Ғарб матбуотини бир ёқламаликда айблаган, Путин билан суҳбатга ҳаракат қилмадилар, деган.

Карлсоннинг бу гапини СNN халқаро янгиликлар бўйича бош бошловчиси Кристиана Аманпур бемантиқ деб атади.

"Биз Путин билан интервьюни доим сўраймиз, бир неча йиллардан бери сўраймиз", деди Аманпур хоним.

Би-би-сининг Россия бўйича муҳаррири Стив Розенберг охирги бир ярим йил мобайнида Кремлга бир неча марта Россия президенти билан суҳбатга рухсат сўраб мурожаат этганини ва доим йўқ жавоби олганини тасдиқлади.

Ғарб оммавий ахборот воситалари Путин билан интервью сўрашганини Россия президенти матбуот котиби Дмитрий Песков ҳам тасдиқлади.

Лекин йўқ деб жавоб берилгани сабаби, Песков таъбирича, бу журналистларнинг нохолис бўлганларида.

"Шунинг учун ҳам бундай интервьюлардан маъни йўқ эди", деб айтган Дмитрий Песков.

Кремль фикрича, Такер Карлсоннинг позицияси "бошқаларникидан фарқ қилади": "У ҳеч ҳам россияпараст эмас, у украинапараст ҳам эмас. У кўпроқ америкапараст. Ҳар қалай, анъанавий англосаксон оммавий ахборот воситалари мавқеидан кескин фарқ қилади".

Такер Карлсон Владимир Путинни бир неча марта мақтаб гапирган.

Ўтган йили АҚШнинг Fox News телеканали Такер Карлсон билан шартномасини узган, у бир кунда ишсиз қолган эди.

Путин нима деди?

Путин Украинадаги урушда яна Ғарбни - НАТОни шарққа кенгайтириш ва Украинани бу иттифоққа киритишга уринишда айблади.

Президент Путин айтишича, 2000 йилларда илк бор президент бўлганида Россия билан Ғарб муносабатларини яхшилашга уринган.

Лекин Ғарбнинг Россияга нисбатан душманона муносабати ўзгармаган.

"Россия бизни "ривожланган халқларнинг биродар оиласига қўшишади" деб умид қилди. Ҳечам бундай бўлмади. Сиз бизни алдадингиз-ку. Сиз деганда мен шахсан сизни эмас, албатта, Қўшма Штатларини назарда тутаяпман. НАТО Шарққа кенгаймайди, деб ваъда беришди. Лекин бу нарса беш марта бўлди, кенгайишнинг беш тўлқини", деди Президент Путин.

Путин айтишича, 2022 йил мартида Украина билан урушни тўхтатишга келишишган.

Истамбул келишувини имзолаш қолган, холос.

Лекин Вашингтон ва Буюк Британиянинг собиқ бош вазири Борис Жонсоннинг аралашуви туфайли уруш давом этаяпти, деди Путин.

Карлсон, Россия Польшага ҳужум қиладими, деб сўради.

"Агар Польша Россияга ҳужум қилса", деб жавоб берди Президент Путин.

"Бизнинг Польшада ҳам, Латвияда ҳам, бошқа жойда ҳам ҳеч қандай манфаатимиз йўқ. Бизга бу нимага керак? Бизда ҳеч қандай манфаат йўқ", деди Россия президенти.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002