АҚШ президенти Байденга қарши импичмент текширувлари ҳақида нималар маълум? Yangiliklar, Dunyo

Республикачи партия етакчиларидан Кевин МакКарти Президент Жо Байденга қарши импичмент сўровини расман эълон қилди. Унинг даъво қилишича, Байден атрофида "коррупцион маданият" шакллангани фош қилинган.

Ушбу текширувда президентнинг ўғли Ҳантер Байденнинг номақбул бизнес фаолияти ва президент бундан фойда олганига доир айбловларга эътибор қаратилган.

Республикачиларнинг ойларча давом этган терговлари жаноб Байденнинг ноқонуний ишларини фош қилганича йўқ ва уларнинг иддаоларини Демократлар танқид қилиб келмоқда.

Қуйида ушбу текширувда қандай аниқ даъволар илгари сурилаётганига назар ташлаймиз.

Байденлар оиласи олган пуллар

Август бошларида эълон қилинган меморандумда Вакиллар палатаси назорат қўмитаси Байденлар оиласи ва уларнинг бизнес ҳамкорлари Хитой, Қозоғистон, Украина, Россия ва Руминия каби хорижий давлатлардан 20 миллион доллардан ортиқ маблағ олганини даъво қилган.

Қўмита раиси, Кентуккидан республикачи вакил Жеймс Комер бирор катта далилларсиз айтишича, Ҳантер Байден Барак Обама вақтида вице-президент бўлган отаси номини "сотиб" "олигархлардан миллионлаб доллар" ундирган.

Аммо 9 август куни чиққан баёнотда жаноб Комернинг айтишича, бунинг эвазига "Байден тармоғи, хусусан, Жо Байденнинг ўзи билан боғланишга ёрдам беришдан бўлак хизмат кўрсатилмаган". Унинг яна айтишича, катта Байден Вашингтондаги ҳашаматли ресторанда "унинг ўғлига пул ўтказган дунёнинг турли томонларидан бўлган олигархлар билан" тушлик қилган.

Бироқ, қўмита томонидан олинган банк ёзувларига асосланган учта алоҳида ҳужжатда президент Байденга тўланган аниқ тўловлар кўрсатилмаган ёки президентнинг улардан тўғридан-тўғри фойда кўрганлиги тасдиқланмади.

Август ойида Washington Post нашр қилган далиллар таҳлили кўрсатишича, атиги 7 миллион доллар Байден оиласи аъзоларига, асосан Ҳантерга, қолганлари эса «шерикларга» кетган. Жаноб Комер ва бошқа республикачи қонунчилар 20 миллион долларнинг ҳаммаси Байден оиласига ўтганини айтмоқда.

Жо Байден «бренд» сифатида

Ҳантер Байденнинг собиқ бизнес шериги Девон Арчернинг айтишича, катта Байден потенциал бизнес ҳамкорлар, шу жумладан, чет эл фуқаролари билан 10 йил давомида "балки 20 марта" учрашиб суҳбатлашган.

Вакиллар палатасидаги республикачиларнинг айтишича, қўнғироқлар Жо Байденнинг ўғли билан ҳеч қачон бизнес битимларини муҳокама қилмагани ҳақидаги гапларини инкор қилади.

Жаноб Арчернинг гувоҳлик беришича, телефон қўнғироқлари "шунчаки суҳбатлар" бўлиб, улар ҳеч қачон Ҳантер Байденнинг бизнес муносабатларига доир бўлмаган ва "ҳеч қачон бирор бизнес битими муҳокама қилинмаган".

Конгресснинг Демократлар билан боғлиқ бўлган Integrity Project гуруҳи ҳисоботида айтилишича, жаноб Арчернинг кўрсатмалари жаноб Байден ўз ўғлининг бизнесига ишлагани ҳақида "заррача далил бўла олмайди".

Гўёки пора схемаси

Республикачилар, шунингдек, Жо Байден бошқарув кенгашида Ҳантер Байден ҳам бўлган Украинанинг Burisma энергетика компаниясига оид терговни тўхтатиш учун Украина ҳукуматига таниқли прокурорни ишдан бўшатиш учун босим ўтказганлиги ҳақидаги тасдиқланмаган ФҚБ маълумотларини келтирган. Ушбу даъво биринчи марта 2019 йилда, ўша пайтдаги президент Доналд Трампнинг биринчи импичменти пайтида пайдо бўлган эди.

ФҚБ маълумотлари тафсилотлари ҳақидаги ҳужжат июль ойида республикачи сенатор Чак Грассли томонидан олинган ва эълон қилинган. Ҳужжатга кўра, Burisma компаниясининг собиқ бош директори Николай Злочевский Жо ва Ҳантер Байденларнинг ҳар бирига 5 миллион доллар тўлаганини айтган.

Адлия департаменти даъвони Трамп маъмурияти давридаёқ саккиз ой давомида текширган, аммо охир-оқибат "далил етарли бўлмагани" сабабли терговни тўхтатганди.

Кейинчалик Злочевский бу даъвони рад этди ва, Демократ вакил Жейми Раскин томонидан эълон қилинган интервью стенограммасига кўра, у Жо Байден ёки унинг ходимлари билан ҳеч қандай алоқаси йўқлигини ва Байден вице-президентлик даврида унга ёки компанияга ҳеч қачон ёрдам бермаганини айтган.

Жаноб Арчер ҳам бундай тўловлардан хабардор эмаслигини таъкидлаб гувоҳлик берган.

Ҳантер Байденга имтиёзли муносабат

Икки Ички Даромад Хизматидан (Internal Revenue Service - IRS) икки манбадан иқтибос келтирган ҳолда, Вакиллар палатаси республикачилари Адлия вазирлиги Ҳантер Байденнинг солиқ декларацияси бўйича йиллар давомида олиб борилаётган терговга атай аралашганини ҳам даъво қилмоқда.

Жорий йил бошида берган гувоҳликларида IRS нинг икки агенти Адлия вазирлиги "имиллаб" ишлаётгани ва терговни тўсиб қўйганини айтган эди.

Вакиллар палатаси республикачиларининг таъкидлашича, бу гувоҳлик Адлия вазирлиги Байден номидан Доналд Трампни жиноий жавобгарликка тортиш учун ишлагани ва президент ўғлига нисбатан эса юмшоқ муносабатда бўлганлигидан далолатдир.

Вазирлик бу даъволарни рад этди. Июль ойида республикачи вакиллар сўроқ қилган бошқа гувоҳлар, на президент Байден ва на Бош прокурор Меррик Гарланд терговга аралашганини айтишган.

Burisma бўйича текширувлардаги «яширин келишув»

Импичмент бўйича текширув эълон қилинаётганда МакКарти Жо Байденнинг ходимлари ва Ҳантер Байден жамоаси ўртасидаги тахминий алоқаларга ҳам ишора қилди.

Жаноб МакКарти аниқ маълумот бермаган, аммо Вакиллар палатаси Назорат қўмитасининг вице-президент идораси ва Ҳантер Байденнинг бизнес ҳамкори Burisma'даги коррупцияга оид ОАВ саволларига жавобларни мувофиқлаштириш учун "яширин келишув қилган" деган даъволарини такрорлаган.

Қўмита 2015 йил декабрь ойида Байденнинг оилавий бизнес ҳамкори Эрик Швериннинг вице-президент идораси ходими Кейт Бедингфилдга юборган электрон мактубини келтирди. Мактубда Шверин Оқ уй Ҳантер Байденнинг Burisma'даги роли ҳақида ОАВ сўровларига қандай жавоб бериши кераклиги айтилган экан.

Қўмита маълумотига кўра, Бедингфилд хоним вице-президент Байден буни «имзолаган» деб жавоб берган.

Оқ уй сўзчиси Ян Сэмснинг айтишича, Burisma'га қўйилган айбловлар "солиқ тўловчининг вақти ва ресурси асоссиз равишда «товуқ қувлашга» сарфланган бир неча ойлик саъй-ҳаракатнинг" бир қисмидир.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002