Янгиликлар: Қабр устидаги рақс ёки аёлни ким тириклай кўмди? Dunyo Ayollar Yangiliklar

Бутун мамлакатни ларзага солган даҳшатли қотиллик сири очилди.

Алоқадор мавзулар:

Шакира Халилий Ҳиндистон жанубидаги Карнатака штатидаги зодагон оиладан чиққан "бой ва гўзал" аёл эди. Аммо 1991 йили бу бой меросхўр аёл кутилмаганда ҳавога синггандек ғойиб бўлди.

Уч йил давомида унинг иккинчи эри, Свами Шрадҳананда исми билан танилган Мурали Маноҳар Мишра унинг қаердалиги ҳақида ажабтовур ҳикояларни айтиб юрди.

1994 йили Шакиранинг жасади уларнинг Бангалор шаҳридаги ҳашаматли уйи ҳовлисидан қазиб олинди. Шакирага дори берилган, ёғоч қутига солинган ва - кейинроқ маълум бўлишича - тириклай кўмилган экан.

2003 йили суд Шрадҳанандани қотилликда айбдор, деб топди ва унга ўлим ҳукмини чиқарди, кейинроқ бу ҳукмни юқори турувчи суд ҳам тасдиқлади. Суднинг таъкидлашича, у Шакирага миллиардлаб рупи мулклари ва бойлиги учун уйланган.

Унинг апелляция аризасини кўриб чиққан Олий суд ишни "эркак очофатлиги ва иблис найранги қоришмаси" дея таърифлади, аммо ҳукмни авф этилмаслик шарти билан бир умрлик қамоққа ўзгартирди. Ўтган ой Олий суд унинг шартли озод қилиш ҳақидаги аризасини рад қилди.

30 йил илгари Ҳиндистонни даҳшатга солган бу шов-шувли жиноят ҳужжатли фильмга айлантирилди ва Amazon Prime Video'да "Гўр устидаги рақс" номи билан намойиш қилинди. Ҳужжатли фильмнинг бундай аталиши сабаби Шрадҳананда хотинининг гўри бўлган ховлисида рақс кечалари ташкил қилган.

India Today Originals Production'дан фильм продюсери Чандни Ахлават Даваснинг айтишича, бу ақл бовар қилмас жиноят борасида ҳамон "нима, қачон, қаерда" саволлари турибди.

"30 йил бўлганига қарамай, биз бу жиноятга яна эътибор қаратиш зарур деб ҳисобладик, чунки у ҳамон жуда сирли", деб қўшимча қилади у.

Қотиллик ва қотил ҳақидаги бу сериал барча саволларга жавоб бера олмаган, аммо унинг қизиқарлилиги Ҳиндистонда жиддий эътибор жалб қилган.

Тўрт қисмдан иборат фильмнинг биринчи икки қисми Шакиранинг ҳаётига бағишланган.

Мисор, Бангалор, Жайпур ва Ҳайдаробод штатларини бошқарган ва бир қанча кўзга кўринган бинолар ва ёдгорликлар бунёд этган сэр Мирзо Исмоилнинг набираси бўлмиш Шакира дипломат Акбар Халилийга турмушга чиққан ва тўрт қизнинг онаси эди.

Қариндошлари уни "мафтункор, характери юксак" бўлган, "эски автомашиналарга қизиқадиган, киришимли, севадиган ва севиладиган" эди дея таърифлашади.

Аммо 1980 йиллар ўрталарида у Шрадҳанандани учратади ва ҳаётида кескин бурилиш рўй беради.

Ўша вақтларда "Times of India" газетасида ишлаган ва ҳозирда Би-би-си Ҳинд хизматида фаолият кўрсатувчи Имрон Қурейший мазкур сериалда "бу қотиллик ўзининг рўй бериш шакли билан, яъни у тириклай кўмилгани учун одамларни даҳшатга солди", дейди.

Бу жиноят шов шув бўлгани сабабларидан яна бири "Шакира биринчи эридан ажрашиб, Шрадҳананда каби бир эркакка турмушга чиққани эди", деб қўшимча қилади у.

Ўша вақтда мутбуотда чиққан хабарларда Шрадҳананда камбағал оиладан чиққан, мактабни битирмай ташлаб кетган, Шакиранинг "айрим мулкий муаммоларини ҳал қилишга ёрдам бериб" ёки ғайритабиий кучга эга эканлигини даъво қилиб, Шакиранинг ўғил кўриш истагини амалга оширишга ёрдам бераман деб унинг ишончига кирган "сохта руҳоний ота" ва "югурдак бола", деб таърифланади.

Хабарларда айтилишича, уларнинг муносабатлари 1986 йилда турмуш қурганларидан кўп ўтмай бузилган ва улар кўпинча пул устида жанжаллашган. Бу қўйди-чиқдилар Шраддҳананданинг уни шундай даҳшатли тарзда ўлдиришигача давом этган.

Аммо биринчи инстанция суди, апелляция суди ва Олий суднинг жами саккиз нафар судьяси томонидан айбдор деб топилганига қарамай, унинг адвокати мижозига қарши далиллар шартли эканлигини таъкидламоқда. Веб-сериалларда Шраддҳананданинг ўзи ҳали ҳам ўз жиноятини рад этади.

Баъзилар бу сериал қотил учун минбар бўлди демоқда, аммо "Гўр устидаги рақс" фильми сценарийсини ёзган ва режиссёрлик қилган британиялик режиссёр Патрик Грем Шраддҳананданинг ҳикоясига катта эътибор бериш қарори тўғри бўлганини таъкидлайди.

"Менимча, унинг гапини эшитишимиз жуда муҳим, айниқса, сўнгги 30 йил ичида биз ундан ҳеч нарса эшитмаганимизни ҳисобга олсак. Бундан ташқари, у бизга Шакирнинг характери ҳақида кўп маълумот берди", дейди у Би-би-сига.

Гремнинг айтишича, тасвирга олиш жамоаси Шраддҳананда каби бир одам қандай қилиб Шакира каби аёлга таъсир ўтказа олганини билиш учун қамоқхонага бориб, у билан гаплашган.

"Аммо у ҳатто бизни ҳам бошиданоқ ҳикоянинг кўп қатламлари борлигига ишонтирай деди, ваҳоланки, биз у билан суҳбатни тугатгунимизгача ҳам унинг жиноятига ҳеч биримиз шубҳа қилмагандик."

Режиссёрнинг айтишича, жамоа "бу заиф чолнинг олдида безоридек кўринсак керак деган ўй билан у билан кўришди. Аммо биз бу воқеа ҳақида кўпроқ билгач, у билан кўпроқ суҳбатлашгач, билдикки, у бизни ўйин қилмоқчи бўляпти, ҳикояларни тўқиб ташлаяпти".

"У билан қанча кўп вақт ўтказсак, унинг ҳис-туйғулари самимий эмаслиги шунчалик аниқ бўлди, аммо охиригача у билан жиддий суҳбатлашишга ҳаракат қилдик", дейди Грем.

Унинг айтишича, Шраддҳананда "ўзининг айбсизлигини, ўзига нисбатан ёмон муносабатда бўлишганини" айтаётганда алжираб, овози кўтарила бошлаган.

Гремнинг сўзларига кўра, жиноятлар ҳақидаги кўплаб фильмларда жиноятчи "даҳо" қилиб тасвирланади.

"Аммо мен буни қилишни истамаслигим аниқ эди. Тўғри, Шраддҳанандада турлича қобилиятлар бор, улардан бири одамларнинг ишончига кира олиш", дейди у.

Аммо охир-оқибат у барибир Ҳиндистон судларини ўзининг айбсизлигига ишонтира олмади.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002