Украина уруши: Путин Херсонга бордими ёки...? Ukraina Putin Dunyo Yangiliklar

Кремль хабар қилишича, Россия Президенти Владимир Путин Украинанинг босиб олинган ҳудудлари Херсон ва Луҳанскка борган.

Россия телеканалларида Президент Путиннинг ҳарбий қўмондонлар билан учрашуви видеолари намойиш этилган.

Кремлга кўра, Россия раҳбари Мудофаа вазирлиги қўмондонларининг ҳисоботларини эшитган.

Украинанинг Херсон ва Луҳанск вилоятларини Россия ўтган йили ўзига аннексия қилган эди.

Алоқадор мавзулар:

Россия Президенти Путиннинг бундай сафарлари камдан-кам юз бериб туради, бир ой олдин - март ойида унинг Мариуполь шаҳрига боргани хабар қилинган эди.

Аммо бундан олдин Путиннинг видеолари бошқа-бошқа жойларда тасвирга олингани ва монтаж қилингани даъволари янграган эди.

Кремлга кўра, Путиннинг бундай сафарлари "олдиндан тайёрланмайди".

Россия президентининг Херсон вилоятининг қайси жойига ва қайси куни боргани аниқ эмас.

Аммо видеода бир жойда Президент Путин Насронийлар байрами Пасхани назарда тутиб, "яқинлашиб келаётган" деб айтади.

Православ христианлар Пасха байрамини 16 апрелда нишонладилар.

Россия матбуоти хабар қилишича, президент Запорижия вилоятидаги вазият билан ҳам танишган, Запорижияни ҳам Москва ўтган йили Россияники деб даъво қилган эди.

2022 йил февралида Украинага бостириб кирганидан кейин Россия ўз қўлида ушлаб қолган ягона вилоят маркази Херсон шаҳри эди.

Аммо Херсон шаҳрини ҳам сентябрь ойида Россия қўшинлари ташлаб чиқишга мажбур бўлган, вилоятнинг Днипро дарёси чап соҳилидаги ҳудудини назорат қилаяптилар.

Россия телеканалларида намойиш этилган видеода Путин далага қўнган вертолётдан тушиб келади.

Сўнг автомобиллар карвони кетаётган йўлда Геническ шаҳри ёзуви кўринади.

Президент Путинни генерал-полковник Олег Макаревич қарши олгани хабар қилинди.

Сўнг бошқарув хонасидаги мажлис видоеси кўрсатилади.

Мажлисда Путин генерал-полковник Олег Макаревич билан Россия ҳаво мудофааси қўшинлари қўмондони генерал-полковник Михаил Теплинскийнинг ўртасида ўтиради.

Унда Россия Президенти Путин, "воқеалар қандай ривожланаётгани ҳақида сизларнинг фикрларингизни эшитмоқчиман, ахборот алмашмоқчиман", дейди.

Америкалик ҳарбий экспертлар ва Британия разведкаси генерал Теплинскийнинг шу йил январида бошқарувдан четлатилгани ва яқинда яна фронтга қайтарилгани ҳақида хабар қилдилар.

Видеода Путин Теплинский ҳисоботини мақтайди.

Британия Мудофаа вазирлиги истиҳбороти шундай ёзади: "Афтидан, Теплинский ҳамма орасида кенг ҳурматга сазовор бўлиб қолган кам сонли Россия генералларидан бири".

Кремль хабар қилишича, сўнг Президент Путин "Восток" қўшинлари бош қароргоҳига борган.

Бу қароргоҳнинг Луҳанск вилоятида Росгвардияга тегишли бино экани айтилади.

У ерда Россия қуруқлик қўшинлари қўмондони генерал-полковник Александр Лапин Путинни қарши олган.

АҚШдаги Урушни ўрганиш институти (ISW) таҳлилича, Путин 9 майда Бахмутни босиб олишни жуда хоҳлаяпти.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002