Янгиликлар. Россия: Украина Путинни қўрқитдими? Rossiya Ukraina Putin Dunyo Yangiliklar

Путин Шимолий Кавказга сафарини бекор қилди. Россияда нима бўлди?

Россия томони шу пайтгача кузатилмаган баёнот билан чиқди.

Алоқадор мавзулар:

Россияда нима бўлди?

Путиннинг айтишича, Украинанинг саботаж гуруҳи кеча, пайшанба куни Россия ҳудудига кирган. Тинч фуқароларни ўққа тутган.

Россия президенти буни "террорчилик амали", деб атаган, ўзининг Шимолий Кавказга режаланган сафарини бекор қилган.

Брянск вилояти губернаторининг айтишича, ҳодиса чегарага яқин Любечане қишлоғида юз берган.

"Украиналик саботажчилар икки кишини ўлдириб, 10 яшар болакайни яралашган".

Расмий Киев эса, Россия томонининг даъволарини кескин рад этган.

Украина бунинг "провокация" эканини айтган.

Интернетда эса, ўзини "Россия кўнгиллилар корпуси", деб атаган гуруҳ ҳодиса учун масъулиятни ўз зиммасига олган видео пайдо бўлган.

"Саботажчилар"нинг аллақачон Россия ҳудудини тарк этишгани айтилмоқда.

Брянскда нималар юз бергани ҳалича мустақил манбалар орқали тасдиқланмаган.

Акс-садолар

Украина президенти маслаҳатчиси Михайло Подольяк ўз твитида буни "атайдан қилинган провокация", деб атаган.

Унга кўра, "Россия бошқа давлатга қилган ҳужумини оқлаш учун халқни қўрқитмоқчи".

Россия бундан аввал Украина ўзининг чегарадош ҳудудлари, жумладан, Брянск вилоятига ракета ва дронлари билан зарба бергани ҳақидаги даъволар билан чиққан.

Аммо шу пайтгача Украина пиёда қўшинларининг қуруқликдан Россия ҳудудига киришганига тасдиқланган хабарлар кузатилмаган.

Россия Федерал Хавфсизлик Хизматининг баён қилишича, кучлари ва мунтазам қўшинлари пайшанба куни мамлакат ҳудудига ўтиб, одамларни гаровга олган "украиналик миллатчилар" билан тўқнашишган.

Кейин эса, Россиянинг йирик артиллерия ҳужумига учраб, Украина ҳудудига қайтишга мажбур бўлишган.

Россия Федерал Хавфсизлик Хизматининг даъво қилишича, улар ўзларининг ортларидан қишлоқда катта миқдорда портловчи моддалар қолдиришган.

Ҳодиса юз берган куни президент Путин телевидение орқали чиқиш қилган.

"Бугун улар яна бир террорчилик амали, яна бир жиноят содир этишди, чегара ҳудудига кириб, тинч аҳолига қарата ўт очишди", - деб айтган Россия президенти.

Бунинг ортидан эса, "уларнинг ҳеч нарсага эриша олмасликлари, сиқиб чиқарилишлари"ни ҳам илова қилган.

"Россия кўнгиллилар корпуси"

Интернетда Украинада жойлашган "Россия кўнгиллилар корпуси" аъзолари маҳаллий шифохона ташқарисида акс этган видео пайдо бўлган.

Telegram'да эълон қилинган мазкур видеода қуролланган бир эркак ўзларининг Россия ҳудудига ўтганликларини айтади.

Bellingcat Monitoring журналистик тадқиқот гуруҳининг маълумотларига таянилса, "Россия кўнгиллилар корпуси" расман ўтган йил тузилган бўлинма.

"Асосан Украинада фаол бўлган Путин ва Кремлга қарши россиялик ўта ўнг қанот кайфиятдаги кишилардан ташкил топган".

Bellingcat эксперти Майкл Колборн мазкур видеодаги эркаклардан бири "Россия кўнгиллилар корпуси" раҳбари Денис Капустин эканини аниқлаган. У Никитин шарифидан ҳам фойдаланади.

Колборннинг Би-би-сига айтишича, "мазкур гуруҳ ҳақиқий ёки жиддий жангларда иштирок этадигандек кўринмайди".

"Капустин жисмоний жанговар спорт малакасига эга бўлиши мумкин, аммо у ҳеч қандай ҳарбий маълумотга эга эмас".

Видеога илова қилган матнида эса, гуруҳ "юртдошларига қурол кўтариб юрган русларнинг режимга қарши кураша олишига умид борлигини кўрсатиш учун Брянскка кирганликлари"ни таъкидлаган.

Мазкур видеони шарҳларкан, Украина ҳарбий разведкаси ходими Андрей Юсов, "булар Путин режимига қарши қурол билан курашаётган ва уни қўллаб-қувватлаётган одамлар" эканликларини айтган.

"Балки руслар уйғониб, ниманидир тушуниб, энди қандайдир аниқ қадамлар қўйишаётгандир", - дея фикр юритган у.

Кучаяётган айбловлар

Кечаётган ҳафтада Путин Украина ва Ғарб жосусларини Россия ичкарисида ўз фаолиятларини кучайтираётганликда айблаб чиқди.

Россия расмийларининг билдиришича, Москвадан бор-йўғи 100 чақирим узоқликдаги Коломна туманида дрон ҳалокатга учраган.

Россия жанубида Украинанинг икки дрони уриб туширилган.

Аммо Коломнада ҳалокатга учраган дроннинг Украинаники экани тасдиқланмаган.

Россия бундан аввал мамлакат жанубида жойлашган ва Украинага ҳужум уюштиришда фойдаланиб келган ҳаво базасининг ҳам дрон ҳужумига учраганлигини даъво қилиб чиққан.

Расмий Киев эса, Россия ичкарисида кузатилаётган дрон ҳужумлари ўз ишлари эмаслигини айтиб чиққан.

Украина томонига кўра, бу - Кремлнинг пропагандаси.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.