Янгиликлар: Ўзбекистон Украинага ёрдамни тўхтатдими? Ўзбекистонда қанча украиналик қочқин бор? Dunyo, Rossiya

Ўзбекистон охирги марта Украинага ўтган йилнинг апрел ойида инсонпарварлик ёрдами юборган. Ўзбекистонда урушдан қочган қанча украиналик борлиги маълум қилинди.

Украинанинг Ўзбекистондаги элчиси Микола Дорошенко gazeta.uz га берган интервюсида Ўзбекистоннинг Украианага ёрдами борасидаги саволга ҳам жавоб берди.

"Ўзбекистон бизга инсонпарварлик ёрдами кўрсатди ва бунинг учун мен ҳукуматга миннатдорчилик билдираман. Афсуслар бўлсинким, энг сўнгги қисмни биз ўтган йилнинг апрелида олгандик. Биз мунтазам энергетика ва инсонпарварлик соҳасида ёрдам беришни сўраб мурожаат қиляпмиз. Мурожаатларимиз ижобий ечим топишига катта умид қиляпман", дейди Микола Дорошенко.

Элчи, шунингдек, Ўзбекистон нафақат ёрдам кўрсатишни давом эттиришига, балки Украина эҳтиёж сезаётган махсулотлар турларини кенгайтиришга ҳам умид билдирган.

Суҳбатдан маълум бўлишича, Украина элчихонаси ёрдам учун махсус банк ҳисоби очган ва келиб тушган маблағ фақат ижтимоий лойиҳаларга сарфланишини маълум қилган.

Элчи ҳисоб рақамига қанча маблағ келиб тушганини айтмаган, бироқ уч ой давомида йиғилган пул унча кўп эмаслигини билдирган.

Бироқ у кўплаб ўзбекистонликлар ва тадбиркорлар Украинадаги дўстлари ва ҳамкорларига тўғридан тўғри ёрдам юбораётганини ҳақида хабардор эканлигини таъкидлаган.

Микола Дорошенко gazeta.uz мухбирининг украиналик қочқинлар борасида берган саволига ўтган йил давомида Ўзбекистонга 4800 украналик келганини айтди.

"Ўзбекистон ҳукумати кўчиб келган шахслар учун ҳеч қандай имтиёз бермади, бироқ Ўзбекистонга келмоқчи бўлган Украина фуқароларига тақиқ ҳам қўймади. Бизда 180 кунлик визасиз режим амал қилади. Ижтимоий ёрдам таклиф қилинмагани учун келганларнинг ҳаммаси иш излашди ва топиб жойлашишди", деган у.

Украиналик қочқинларнинг иш ва яшашга жой топишида Ўзбекистондаги ижтимоий гуруҳлар, фаол тадбиркорлар ёрдам кўрсатган.

Украина элчиси икки давлат ўртасидаги савдо алоқаларига ҳам тўхталган.

Маълум бўлишича, уруш кетаётганига қарамасдан Ўзбекистонга юборилаётган кўплаб маҳсулотлар келишда ҳамон давом этмоқда.

Украина Ўзбекистонга ёғ, шакар каби қишлоқ хўжалиги маҳсулотлари ва пива, сув ишлаб чиқарувчи ҳамда мева, сабзавот, сут махсулотларини қайта ишловчи кичик мобил заводлар етказиб беришда давом этмоқда.

Бироқ Запорожьедаги бир неча завод бомбардимон қилингани учун қора метал ва темир йўл ускуналари экспорти тўхтаб қолган.

Элчи икки давлат ўртасидаги муносабатлар фақат иқтисод билан чекланиб қолмаётганини урғулаган.

У йил давомида бир неча маротаба Ўзбекистон Ташқи ишлар вазирлиги раҳбарияти билан учрашган.

"Биз икки томон кун тартибида турган долзарб масалаларни муҳокама қиламиз. Халқаро майдонда бизларнинг ҳамкорлигимиз долзарб ва фаол бўлиб қолаётгани муҳим. Ҳа, Ўзбекистоннинг маълум ўз мавқеи бор ва биз унга тушуниш билан қараймиз".

Микола Дорошенконинг айтишича, Украина БМТнинг 11-фавқулодда йиғилишини кутмоқда ва унда Украина президентининг "дунё формуласи" бўйича резолюцияси кўриб чиқилади.

Украина томони Ўзбекистонга у ердаги бандлардан бирида иштирок этишни кўриб чиқиш учун, ушбу формула матнини юборган.

Элчига кўра, у ерда энергетика, озиқ-овқат ва экология хавфсизлик масалалари ўрин олган.

Микола Дорошенко Ўзбекистон Афғонистонга ёрдам сифатида юбораётган буғдойни Украинадан олиш бўйича Президент Володимир Зеленский таклиф қилган "Grain from Ukraine" (Украинадан дон) лойиҳаси ҳақида гапирган.

Элчи, шунингдек, БМТ Бош ассамблеяси йиғилишида Ўзбекистон Украинанинг тинчлик ташаббусларини қўллаб қувватлашга, ёки ҳеч бўлмаса қарши чиқмаслигига умид билдирган.

Уруш бошланганидан сўнг икки давлат ўртасидаги савдоайланмаси 704 миллион доллардан 306 миллион долларга тушиб кетгани айтилган.

Украина элчиси 2022 йилнинг март ойида Ўзбекистон Ташқи ишлар вазири Абдулазиз Комилов Ўзбекистоннинг Украинадаги можаро борасида мавқени очиқ айтганини олқишлаган.

Абдулазиз Комилов Украинадаги ҳарбий ҳаракатлар зудлик билан тўхтатилиши кераклигини айтган ва Ўзбекистон Украинанинг мустақиллиги, суверенитети ва ҳудудий яхлитлигини тан олишини таъкидлаганди.

Кузатувчилар Ўзбекистоннинг Украина борасида тутган мавқеи қўшни Қозоғистон каби фаол эмаслигини урғулашади.

Қозоғистон Президенти Қасим-Жомарт Тоқаев 16 феврал куни Украина президенти Володимир Зеленский билан телефон орқали мулоқот қилган.

Президентлар икки давлат ўртасидаги инсонпарварлик муносабатларини муҳокама қилган.

Тоқаев бундан олдин 2022 йилнинг июл ойида ҳам Зеленский билан телефон орқали гаплашганди.

Қозоғистон Президенти ўтган йилнинг июн ойида Путин билан журналистлар саволларига жавоб бераётганида Қозоғистон Донецк ва Луганск вилоятларининг мустақиллигини тан олмаслигини айтиши билан ҳам эътиборга тушганди.

Қозоғистонлик тадбиркорлар Украинада уруш асоратларидан қийналганлар учун қурган қозоқ ўтовига Россия Ташқи ишлар вазирлиги норозилик билдиргани.

Бунга жавобан Қозоғистон Ташқи ишлар вазирлиги украин ва қозоқ халқи дўст эканлиги ва бу каби ёрдам акциялари табиий эканлигини айтиб чиққан.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002