Янгиликлар: Тўйдан олдин жинсий алоқа қилсангиз, энди қамаласиз Dunyo Ayollar Yangiliklar

Дунёнинг энг йирик мусулмон давлати жиноят тўғрисидаги янги қонунни маъқуллади. Энди зино учун сизни қамашлари мумкин. Янги қонун чет элликларга ҳам бирдек тaаллуқли бўлади.

Мавзуга алоқадор:

Индонезия парламенти қабул қилган янги қонун зино учун бир йилгача қамоқ жазосини кўзда тутади.

Янги қонун Индонезия фуқаролари баробарида чет элликларга ҳам бирдек тааллуқли бўлади.

Аммо фақат томонлардан бири масъул идораларга расман шикоят қилган тақдирдагина, зино учун жазо кучга кириши мумкин бўлади.

Никоҳда бўлганлар учун шикоят қилиш ҳуқуқига эга бўлган томон гумондорнинг эри ёки хотини ҳисобланади.

Янги қонун, шунингдек, турмуш қурмаганларнинг ота-оналарига уларнинг жинсий алоқада бўлганликлари ҳақида хабар беришга ҳам рухсат беради.

Никоҳдан олдин бирга яшаш ҳам тақиқланади ва тақиқни бузганлар олти ойлик қамоқ жазосига ҳукм этилишлари мумкин бўлади.

Бизнес доиралар эса, янги қонун лойиҳасидан аллақачон хавотирда.

"Рейтер"нинг ёзишича, улар бу Индонезиянинг дам олиш ва сармоя учун яхши жой, деган имижига путур етказиши мумкин, дейишмоқда.

Индонезия Иш берувчилар Ассоциацияси раиси муовини Шинта Вижажа Сукамданининг айтишича, "Тадбиркорлик сектори учун ушбу одатий қонуннинг кучга кириши ҳуқуқий ноаниқликни келтириб чиқаради ва инвесторларни Индонезияга сармоя киритишни қайта кўриб чиқишга мажбур қилади".

Кодекснинг бундан аввалги лойиҳаси 2019 йилда қабул қилиниши керак бўлган, аммо у бутун Индонезия бўйлаб норозилик намойишларига сабаб бўлган.

Уларда ўн минглаб намойишчилар иштирок этишган.

Кўпчилик, жумладан, талабалар ҳам кўчаларга чиқишган.

Пойтахт Жакарта эса, тўқнашувлар ичида ҳам қолган.

Айрим намойишчилар полиция кучларига қарши тош отишгача боришган.

Улар бунга жавобан кўздан ёш сиздирувчи газ ва сув пуркагичларни ишга солишгани ҳам хабар берилганди.

Жинсий алоқа ва муносабатларга оид бундай кескин қонунлар аксарият аҳолиси мусулмон бўлган Индонезия учун янгилик эмас.

Дейлик, Ачеҳ вилоятида қаттиқ исломий қонунлар амал қилади.

У ерда қимор ўйнаш, спиртли ичимликлар ичиш ва қарама-қарши жинс вакиллари билан учрашганлик жазоланади.

2021 йилда қўшнилари икки эркакни жинсий яқинлик устида ушлаб олишади.

Уларнинг ҳар бири 77 даррадан урилади.

Худди ўша куни бир-бирининг пинжига яқин тургани учун, деб эркак ва аёл 20 даррадан калтак ейди.

Икки эркак эса, сархушт эканликлари боис, 40 даррадан калтакка ҳукм қилинишади.

BBC.COM/UZBEK билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek