Йирик 20: Лавров кўзи олдида Сунак Россияни қоралади, Хитойнинг Путинга дастаги сўндими? Dunyo Yangiliklar

Йирик 20нинг лидерлари Индонезиянинг Бали оролига йиғилар экан, кун тартибидаги асосий мавзулардан бири Россиянинг Украинадаги босқини бўлди. Унга Президент Владимир Путин келишдан бош тортиши ортидан Россия Ташқи ишлар вазири Сергей Лавров ташриф буюрган.

Украина уруши: Хитой Россияга ҳарбий ва иқтисодий ёрдам берадими? Видео

Украина уруши: Осиёнинг икки гиганти – Хитой ва Ҳиндистон Путинни нега қораламаяпти? Таҳлил

Украина уруши: Россия қўмондонлари ядровий қуролни ишга солишни муҳокама қилган

Британия Бош вазири Риши Сунак нутқ сўзлар экан, Россиянинг Украинадаги «ваҳший» урушини қоралади. Бу уруш бошланганидан бери британ бош вазири илк марта юқори даражали Россия мулозими билан юзма-юз кўришиши бўлмоқда.

Лавров ҳам нутқни тинглаб ўтирар экан, Сунак Россия Украинадан «чиқиб кетиши» зарурлигини айтди.

«Путиннинг режими ўз мамлакати ичидаги норозиликларни бостириб, фақат зўравонлик ёрдамида қонунийлигини сақлаб турибди», деди Сунак.

Британия бош вазири, шунингдек, Хитой Британиянинг қадриятларига «мунтазам равишда хавф» солаётганини айтди, аммо тафсилотларига берилмади. Ундан олдин 45 кун бош вазир лавозимида бўлган Лиз Трасс ҳам Хитойни британ миллий хавфсизлигига «таҳдид» дея баҳолаганди.

Йирик 20 саммитида Хитой Президенти Ши Жинпин ҳам иштирок этяпти. У саммит доирасида қатор давлатлар раҳбарлари билан икки томонлама учрашувлар ўтказмоқда.

Йирик 20 қўшма баёнотининг қораламасида Россиянинг Украинадаги босқини кескин қораланган. Германиянинг dpa хабар агентлигига кўра, бу Хитойнинг Россияга дастаги сўниб бораётганидан дарак беради.

Агар хабар агентликлари орасида тарқалган матнга таянилса, Москва энди Пекиннинг қўллаб-қувватловига эга эмас.

Dpa хабар қилишича, ҳали жума куни Хитой дипломатлари Россиянинг ёнини олиб, Украинадаги урушни қораловчи Йирик 20 баёнотини Хитой кескин рад этишини айтаётгандилар.

Баёнот ҳали қабул қилинмади, аммо унга Хитой рози бўлса, бу Пекиннинг Россия борасидаги сиёсатида кескин бурилиши бўлганини англатади.

Айни дамда Хитой президенти Ши Жинпин франциялик ҳамкасби Эммануэл Макрон билан Украинада ядровий қуроллар қўлланишига йўл қўймаслик борасидаги кескин мавқеларини тасдиқладилар.

Аввалроқ саммитда видео линк орқали сўзлаган Украина Президенти Володимир Зеленский Россия Херсондаги инфратизилмани буткул вайрон қилганини айтиб, уруш ҳозироқ тўхтатилишига чақирди.

У Киев ва Москва ўртасида Донбасс тақдири бўйича аввал имзоланган келишувлар иш бермаганига ишора қилиб, учинчи «Минск келишуви» имзоланмаслигини айтди.

«Россия бу келишув имзоланиши биланоқ уни бузади», деди у.

Россия украин лидерининг бу сўзларини қоралаб чиқди. Кремль воизи Дмитрий Песков Зеленскийнинг бу гаплари Украина тинчлик музокараларига тайёр эмаслигидан дарак беришини даъво қилди.

Айни дамда Россия Украина пойтахти Киевга ҳужум қилиб шаҳар марказидаги бир неча турар жой биноларига шикаст етказди.

Афтидан Россия мамлакат бўйлаб бир неча шаҳарларни нишонга олган - Миколайв, Чернихив ва Запорижя дохил бошқа шаҳарлар ҳам ҳужумга олинди.

Киев ҳокими Виталий Кличкога кўра, пойтахтнинг Печерск туманида учта бинога шикаст етди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek