Россия: Путин қисман сафарбарлик эълон қилди - янгиликлар
Чоршанба куни тонгда Россия президенти Владимир Путин мамлакатда қисман сафарбарлик эълон қилинганини айтди. Бу ҳақдаги қарор имзоланган. Унинг айтишича, "сафарбарлик бугундан бошланади".
Украинадаги ҳолатга тўхталар экан, Владимир Путин Россия назорати остида бўлган ҳудудларда "референдумлар" ўтишини дастаклашини айтган.
Мудофаа вазири Сергей Шойгу эса "Россияда сафарбарлик учун йирик заҳира борлигини" урғуланган.
Заҳирадаги 300 минг киши сафарбар этилиши режаланган.
Путин нима деди?
"Сафарбарликка фақат заҳирада бўлган ва муқаддам ҳарбий хизматни ўтаганлар, ҳарбий касб ва тажрибага эга бўлганлар чақирилади", деди Путин.
У Россиянинг қисман назорати остида бўлган ва ўзларини ДНР ва ЛНР деб атаётган минтақаларда "референдумлар" ўтиши учун "хавфсиз шароит" яратилишига ваъда берган.
Путинга кўра, Россия кучлари Украинада " Ғарбнинг бутун ҳарбий машинаси"га қарши турмоқда.
Ўз чиқишининг якунида Путин ядро хавфини тилга олган.
"Бизга ядро қуроли билан пўписа қиладиганлар билиб қўйсинки, шамоллар ўзлари томонга эсиши мумкин".
Путин Россиянинг ҳудудий яхлитлигини ҳимоя қилиш учун барча воситалардан фойдаланишини урғулаган.
Путиндан кейин Шойгу
Путин чиқишидан сўнг Мудофаа вазири Сергей Шойгу билан суҳбат узатилган.
Вазирга кўра, Украинага бостириб кириши ортидан Россия 5937 нафар ҳарбийсини қурбон берган.
"Бизда заҳира улкан", деган у ва умумий сонни 25 миллион нафар эканини даъво қилган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
