Россия аҳволи тангми? “Вагнер” Украина урушига маҳкумларни ёлламоқда, Дунё, янгиликлар

Россиядаги жангчилар ёлловчи ташкилот раҳбари маҳкумларни урушга ташлаш ғоясини ҳимоя қилиб чиқди. Олдинроқ "Вагнер" гуруҳи раҳбари Евгений Пригожиннинг қамоқхонада одамларни урушга ёллаётгани ҳақида видеоси чиққан эди.

Пригожиннинг айтишича, маҳкумларни жангга юборишни истамаётганлар, уларнинг ўрнига фарзандларини юбориши керак.

Бироз олдин жамоатчиликка сиздирилган видеода у қамоқдагилар ушбу гуруҳ таркибида 6 ой хизмат қилса озодликка чиқиши ҳақида гапираётгани акс этган.

"Вагнер" гуруҳи Украинада 2014 йилдан бери урушаётгани айтилади.

Видеоси тарқалиб кетгач ижтимоий тармоқларда чоп қилинган баёнотда Пригожин агар маҳкум бўлганида ""Вагнер"га қўшилишни орзу қилган ва шу билан Ватаним олдида бурчимни адо қилган бўлардим", деган.

У жангларда ёлланма аскар ёки маҳкумлар бўлишини истамаганларга қарата шундай деган:

"Ё хусусий ҳарбий ширкатлар ва маҳкумлар ёки сизнинг фарзандларингиз - танланг".

Бироқ баёнотда сиздирилган видеога тўғридан тўғри ишора қилинмаган ёки унинг ҳақиқийлиги эътироф этилмаган.

Британия Мудофаа вазирлигининг айтишича, маҳкумларни урушга ёллаш Россия пиёда аскарлар етишмовчилиги борасида жиддий муаммоларга дуч келаётганини англатади.

Би-би-си томонидан тасдиқланган видео Россия аскарлари сонини маҳкумларни ёллаш эвазига кўпайтирмоқчи, деган шубҳалар рост эканлигини кўрсатади.

Россия қонунлари маҳкумларни ҳарбий ва ёлланма хизматларга чақириш орқали озодликка чиқаришга рухсат бермайди. Бироқ Пригожин видеода агар улар Вагнерда гуруҳи билан хизмат қилса "ҳеч ким қайтиб қамоққа тиқилмас"лигини айтади.

"Олти ой хизмат қилсангиз озод бўласиз. Агар украинага боргандан сўнг бу менга тўғри келмайди, десангиз, сизни ўлдирамиз", дейди у.

Видео қамоқхона машғулот майдончасида тасвирга олинган. Уни ким видеога олгани ва қандай қилиб жамоатчиликка ошкор бўлгани номаълум.

Би-би-си геолокация орқали видео Россиянинг марказидаги Мари Эл республикасидаги жазони ўташ муассасасида олинганини аниқлади.

Юзни танишга мўлжалланган иловалар ёлловчи Пригожин эканлигини аниқлашга ёрдам берди ва бу бир неча манбалар орқали тасдиқланди.

Би-би-си бундан олдин Кремлга озиқ-овқат етказиб бериш билан шуғуллангани учун "Путиннинг ошпази" деб танилган Пригожин ва "Вагнер" гуруҳи ўртасида боғлиқлик борлигини аниқлаганди.

Путиннинг дўсти Пригожин ўтмишда ушбу ташкилотга алоқаси борлигини рад қилган.

Бироқ қамоқхонадан сиздирилган видеода олигарх маҳкумларга ўзини "хусусий уруш ширкати вакили" эканлигини айтган.

"Балки эшитгандирсизлар "Вагнер" гуруҳи деб аталади", дейди у маҳкумларга.

Ўтмиши сирли бўлган ушбу гуруҳ Украина, Сурия ва бир неча Африка давлатларидаги можароларда иштирок этган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek