Алек Болдуин украиналик оператор аёлни отиб ўлдирди
Сурат манбаси, Getty Images
Бадиий фильмни тасвирга олиш пайтида таниқли актёр Алек Болдуин оператор Галина Хатчинс ва режиссёр Жоэл Соузани отиб қўйган.
42 ёшли Галина Хатчинс вертолётда шифохонага етқизилган, бироқ унинг ҳаётини асраб қолишнинг имкони бўлмаган, режиссёр Соузанинг аҳволи оғир қолмоқда.
Нью-Мексико штатининг Санта Фе шаҳри яқинида XIX асрдаги воқеалар ҳақидаги "Раст" (Rust) фильми тасвирга олинаётганди.
63 яшар Алек Болдуин бош роль ижрочиси ва фильм продюсери бўлган.
Актёр ўқсиз патрон жойланган тўппончадан отиши керак эди, нега жанговар патронлар отилганини терговчилар текширишни бошлаганлар.
Алек Болдуин полиция идорасига бориб ҳодиса юзасидан саволларга жавоб берган, сўнг уни қўйиб юборишган.
Сурат манбаси, Getty Images
Галина Хатчинс украиналик бўлиб, ўзининг веб-сайтида ёзишича, Шимолий Қутбга яыин Совет ҳарбий базасида катта бўлган.
У Киев Давлат университетининг Халқаро журналистика факультетини тамомлаган.
Сўнг Британия, АҚШда фильмларни тасвирга олишда қатнашган.
2019 йили Америкада нашр қилинадиган кинематографияга ихтисослашган журнал Галина Хатчинсни "ўсиб келаётган юлдуз" деб таърифлаган эди.
У қатор бадиий фильмларда операторлик қилган.
Бадиий фильмларни тасвирга олишда кўпинча олов сачратиб баланд ўқ овозини чиқарадиган пахтавон патронлар ишлатилади.
Шунингдек, ҳақиқий ўқлардан ҳам фойдаланилади.
Бундан олдин ҳам кино тасвирга олиш пайти инсонлар ҳалок бўлган ҳодисалар рўй берган.
Дунёга машҳур Брюс Лининг ўғли Брандон Ли 1993 йили "Қарға" фильмини тасвирга олиш пайти нотўғри ўқланган тўппончадан отиб ўлдириб қўйилган эди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
