Афғонистон: Ўзини қутқариб қолган Омонни Байден ҳам қутқардими? Омон Толибондан қочди Afg‘oniston dunyo yangiliklar

Омон Жо Байденнинг Афғонистонда пистирмага тушишдан асраб қолган. Байден ҳам бўлган ҳарбий вертолёт ўшанда қорли водийда фавқулодда қўнишга мажбур бўлган. Вертолётдагиларни Омон ҳам қутқарган. Толибон қайтгач, энди Байдендан ўзини қутқаришини сўраган. Аммо икки ой деганда, Афғонистондан чиқишга муваффақ бўлган.

У Толибон қудратга қайтишидан икки ойча ўтиб бўлса-да, алал-оқибат оиласи билан бирга Афғонистонни тарк этишга муваффақ бўлган.

Омон Халилий АҚШ ҳукумати учун ишлаган, уларга таржимонлик қилган.

Аммо август ойидан буён виза муаммосини ҳал қила олмаган, АҚШнинг махсус иммиграцион визасини ололмай, Толибон бошқаруви остидаги Афғонистонда қолиб кетган.

АҚШ Афғонистонни шоша-пиша тарк этиши ортидан президент Байдендан ўзи ва оиласини қутқаришини сўраган.

Ҳозир АҚШ президенти бўлган Жо Байденга "ишониши", ўзи, аёли ва беш нафар боласини асраб қолиш учун унинг "қўлидан келган ҳамма ишни қилишига" кўз тикаётганини айтган.

Аммо фақат ҳозирга келибгина, уларнинг Толибондан қочаётган минглаб афғонларнинг сафидан жой олишгани маълум бўлган.

Шу ҳафта душанба куни АҚШ Давлат департаментининг вакили Омон ва оиласининг Афғонистонни соғ-омон тарк этишгани, энди эса, Покистондан ўз сафарларини давом эттиришаётганини маълум қилган.

Унга кўра, бунга АҚШ ҳукуматининг фаол, олий даражадаги иштироки ва дастаги билан эришилган.

Вакил бу масалада Омонга кўмак қилган бошқа кўпчиликка ҳам ўз миннатдорчиликларини билдирган.

2008 йилда Афғонистоннинг қорли водийларидан бирига қўнишга мажбур бўлган ҳарбий вертолётда эса, Байдендан ташқари яна америкалик икки таниқли сенатор - Чак Хейгел ва Жон Керри ҳам бўлишган.

Журналистлар худди шу нарсани кўзда тутиб, ўтган ой ҳам Омон ва унинг оиласи тақдири билан қизиқишган.

Бу хусусда Оқ уй матбуот котибини сўроққа тутишган.

Жен Псаки, "ўзи ёқтирган бир қанча инсонни қор бўронидан қутқаришда қилган кўмаги" учун унга раҳмат айтган, АҚШ ўз иттифоқчиларини эвакуация қилиш аҳдида қатъий эканини билдирганди.

Ҳозир Покистонда бўлган 200 дан ортиқ афғонни қутқаришда кўмак қилаётган The Human First Coalition ташкилоти Омон ва унинг оиласини Афғонистондан олиб чиқиб кетишда қилган ёрдами учун АҚШ ва покистонлик мулозимлардан "жуда миннатдор" эканликларини айтган.

АҚШ махсус иммиграцион визасини ўзлари билан ишлаган афғонлар ва ироқликларга беради.

Омоннинг бу визани олишга муваффақ бўлган-бўлмагани ва ёки сўнгги манзили аниқ АҚШ бўлажаги ҳали-ҳануз маълум эмас.

Худди шу виза билан сўнгги 13 йил ичида 70 мингга афғон Америка Қўшма Штатларига бориб ерлашган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek