Франция: Президент Эммануэль Макроннинг юзига тарсаки туширишди - dunyo yangiliklar
Сурат манбаси, AFP/ARXIV
Франция президентининг юзига тарсаки туширишди.
Кутилмаган ҳодиса Эммануэль Макроннинг мамлакат жануби-шарқига расмий сафари чоғида юз берди.
Рўй берган воқеа акс этган видео аллақачон ижтимоий тармоқларда ҳам тарқалиб улгурди.
Унда президент Макрон Валенсия ташқарисидаги Tain-l'Hermitageга сафари чоғида тўсиқ ортидаги одамлар билан кўришмоқчи бўлади.
Тан қўриқчилари президентни четга олгунга қадар бир киши Франция президентининг юзига тарсаки туширишга улгуради.
Уларнинг ортидан полиция зобитлари ҳам етиб келишади.
Франция матбуоти ҳодиса ортидан икки нафар шахснинг ҳибсга олингани ҳақида хабар бермоқда.
Уларнинг ким эканликлари ҳозирча номаълум.
Тарсаки сабаби ҳам ҳалича очиқланмаган.
Президент Макроннинг юзига тарсаки тушираркан, уни тарсакилаган инсоннинг "Йўқолсин, макронизм", дегани қулоққа чалинади.
Франция сиёсатчилари президент билан юз берган ҳодисани тезда қоралаб чиқишган.
Айни мақолада X томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз X ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири X пост
Орадан қисқа вақт ўтмай, Франция Бош вазири Миллий Ассамблеяда чиқиш қилган.
Жан Кастекс демократия қонун доирасидаги баҳсу мунозара ва фикрлар турфахиллигини англатса-да, "ҳеч қачон зўравонлик ва ҳали жисмоний тажовуз уёқда турсин, ҳатто оғзаки ҳақоратни ҳам англатмаслиги шартли"гини таъкидлаган.
Тарсаки ҳодисаси ортидан, сўлчилар лидери Жан-Люк Меланшон Twitter да "президент билан бирдамлиги"ни изҳор этиб чиққан.
Президент Эммануэль Макрон ҳозир Франция бўйлаб сафар қилмоқда ва Tain-l'Hermitage даги мактаб-интернатга ташрифини энди якунлаган.
Масъулларга кўра, у бугун ҳам ҳудудда қолиши ва 25-30 ёшлилар учун мўлжалланган касб-ҳунар институтига бориши керак бўлган.
Президент Макроннинг сафари мамлакат учун катта воқеа - етти ойлик танаффус ортидан, ресторан ва барларнинг қайта очилиши кутилаётган бир пайтга тўғри келмоқда.
Чоршанба куни Францияда кечки соат 21:00 дан 23:00 гача амалда бўлган комендантлик соатининг ҳам бекор қилиниши режаланган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
