Россия, полиция ва маньяк: собиқ милиционер Чикатилодан кўп одам ўлдирган

Россиянинг Сибирида дунёга келган собиқ милиция ходими мамлакатнинг замонавий тарихидаги энг кўп одам ўлдирган қотил сифатида тасвирланмоқда. У шу кунларда иккинчи бор умрбод қамоқ жазосига маҳкум этилди.

53 ёшли Михаил Попков 1992-2007 йиллар оралиғида 55 аёл ва бир эркак полициячининг умрига зомин бўлишда айбланган.

Попков бунга қадар ҳам 22 одамни ўлдиргани учун қамоқда ўтириб келган.

Натижада Попков қурбонларининг умумий сони деярли 80 нафарга етган.

У тунги вақтда бўлажак қурбонларига машинада айланиб келишни таклиф қилган, сўнг уларни ваҳшийларча ўлдирган.

Попков ўлдирган қурбонларнинг барчаси, бир эркакдан ташқари, 16-40 ёш ўртасидаги аёллар бўлган. Уларнинг камида 10 нафари зўрлангани айтилади.

Попковнинг ДНК намунаси бир қурбоннинг танасидан топилгандан сўнг у 2012-йилда қўлга олинган эди.

Учта қотиллик ўша вақтлар милицияда ишлаган Попковнинг хизмат машинасида амалга оширилган.

У одамларни Сибирдаги Ангарск шаҳри атрофида болта, болға, пичоқ каби қуроллар билан ўлдириб, таҳқирланган жасадларни ўрмонлар, йўл бўйлари ва маҳаллий қабристонга ташлаб кетган.

Биринчи тергов давомида Попков Ангарскни ўзи бузуқ ҳисоблаган аёллардан «тозалагани»ни иддао қилган.

Қилмишлари билан Попков 48 та қотилликка қўл урган Александр Пичушкин ва Совет даврида 52 одамни ўлдириб, ҳаммани қўрқувга солган Андрей Чикатилони ҳам доғда қолдиргани айтилмоқда.

2012 йилда қотилликлардан бири содир этилган жойдан Нива русумли автомашина излари топилгандан сўнг Ангарск полицияси ҳудуддаги барча шундай машиналар эгаларини текшира бошлаган.

Сўнг полиция машина эгаларининг ДНКсини қурбонлардан топилган ДНК намуналарига солиштириб чиққан ва, шу тариқа, деярли 20 йил тутқич бермай келган ваҳший қотил қўлга тушган.

Россияда милицияни 'полиция'га айлантиришга оид янги қонун муҳокама қилинмоқда

Ўз жазманини ўлдириб, гўштини гуруч тагига босган аёл ким?

Попков янги машина сотиб олиш учун кетаётган вақтда ҳибсга олинган. Илк терговдаёқ у 20 та қотилликка қўл урганини тан олган. Қурбонларнинг энг кичиги 15 ёшда бўлган.

2015 йилда Иркутск суди уни 22 қотилликда айбдор топиб, умрбод қамоқ жазосига ҳукм қилган, аммо ўша вақтнинг ўзида яна кўплаб қотилликлар бўйича унга нисбатан янги жиноий иш очилган.

Интерфакс хабар агентлигига кўра, Попков ҳибсдалик чоғида бир маҳбусга Чикатилодан ҳам кўпроқ одам ўлдиргани билан мақтанган.

Прокурорлар Попковнинг руҳий соғлиги жойида экани, лекин унда «одам ўлдиришга нисбатан патологик мойиллик» борлигини маълум қилган.

Унинг баъзи қурбонлари тирик ҳолда топилган, аммо, кейинроқ, касалхонада ҳаётдан кўз юмган.

Давлат прокурори Александр Шкиневнинг айтишича, Попков терговчилар билан ҳамкорлик қилгани важи билан ҳозирда 24,000 рублга тенг ($361) полициячи пенсиясининг қайтарилиши учун шикоят қилишни кўзламоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek