Ўзбекистон: қурилиш ширкати сифатсиз уй қурмоқда, яшовчи эса таянч устунни қўпормоқда O'zbekiston Dunyo Yangiliklar Янгиликлар
Сурат манбаси, Gazeta.uz
Туркия зилзиласи қурилаётган бинолар сифатини долзарб мавзуга айлантирган бир пайтда Ўзбекистондаги яна бир қўрқинчли муаммо бўй кўрсатаётгандек.
26 февраль куни Туркия расмийлари 184 шахс ҳибсга олингани, 600 дан ортиқ масъул устидан тергов кетаётгани ҳақида хабар тарқатдилар.
Алоқадор мавзулар:
Бу инсонлар бино қурган, уй эгалари бўлган шахслар, улар 6 февралдаги зилзилада қулаган бинолар учун масъул бўлганлар.
Ўзбекистонда эса Сардоба фожеаси, Тошкент метросининг Юнусобод йўналиши қурилишида рўй берган бахтсиз ҳодиса, барпо этилганига кўп вақт ўтмасдан носозликлар аниқланган Сирғали ер усти метроси, бошқа ҳодисалар техника хавфсизлиги ва талабдаги стандартларга қанчалар амал қилинаётгани муаммосини аллақачон кўрсатган, сўнгги йилларда шошма-шошарликда қад кўтараётган биноларнинг ер силкинишига нақадар чидамлилиги борасида саволлар ўртага чиққан.
Вилоятларда аллақачон қурилаётган бинолар қулаб тушгани ҳодисалари кузатилди.
Пойтахт Тошкент ва йирик шаҳарларда домлар ўртасидаги майдонлар аллақачон "мўмай даромад"ни кўзлаган хусусий қурилиш компанияларининг ноқонуний нишонларига айланди, маҳаллий яшовчиларнинг қаршиликларига қарамасдан, қуриб битказилди, яшовчиларга сотилди.
Сурат манбаси, BBC.COM/UZBEK
Ўзбекистон Қурилиш ва уй-жой коммунал хўжалиги вазирлиги эълон қилган сўнгги рейтинг мамлакатда қурилиш билан шуғулланаётган ширкатларнинг аксари сифат талабларига жавоб бермаслигини кўрсатди.
"Дарё.уз" ёзишича, тўрт тоифага бўлинган рейтингдан жами 17 647 та компания ўрин олган.
Энг ишончли компаниялар "А" тоифасига киритилган.
Эълон қилинган диаграммага кўра, рейтингдаги энг ишончлилар рўйхатига 75 фоизли кўрсаткич билан фақат битта компания киритилган.
Қуйи даража — "Д" тоифасидан 14 668 та компания ўрин олган. Бу рейтингдаги жами компанияларнинг 83 фоизи демак.
Бугунги кунда Ўзбекистонда қурилиш билан шуғулланаётган корхона ва ташкилотлар сони 45 591 тани ташкил этиши хабар қилинган.
Агар ишончлилик рейтинги 20 фоиздан ошмаса, нега бу ширкатларга уй қуришга рухсат берилди, деб ёзди маҳаллий журналистлардан бири.
Бунинг устига якка шахслар ва хусусий ширкатлар кўп қаватли уйларни кўтариб турадиган асосий таянч устунларини ўзбошимчалик билан бузиб ташлаганлари ҳақида хабар тарқатди қурилиш вазирлиги.
Оқибатда биноларнинг зилзила бардошлигига шикаст етгани хабар қилинмоқда.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
