Ўзбекистон: Кузда Путин келади, Олмалиқда портлаш ва талон-тарож қилинган 23,5 миллиард сўм – O'zbekiston, yangiliklar

16 июн 2022

Сентябрда Путин Ўзбекистонга келади;
Ижтимоий дастурларга ажратилган маблағлар талон-тарож қилингани айтилди;
Олмалиқда портлаш рўй берди;
Абдулазиз Комилов президентнинг махсус вакили бўлди;
ССВ коронавирус яна бош кўтараётганидан огоҳлантирди;

Путин ташрифи

Россия президенти Владимир Путиннинг кузда Ўзбекистонга келиши кутилмоқда.

Россия президенти ёрдамчиси Юрий Ушаков берган маълумотга таяниб, ТАССнинг ёзишича, Путин сентябрда Самарқандда ўтказилиши режалаштирилган Шанхай ҳамкорлик ташкилоти саммитида иштирок этади.

Шунингдек, Путин 14 октябрь куни Қозоғистон пойтахтида ўтадиган МДҲ давлатлари раҳбарлари Кенгаши йиғилишида ҳам қатнашиши маълум қилинган.

Алоқадор мавзулар:

Талон-тарожга учраган ижтимоий дастурлар

Йилнинг биринчи чорагида аҳолини қўллаб-қувватлашга учун турли ижтимоий дастурларга ажратилган 23,5 миллиард сўмдан ортиқ бюджет пуллари талон-тарож қилинган.

Бу ҳақда 14 июнь куни ўтган йиғилишда Коррупцияга қарши курашиш агентлиги директори Акмал Бурхонов маълум қилган.

Бурхоновнинг билдиришича, "Ҳар бир оила — тадбиркор" дастури бўйича 20 миллиард сўмдан ортиқ маблағ турли банклар ходимлари томонидан талон-тарож қилинган.

"Ёшлар — келажагимиз" дастури доирасида ҳам 3,5 миллиард сўм маблағ ёшлар бандлигини таъминлашга йўналтирилмасдан, жиноий схемалар орқали ноқонуний ўзлаштириб юборилган, деган Акмал Бурхонов.

Skip Энг кўп ўқилган and continue reading

Энг кўп ўқилган

End of Энг кўп ўқилган

Антикоррупция агентлиги раҳбари, шунингдек, тижорат банклари томонидан кредит ажратиш жараёнларидаги коррупциявий вазият "тобора жиддий тус олиб бораётгани"ни таъкидлаган.

Олмалиқда портлаш

15 июнь куни соат 17:55 да Олмалиқ шаҳрида жойлашган қўшма корхонада портлаш юз берган.

ФВВ портлаш корхонанинг ишлаб чиқариш цехида технологик жараённинг бузилиши натижасида содир бўлгани ҳақида маълум қилган.

Дастлабки маълумотларга кўра, ҳодиса оқибатида ушбу цехнинг бино конструкциялари бузилган.

Шунингдек, воқеа жойига яқин бўлган юк машинаси ҳайдовчиси тан жароҳати олган.

"Айни вақтда жабрланган фуқаро шаҳар тиббиёт бирлашмасида, шифокорлар назоратида, аҳволи қониқарли. Содир бўлган вазият оқибатида ишчи-ходимларнинг ҳалок бўлиш ҳолатлари қайд этилмади", қўшимча қилган ФВВ.

Янги лавозимга тайинланган Комилов

Собиқ ташқи ишлар вазири Абдулазиз Комилов президентнинг махсус вакилига айланган.

Президент матбуот котиби Шерзод Асадовнинг хабар беришича, собиқ вазир давлат раҳбарининг ташқи сиёсат масалалари бўйича махсус вакили лавозимига тайинланган.

Март ойида ташқи ишлар вазири ўлароқ Ўзбекистоннинг Украина масаласи бўйича тутган ўрни борасида Сенатда Комиловнинг айтган сўзлари шов-шувларга сабаб бўлган эди.

Шундан сўнг бир ойдан зиёдроқ вақт давомида жамоатчиликка кўриниш бермаган Комилов апрель ойининг сўнггида ТИВдан кетгани расман эълон қилинган ва у президент ҳузуридаги Хавфсизлик кенгаши котиби ўринбосари этиб тайинланган эди.