АҚШ: Президент Трамп устидан импичмент суриштируви бошланди

АҚШ Сенати Президент Доналд Трамп устидан импичмент тингловини бошлади.

Трамп 2020 йил кузида Америка Қўшма Штатларида бўлиб ўтадиган президентлик сайловида ўзининг асосий рақиби бўлиши кутилаётган Жо Байденнинг ўғлининг Украинадаги хато-камчиликларини топиш талаби билан Президент Зеленскийга босим ўтказган, демоқда Демократ сиёсатчилар.

Доналд Трампнинг ўзи барча айбловларни кескин рад этади.

Қайта сайланиш мақсадида ўзининг сайловдаги асосий рақибини обрўсизлантиришни кўзлаган Трамп истеъфога чиқарилиши керак, деган талабни қўяётган Демократлар импичмент масаласини Вакиллар Палатасида кўтардилар ва иш Сенатга оширилди.

Трамп импичменти бўйича АҚШ Сенати тинглови 21 январ куни Вашингтон вақти билан соат 13.00 да белгиланган.

АҚШ Президенти Доналд Трампнинг ўзи Швейцарияда.

У Давос Жаҳон Иқтисодий форумида иштирок этиш учун борган.

Давосда жаноб Трамп ўзига нисбатан айбловлар уйдирма экани ҳақидаги аввалги сўзларини такрорлаган, "ҳеч нарса бўлмайди, чунки ҳеч нарса рўй бермаган", деб айтган у импичмент жараёни ҳақида.

Тинглов давомида 100 сенаторни савол-жавобга тутиши кутилмоқда.

Аммо АҚШ тарихида фақат икки президентнигина импичмент йўли билан лавозимидан кетказишга муваффақ бўлинган.

Бу гал Трампни президентликдан кетказиб бўладими?

Президентни лавозимидан кетказиш учун Сенат аъзоларининг учдан икки қисми овози талаб этилади.

Аммо Америка сенаторларининг 53 нафари Республикачи, уларнинг импичментни ёқлаб овоз беришлари даргумон, дейилмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek