Эрон АҚШдан денгиз блокадасини очишни талаб қилди, акс ҳолда янги таҳдид билан чиқди
Сурат манбаси, Getty Images
Эрон АҚШдан ўз портларига нисбатан қўйилган тўсиқларни олиб ташлашни талаб қилди. Акс ҳолда бу оташкесимни бузишга илк қадам бўлиши ва Эрон янада каттароқ ҳудудда кемаларнинг бемалол юришига тўсқинлик қилиши билан огоҳлантирди. Трамп уруш тугаса, бензин нархлари кескин тушишини айтган.
Эрон Қуролли кучларининг энг юқори оператив қўмондонлиги ҳисобланган "Хотам ал-Анбиё" марказий штаби раҳбари Али Абдуллоҳийнинг маълум қилишича, агар АҚШ блокадасини давом эттириб, "Эроннинг тижорат кемалари ва нефт танкерлари учун хавфсизликни издан чиқарса", бу "ўт очишни тўхтатиш келишувини бузишга олиб келувчи қадам" бўлади.
Абдуллоҳийнинг қўшимча қилишича, бу ҳолатда Эрон қуролли кучлари Форс кўрфази, Уммон денгизи ва Қизил денгизда "ҳеч қандай экспорт ва импортга йўл қўймайди".
У қайси давлатларнинг савдоси бундан таъсирланишини аниқ айтмаган, аммо тилга олинган сув ҳудудлари жуда кенг экани таъкидланмоқда.
Agar AQSh blokadasini davom ettirib, Eronning tijorat kemalari va neft tankerlari uchun xavfsizlikni izdan chiqarsa, bu otashkesim kelishuvini buzishga olib keluvchi qadam bo‘ladi.
АҚШнинг Эрон портларига нисбатан блокадаси душанба куни бошланган. Чоршанба куни АҚШ ҳарбийлари дастлабки 24 соат ичида "ҳеч бир кема блокададан ўта олмаганини" билдирган, Уммон кўрфазида олтита тижорат кемаси орқага қайтишга мажбур бўлган.
Трамп: уруш тугаса, бензин нархлари кескин тушади
Сурат манбаси, AFP
АҚШ президенти Доналд Трамп Fox Business телеканалида Мария Бартирамога берган интервюсида, агар Эрон ядровий қуролга эга бўлса, "бутун дунё портлайди", дея баёнот берди.
Унинг айтишича, Эрон билан уруш якунланса, бензин нархлари "кескин даражада тушади", электр энергияси нархлари ҳам арзонлашади.
Трамп 2015 йилда имзоланган Эрон ядровий келишувини "энг ёмон келишув" деб атаб, у мамлакатга ядровий қуролга эришиш учун "қисқа йўл" тақдим қилганини айтди.
У яна шуни қўшимча қилди: агар АҚШ ўтган йили Эрон ядровий объектларини бомбардимон қилмаганида, Теҳрон Исроил, Яқин Шарқдаги қўшни давлатлар ва ҳатто АҚШга қарши ядровий қурол ишлатган бўлар эди.
Эрон эса доим ўз ядровий дастури фақат тинч мақсадларга қаратилганини ва ҳеч қачон ядровий қурол яратишга интилмаганини таъкидлаб келади.
Трампнинг сўзларига кўра, у Хитой Эронга қурол етказаётгани ҳақида хабарлардан сўнг президент Си Цзинпинга мактуб йўллаган. Си жавоб хатида Хитой бундай иш қилаётганини рад этган.
Эрон янги музокаралар ҳақида "ҳеч қандай маълумот йўқ"лигини айтди
АҚШ президенти Дональд Трамп яқин икки кун ичида Исломободда "нимадир бўлиши мумкин" деб, янги музокаралар эҳтимолини билдирган эди.
Бироқ бундан бир неча соат олдин дипломатик манба Эрон давлат ахборот агентлиги IRNAга ҳозирча қўшимча музокаралар ҳақида "ҳеч қандай маълумот йўқ"лигини айтган.
IRNA хабарига кўра, Теҳрон ва воситачи сифатида иштирок этаётган Покистон ўртасида маълум хабарлар алмашилган, аммо ҳеч қандай келишув тасдиқланмаган.
End of Ижтимоий тармоқлардаги саҳифаларимиз:
Манба Покистон аввалги Исломобод музокаралари натижасиз якунланганига қарамай, "воситачилик ҳаракатларини давом эттиришга содиқ" эканини билдирган.
Эрон Трампнинг сўнгги баёнотларига ҳозирча расман муносабат билдирмаган.
8 апрель куни эълон қилинган икки ҳафталик ўт очишни тўхтатиш келишуви 22 апрел, чоршанба куни якунланиши кутилмоқда.
