Дунё, янгиликлар: Трамп конгрессвуманларга - АҚШдан кетинг! Москваликлар нимадан норози?
Трамп конгрессвуманларга АҚШдан кетишни «маслаҳат берди»
Сурат манбаси, EPA
АҚШ Конгрессининг тўрт аёл аъзосига мамлакатдан «кетиш»ни «тавсия қилиш»дан аввал «улар аслида ҳукуматлари мутлақ кулфат бўлган ерлардан келган»ини таъкидлаши ортидан президент Доналд Трамп ирқчиликда айбланган.
Конгресснинг илк икки муслима аъзоси бўлмиш Рашида Тлаиб ва Илҳан Омар дохил яна икки конгрессвуман - Александрия Оказио-Кортез ва Аянна Прессли - жаноб Трампнинг ирқчилик ўлароқ тасвирланаётган ҳужумига учраган.
Twitter'даги хабарида аёлларни номма-ном санамаган президент Трамп шундай ёзган:
"Аслида ҳукуматлари буткул касофат, дунёнинг ҳар еридан кўра энг ёмон, энг коррупцияга ботган ва пандавақи бўлган мамлакатлардан келиб олиб, энди Қўшма Штатлар одамларига, Ер юзидаги энг буюк ва қудратли халққа, ҳукуматимизни қандай бошқариш кераклигини бақириб ўргатаётган «илғор» демократ конгрессвуманларни кўриш жуда қизиқ.
Нега улар ортга қайтиб, ўзлари келган бутунлай бузилган ва жиноятга тўлиб-тошган жойларни оёққа турғазишга ёрдам бермайдилар?"
Президент Трамп нишонига тушган тўрт аёлнинг фақат биттаси - Илҳан Омар - АҚШ ҳудудидан ташқарида туғилган.
Америкалик кўплаб сиёсатчилар ва таниқли шахслар Доналд Трампни ушбу сўзлари учун кескин танқид қилиб чиққан.
Москвада оммавий норозилик намойиши бўлиб ўтди
Мингга яқин одам сентябрь ойида Москва шаҳар думасига ўтказиладиган сайлов учун рўйхатдан ўтишда рад жавобига учраган мухолиф номзодларни ёқлаб, кўчага чиқди.
Москва шаҳар сайлов комиссияси номзодлардан талаб этилган ва улар томонидан тўпланган ёқлов имзоларининг аксар қисми сохталаштирилган эканини иддао этган.
Бу иддаони мухолиф кучларни сиёсатга яқинлаштирмасликка уриниш сифатида кўрган мингга яқин одам ўз норозилигини билдириш мақсадида шаҳар кўчалари бўйлаб юра бошлаган.
Улар намойиш давомида жорий ҳукуматга қарши кескин шиорларни айтиб борганлар.
Полиция намойишчилар ҳаракатларига, аввал кузатилгандек, қаттиққўллик билан жавоб қайтармаган.
Нью Йорк маркази чироқсиз қолди
Сурат манбаси, Reuters
Шанба куни кечки пайт Нью Йоркнинг олти туманида чироқ ўчиб қолган. Оқибатда, метро, кўча фонуслари ва светофорлар ишламай қолган, одамлар лифтлардан чиқа олмаган.
Ярим тунга бориб, электр таъминоти қайта тикланган.
Шаҳар мери Билл де Блазио ҳодисага трансформаторларнинг бирида юзага келган ёнғин сабаб бўлганини билдирган.
Электрсиз соатларда тарқалган видеоларда одамлар Нью Йорк кўчаларида чироқ ўчиб қолиши тўғрисида қўшиқ куйлаётгани, бир эркакнинг светофор ўрнига кўча ҳаракатини ўз бошқарувига олганини кўриш мумкин.
Нью Йоркда олдин ҳам чироқ ўчиши кузатилган. 1977 йилда содир бўлган электр таъминотидаги йирик узилиш ортидан шаҳар зулматга чўкиб, кенг кўламли ўғриликлар кузатилган.
Нью Йорк 2003 йилда ҳам чироқсиз қолган.
Ҳиндистон миссиясининг Ойга парвози амалга ошмади
Сурат манбаси, EPA
Ҳиндистоннинг Ойни ўрганишга мўлжалланган иккинчи миссияси - Чандраян-2 - парвозга бир соатдан кам вақт қолганда, номаълум муддатга кечиктирилган.
Аниқланган техник муаммолар бунга сабаб бўлгани айтилмоқда.
Янги парвоз вақти тез орада маълум бўлиши хабар қилинган.
Чандраян-2 Ойнинг жанубий қутбига қўниши лозим бўлиб, у табиий йўлдошнинг бу қисмига қўнган илк миссияга айланиши кутилмоқда.
Агар бу режа амалга ошса, Ҳиндистон ўз миссиясини Ой юзига қўндирган тўртинчи давлатга айланади.
Мамлакатнинг илк Ой миссияси - Чандраян-1 - парвози 2008 йилда амалга оширилган, аммо у Ой сиртига қўнмай, радарлар орқали ундан сув қидирган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
