Тошкентга ташрифдан Ўзбекистон билан ОХҲТ ўртасидаги алоқаларни кенгайтириш мақсади кўзлангани билдирилди

Оврўпода Хавфсизлик ва Ҳамкорлик Ташкилотининг амалдаги раиси, Испания Қироллигининг Ташқи ишлар ва ҳамкорлик вазири Мигел Анхел Моратинос Марказий Осиё республикалари бўйлаб сафари доирасида Тошкентга борди.

12 апрель куни Тошкентда ОХҲТ раҳбари Ўзбекистон Президенти Ислом Каримов ва Ташқи ишлар вазири Владимир Норов билан учрашган.

Жаноб Моратиноснинг айтишича, ташкилотга шу йил раислик қилаётган Испания Марказий Осиё билан тўла мулоқотни ўзи учун ўта муҳим вазифа, деб билади.

Тошкентда ОХҲТнинг амалдаги раиси Мигел Анхел Моратинос матбуот конференцияси уюштирган.

Матбуот анжуманида жаноб Моратинос, хусусан, Оврўпо Иттифоқи Андижон воқеаларидан сўнг Ўзбекистонга нисбатан жорий этган жазо чораларининг олиб ташлашига умид қилаётганини айтган.

"Оврўпо Иттифоқи экспертлари Ўзбекистон билан жазо чоралари масаласини муҳокама қилишмоқда. Мен умид қиламанки, улар тез орада ўз хулосаларини Оврўпо Иттифоқига тақдим этадилар", деб айтган Оврўпода Хавфсизлик ва Ҳамкорлик Ташкилотининг раҳбари.

"Биз Ўзбекистон билан яхши алоқаларга эга бўлишга умид қиламиз. Олмония ҳукумати бошчилик қилаётган Оврўпо Иттифоқи экспертлар гуруҳи ҳозирда Андижон воқеалари юзасидан ўз ҳисоботини тайёрламоқда. Ушбу хулосалар тайёр бўлгандан кейин Ўзбекистонга нисбатан қўлланаётган жазо чораларини олиб ташлаш масаласини кўриб чиқамиз", деган Мигел Анхел Моратинос.

Тошкентда жаноб Моратинос Ўзбекистон билан демократия соҳасидаги ҳамкорликка ОХҲТ алоҳида эътибор қаратишини урғулаган.

"Демократия масаласи биз учун жуда муҳим. Биз Ўзбекистон билан демократия соҳасидаги ҳамкорликка алоҳида эътибор қаратаяпмиз. Умид қиламизки, бу мамлакатда демократия йўлида силжишлар бўлади", деб айтган Оврўпо ташкилоти раҳбари.

Оврўпода Хавфсизлик ва Ҳамкорлик Ташкилоти раиси билан сафар қилаётган унинг матбуот котибаси Сюзанна Луфнинг Би-би-сига айтишича, ташрифдан мақсад Ўзбекистон билан ОХҲТ ўртасидаги алоқаларни кенгайтириш ва ўзбек томонининг фикрларига қулоқ тутиш бўлган.

13 апрель куни Оврўпода Хавфсизлик ва Ҳамкорлик Ташкилоти ҳайъатининг Ўзбекистондаги ноҳукумат ташкилотлари, жумладан, инсон ҳуқуқлари гуруҳларининг вакиллари билан учрашув режаланган.

Ўзбекистондан олдин Оврўпода Хавфсизлик ва Ҳамкорлик Ташкилотининг амалдаги раиси Туркманистон раҳбарияти билан учрашди, жума куни Мигел Анхел Моратиноснинг Қирғизистонга йўл олиши режалаштирилган.