Британия: Афғон оиласига янги уй берган аёл - Dunyo, Yangiliklar видео
Сурат манбаси, contributor
Абердинда совуқ тун, аммо Весаллар оиласи 10 соатлик йўлда хориб машинадан тушганларида, Ҳелга Макфарлейн уларни илиқ кутиб олади.
"Ниҳоят сиз билан учрашганимдан жуда хурсандман", дейди у уларни қучиб.
Бу бошқаларнинг 75 йил аввал қилган яхшилиги шарофати билан келган янги уйи бўлади.
Ҳелга Буюк Британияга қочган афғон оиласига ёрдам бераётган немис қочқинининг шотландиялик қизидир.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Бурхон Весал Афғонистонда Британия қўшинлари учун таржимон бўлиб ишлаган.
Толибон ҳокимият тепасига келгач, ўлдирилишидан қўрқиб, қочган.
Август ойида биз у хали Кобулдалигида "Zoom" орқали суҳбатлашган, у Британия Бош вазиридан ёрдам сўраган эди.
Сурат манбаси, contributor
"У менга ва оиламга хавфсиз йўл очишини хоҳлайман, - деганди Бурхон. - Ундан илтимос қиламан."
Ўшанда у агар толиблар уни топса, "раҳм-шафқат қилмайди ва мени ўлдиришлари муқаррар" деган эди.
Биз Бурхон билан у ўзи ҳамда гинеколог рафиқаси Наргис ва ўғли Сепеҳрнинг ҳаётини хавф остига қўйиб, Афғонистонни тарк этишга уринаётган чоғда ҳам алоқа қилиб турдик.
Улар аэропортдаги тартибсизликдан омон қолишди ва Кобул аэропортида худкушлик ҳужумидан бир кун олдин Қироллик ҳаво кучлари (RAF) учоғига чиқишга муваффақ бўлишди.
Сурат манбаси, contributor
RAF учоғида оила суратини юборгач, Бурхон бизга "ҳаётимдаги энг бахтли лаҳзалар" деб айтганди.
Аэропорт яқинидаги меҳмонхонада оиласи карантинда турганида Бурхон билан яна суҳбатлашдик.
Фақат Сепеҳр деразадан ўзининг янги мамлакатига қараб, ўзи билан олиб келгани ягона нарса ўйинчоқ машиналарини ўйнаши мумкин эди.
Улар ўз хавфсизлиги учун жуда миннатдор эдилар ва Бурхон худди Ҳилманддагидек: "Мен шу юртга хизмат қиламан", деб ваъда берди.
Сурат манбаси, contributor
Британияга олиб келинган минглаб афғонлар сингари улар ҳам охирги 100 кунни меҳмонхонада ўтказдилар.
Сепеҳр мактабга ҳам чиқди, лекин ўтган ҳафта Лондоннинг марказий меҳмонхонасида яшовчи юзлаб қочқинларга Кроулидаги бошқа меҳмонхонага кўчиб ўтишлари кераклиги айтилди, шунинг учун барча болалар мактабни ташлаб кетишга мажбур бўлди, январгача бошқа боришмайди.
Октябрь ойида, оила ҳали ҳам Лондондаги меҳмонхонада бўлганида, мен Абердинда яшовчи Хелга Макфарлейндан электрон мактуб олдим.
У шундай деб ёзганди: "Сизнинг ҳикоянгиз мени ҳайратда қолдирди. Онам Иккинчи жаҳон уруши пайтида Силезиядан қочқин бўлган ва Британия армиясида таржимон бўлиб ишлаган.
Мен жаноб Весал билан боғланиб, унга бу ерда янги уй таклиф қилдим", деб ёзди у.
"Мен сизга репортажингизда уларнинг аҳволини шунчалик яхши ёритганингиз учун раҳмат айтмоқчи эдим. Бу мени ҳаракат қилишга ундади, умид қиламанки, менинг уринишим уларнинг бошига тушган кўргиликларни қандайдир тарзда қоплайди ва бу ерда янги ҳаёт бошлашни осонлаштиради."
Кейинроқ Хелга онаси Германиядан ўз онаси ва синглиси билан қочганини ва йўлда уларни яшириб, қоринларини тўйдирган одамларнинг меҳрибонлиги ва Британия Қизил Хоч жамиятининг ёрдами туфайлигина Британияга етиб кела олганини гапириб берди.
Сурат манбаси, contributor
"Онам ва оиламнинг омон қолишига ёрдам берган меҳрибонлик ва инсонийликни қайтариш вақти келди", дейди у.
Весаллар оиласи ҳеч қачон кўрмаган бир аёл уларга яшаш учун квартира таклиф қилганидан ва Абердин Кенгаши кўмагида уларни ўқитиш ва қайта тайёрлашга ёрдам берганидан хурсанд бўлишди.
Аммо булар унчалик осон бўлмайди.
Октябрь ойи охирида Ички ишлар вазирлиги оилага Питерборога кўчиб ўтишлари кераклигини билдирди.
Паркинсон касаллигига қарши курашаётган Хелга тез-тез ётоқдан туриб, улар учун бюрократияга қарши курашишга қарор қилди.
Маҳаллий депутат иштирокида улар Буюк Британия ҳукуматини ёрдам беришга ундамоқда.
Сурат манбаси, contributor
Весаллар Питерборога жўнатилди, бироқ улар борганидан бир неча дақиқа ўтгач, уларга хатолик юз бергани ва Лондондаги меҳмонхоналарига қайтишлари кераклигини айтишди.
Душанба куни Ички ишлар вазирлиги ниҳоят уларга Абердинга кўчиб ўтишлари мумкинлиги ҳақида хабар берди.
Бир нечта сумка ва маҳаллий оила Сепеҳрга совға қилган скутерни олиб, улар янги шаҳарга етиб боришди.
Кобуллик бу оила энди бегоналарнинг меҳрибонлиги билан Шотландия оиласи бўлади.
"Янги уйингизга хуш келибсиз", дейди Хелга Сепеҳрга ўйинчоқ машиналар бўлган янги хонасини кўрсатар экан.
Наргис квартирани айланиб ўтиб йиғлаб юборди.
Карьерадан воз кечиб, қариндошларини ташлаб, уч ой ичида учта меҳмонхонага кўчиб ўтиб, ниҳоят муқимлик топди.
Ошхонадан Ҳелга шотланд таомлари: Таннок кекси ва Ирн Бруни олиб келди.
"Ирна Бруни Афғонистонда, Ҳилманд вилоятида кўрганман", деб кулади Бурхон.
Бурхон Хелгага раҳмат айтишга сўз топа олмай, "Сизнинг саҳоватингиз, меҳрибон қалбингиз ҳеч қачон унутилмайди.
Бу дунёда ҳали ҳам яхши одамлар бор, сиз эса намунасиз.
Саховатли одамлар бошингизга зулмат тушганда сизга ёрдам беради, улар келиб чироқ ёқади."
Весалларга омад кулиб боқди. Афғонистонлик қочқинларнинг аксарияти ҳамон меҳмонхоналарда яшамоқда.
Улар ўзларининг хавфсизлиги учун миннатдорлар, лекин муқим бирор ерга кўчиб ўтишга, фарзандларини доимий мактабларга жойлаштиришга, иш топишга умид қилиб яшамоқдалар.
Бир киши бошқаларнинг ҳаётини ўзгартира олади.
Абердинда янги ҳаётини бошлаган Весаллар учун Ҳелганинг охирги сўзи бор эди.
У шундай дейди: "Энди сиз бизнинг оиламизнинг бир қисмисиз. Хуш келибсиз!"
Telegram каналимиз: @bbcuzbek
BBCUZBEK.COM билан Telegram орқали +44 7858860002 номери билан боғланинг.
